సరికొత్తగా చికెన్ వెల్లుల్లి కారం! ఒక్కసారి తింటే ఆ రుచే వేరు నా సామిరంగా.. ఇలా చేసేయండి!

ఇంట్లోనే రుచికరమైన పొడులు తయారు చేసుకుని భోజనంలో చేర్చుకోవడం చాలామందికి ఇష్టం. ముఖ్యంగా వేడి వేడి అన్నంలో కొద్దిగా నెయ్యి వేసుకుని కారం కలుపుకుని తింటే ఆ రుచే వేరు. అలాంటి వంటకాల్లో చికెన్ వెల్లుల్లి కారం (Chicken Garlic Powder) కూడా ఒకటి. చికెన్ (Chicken), వెల్లుల్లి (Garlic), ఎండుమిరపకాయలు (Dry Red Chillies), సుగంధ ద్రవ్యాలతో తయారు చేసే ఈ పొడి అన్నం, ఇడ్లీ, దోశతో కలిపి తినడానికి బాగుంటుంది. ప్రోటీన్‌తో కూడిన చికెన్, రుచిని అందించే వెల్లుల్లి కలయికతో ఈ పొడిని ఇంట్లోనే తయారు చేసుకోవచ్చు. అయితే ఇది దగ్గు, జలుబుకు మందు కాదని గుర్తుంచుకోవాలి. మరి ఈ కారం తయారీ విధానం తెలుసుకుందాం.

చికెన్ పొడికి కావాల్సిన పదార్థాలు

ఈ పొడి తయారు చేయడానికి బోన్ లెస్ చికెన్, వెల్లుల్లి రెబ్బలు, ఎండుమిరపకాయలు, ధనియాలు (Coriander Seeds), జీలకర్ర (Cumin Seeds), మిరియాలు (Black Pepper), తగినంత ఉప్పు అవసరం. ముందుగా చికెన్‌ను శుభ్రంగా కడిగి చిన్న ముక్కలుగా కోసుకోవాలి. వెల్లుల్లి రెబ్బల పై తొక్క తీసి పక్కన పెట్టుకోవాలి. మసాలా దినుసులను కూడా సిద్ధంగా ఉంచుకోవాలి.

చికెన్ పొడి తయారీ విధానం

ముందుగా బాణలిలో కొద్దిగా నూనె వేసి చికెన్ ముక్కలను పూర్తిగా ఉడికించాలి. చికెన్ లోపలి భాగం కూడా బాగా ఉడికిందని నిర్ధారించుకోవాలి. ఆ తర్వాత ముక్కల్లోని తేమను తగ్గించేందుకు తగిన పద్ధతిలో ఎండబెట్టాలి. ఇందుకోసం ఫుడ్ డీహైడ్రేటర్ (Food Dehydrator) లేదా ఆహార పదార్థాలను ఎండబెట్టడానికి అనువైన ఓవెన్ (Oven) ఉపయోగించవచ్చు. చికెన్ పూర్తిగా తేమలేకుండా ఎండినప్పుడే పొడిగా తయారు చేయాలి. కేవలం బాణలిలో వేయించడం ద్వారా తేమ మొత్తం పోయిందని భావించకూడదు.

తర్వాత బాణలిలో ధనియాలు, జీలకర్ర, మిరియాలు, ఎండుమిరపకాయలను తక్కువ మంటపై వేయించాలి. దినుసులు మాడిపోకుండా కలుపుతూ సువాసన వచ్చే వరకు వేడి చేయాలి. వెల్లుల్లి రెబ్బలను కూడా తేలికగా వేయించి పక్కన పెట్టుకోవాలి. అన్ని పదార్థాలు పూర్తిగా చల్లారిన తర్వాత ఎండిన చికెన్ ముక్కలు, మసాలా దినుసులు, వెల్లుల్లి, ఉప్పును మిక్సీలో వేసి మెత్తటి పొడిలా చేసుకోవాలి. మీకు కారంగా కావాలంటే ఎండుమిరపకాయల పరిమాణాన్ని రుచికి అనుగుణంగా మార్చుకోవచ్చు.

చికెన్ కారప్పొడి నిల్వ, ప్రయోజనాలు

ఈ పొడిని నిల్వ చేసేటప్పుడు ప్రత్యేక శ్రద్ధ అవసరం. చికెన్‌తో తయారుచేసిన పొడిలో కొద్దిపాటి తేమ మిగిలినా బ్యాక్టీరియా పెరిగే ప్రమాదం ఉంటుంది. కాబట్టి పొడిని పూర్తిగా ఎండిన, శుభ్రమైన గాలి చొరబడని డబ్బాలో (Airtight Container) పెట్టాలి. వెంటనే ఉపయోగించకపోతే చిన్న పరిమాణాల్లో విభజించి ఫ్రిజ్‌లో లేదా ఫ్రీజర్‌లో భద్రపరచాలి. గది ఉష్ణోగ్రత వద్ద ఎక్కువ రోజులు నిల్వ చేయకూడదు. వాసన, రంగు మారినా లేదా తేమ కనిపించినా తినకూడదు.

చికెన్‌లో ప్రోటీన్ (Protein) లభిస్తుంది. వెల్లుల్లి, మిరియాలు, ఇతర మసాలా దినుసులు ఆహారానికి రుచిని అందిస్తాయి. ఈ చికెన్ కారం పాడి అన్నం తో పాటు దోస ఇడ్లీ వంటి వాటితో కూడా బాగుంటుంది. ఈ కారప్పొడి ఒకేసారి ఎక్కువ మోతాదులో చేసుకోవడం కంటే కూడా చిన్న బ్యాచెస్ లో చేసుకుంటే తాజాగా ఉంటుంది.