ఏపీకి మరో పిడుగులాంటి వార్త.. ఆ జిల్లాల్లో భారీ వర్షాలకు హై అలర్ట్..!

ఆంధ్రప్రదేశ్ తీర ప్రాంత జిల్లాలను ప్రకృతి వైపరీత్యాలు వరుసగా వెంటాడుతున్నాయి. గత నెల రోజుల వ్యవధిలో అర్నబ్, మురసు తుఫాన్ల దెబ్బకు కోస్తాంధ్ర అతలాకుతలమై, రైతులు వేలాది ఎకరాల్లో పంటలు నష్టపోయి ఇంకా కోలుకోకముందే ఇప్పుడు మూడో తుఫాన్ రూపంలో మరో పెను ముప్పు పొంచి ఉంది. ఆగ్నేయ బంగాళాఖాతం మరియు అండమాన్ సముద్ర పరిసరాల్లో ఏర్పడిన అల్పపీడనం ప్రస్తుతం తీవ్ర అల్పపీడనంగా బలపడిందని భారత వాతావరణ శాఖ వెల్లడించింది.

వాతావరణ శాఖ తాజా అంచనాల ప్రకారం, ఈ అల్పపీడనం వాయువ్య దిశగా కదులుతూ నవంబర్ 15వ తేదీ ఉదయానికి వాయుగుండంగా మారనుంది. ఆ తర్వాత ఇది మరింత బలపడి నవంబర్ 16వ తేదీ సాయంత్రానికి మధ్య బంగాళాఖాతంలో(Bay Of Bengal) పూర్తిస్థాయి తుఫాన్‌గా(Cyclone) రూపాంతరం చెందే అవకాశం ఉంది. ఈ తుఫాన్‌కు అక్వాన్ అని నామకరణం చేయనున్నారు. ప్రస్తుతం ఉన్న వాతావరణ నమూనాల ప్రకారం, ఈ తుఫాన్ ఉత్తరాంధ్ర మరియు దక్షిణ ఒడిశా తీరాల వైపు పయనించే అవకాశాలు స్పష్టంగా కనిపిస్తున్నాయి.

ముఖ్యంగా ఈ నెల 18వ తేదీ అర్ధరాత్రి లేదా 19వ తేదీ ఉదయం సమయంలో మచిలీపట్నం మరియు ఒడిశాలోని గోపాల్‌పూర్ మధ్య, కచ్చితంగా చెప్పాలంటే కాకినాడ లేదా కళింగపట్నం సమీపంలో తీరం దాటే అవకాశం ఉందని నిపుణులు అంచనా వేస్తున్నారు. అయితే తీరం దిశగా వచ్చే సమయంలో ఈ తుఫాన్ కొంతమేర బలహీనపడే సూచనలు కూడా ఉన్నాయన్న అంచనాలు తీర ప్రాంత ప్రజలకు కొంత ఊరటనిస్తున్నాయి. అయినప్పటికీ, తుఫాన్ ప్రభావం మరియు తీరం దాటే కచ్చితమైన ప్రాంతంపై నవంబర్ 16వ తేదీ సాయంత్రం నాటికి పూర్తి స్పష్టత రానుంది.

ఈ తుఫాన్ ప్రభావంతో నవంబర్ 18 మరియు 19 తేదీల్లో కోస్తాంధ్ర, ముఖ్యంగా ఉత్తరాంధ్ర జిల్లాల్లో భారీ నుంచి అతి భారీ వర్షాలు కురిసే అవకాశం ఉందని వాతావరణ శాఖ హెచ్చరించింది. సముద్రం అల్లకల్లోలంగా మారనున్న నేపథ్యంలో, వేటకు వెళ్లిన మత్స్యకారులు నవంబర్ 15వ తేదీ లోపు తీరానికి తిరిగి రావాలని, నవంబర్ 19 వరకు మధ్య బంగాళాఖాతం వైపు వేటకు వెళ్లవద్దని అధికారులు స్పష్టమైన ఆదేశాలు జారీ చేశారు. వరుస తుఫాన్ల నేపథ్యంలో తీర ప్రాంత ప్రజలు అప్రమత్తంగా ఉండాలని, అధికారిక వాతావరణ హెచ్చరికలను మాత్రమే నమ్మాలని విపత్తు నిర్వహణ సంస్థ సూచిస్తోంది.