Gas Charges: హోటల్స్లో ‘గ్యాస్ చార్జీల’ మోత.. ఎల్పీజీ కొరతతో కస్టమర్లపై భారం!
- Published By: Phanindra
- March 14, 2026 / 06:54 AM IST
దేశవ్యాప్తంగా నెలకొన్న కమర్షియల్ ఎల్పీజీ (LPG) సిలిండర్ల తీవ్ర కొరత ఇప్పుడు నేరుగా సామాన్యుల జేబులకు (Gas Charges) చిల్లులు పెడుతోంది. మార్కెట్లో గ్యాస్ సిలిండర్ల లభ్యత అనూహ్యంగా తగ్గిపోవడం, బ్లాక్ మార్కెట్లో వాటి ధరలు అమాంతం పెరిగిపోవడంతో రెస్టారెంట్లు, హోటళ్ల నిర్వహణ తీవ్ర సంక్షోభంలో పడింది. ఈ ఊహించని ఆర్థిక భారాన్ని మోయలేక కొన్ని యాజమాన్యాలు ఆ అదనపు ఖర్చును నేరుగా వినియోగదారులకే బదిలీ చేస్తున్నాయి.
ముఖ్యంగా బెంగళూరు, చెన్నై లాంటి ప్రధాన నగరాల్లోని రెస్టారెంట్లు అనుసరిస్తున్న ఈ కొత్త విధానం (Gas Charges) ఇప్పుడు తీవ్ర వివాదానికి దారితీస్తోంది. కస్టమర్లు ఆర్డర్ చేసిన ఆహార పదార్థాల అసలు బిల్లుకు అదనంగా ‘గ్యాస్ చార్జీలు’ (Gas Charges) పేరుతో అదనపు రుసుమును వసూలు చేస్తున్నాయి. ఈ తరహా బిల్లులకు సంబంధించిన రసీదుల ఫోటోలు ప్రస్తుతం సోషల్ మీడియాలో విపరీతంగా వైరల్ అవుతున్నాయి. ఉదాహరణకు, చెన్నైలోని ప్రముఖ రెస్టారెంట్ గీరాస్ (Geeraas) జారీ చేసిన ఓ బిల్లులో, ఫుడ్ ఐటమ్స్ కు అయిన ఖర్చుతో పాటు అదనంగా రూ. 9.52ను ‘గ్యాస్ చార్జ్’ కింద వసూలు చేసినట్లు స్పష్టంగా నమోదై ఉంది. ఇదే తరహాలో, మరో రెస్టారెంట్ ఏకంగా ‘గ్యాస్ సప్లై ఇష్యూ’ (Gas supply issue) అనే కారణాన్ని చూపుతూ ప్రతి వినియోగదారుడి బిల్లుపై రూ. 30 చొప్పున అదనపు ఛార్జీని బాదుతోంది.
