గ్రేస్ పీరియడ్ రద్దు.. విదేశీ ఉద్యోగులకు ట్రంప్ సర్కార్ షాక్..!

విదేశీ ఉద్యోగులకు ట్రంప్ సర్కార్ మరో షాకిచ్చేందుకు సిద్ధమవుతోంది. హెచ్-1బీ వంటి తాత్కాలిక వీసాలపై పనిచేస్తున్న విదేశీ ఉద్యోగులకు.. ఇప్పటివరకూ ఉన్న గ్రేస్ పీరియడ్ ను రద్దు చేయాలని ప్రతిపాదించింది. ఇది అమల్లోకి వస్తే , ఉద్యోగం పోయిన మరుసటి రోజే దేశం విడిచి వెళ్లాల్సి వస్తుంది. ఈ పరిణామం హెచ్-1బి వీసాదారుల్లో ఆందోళన కలిగిస్తోంది. మరీ ముఖ్యంగా భారతీయ టెకీల కుటుంబాల్లో కలకలం రేపుతోంది.

ఉద్యోగం కోల్పోయిన తర్వాత కొత్త ఉద్యోగం వెతుక్కోవడానికి లేదా దేశం విడిచి వెళ్లేందుకు సన్నద్ధమవడానికి ప్రస్తుతం ఇస్తున్న 60 రోజుల గ్రేస్ పీరియడ్‌ను రద్దు చేయాలని ట్రంప్ సర్కార్ ప్రతిపాదించింది. ఇది అమల్లోకి వస్తే, ఉద్యోగం పోయిన మరుసటి రోజే దేశం విడిచి వెళ్లాల్సి వస్తుంది. హెచ్-1బీ వీసాదారుల్లో అధిక శాతం భారతీయ టెకీలే కావడంతో ఈ ప్రతిపాదన వారిలో ఆందోళన రేపుతోంది.

అమెరికా హోంల్యాండ్ సెక్యూరిటీ విభాగం (డీహెచ్‌ఎస్) ఈ మేరకు ఫెడరల్ రిజిస్టర్‌లో ఒక ప్రకటన చేసింది. ఈ ప్రతిపాదన 60 రోజుల పాటు ప్రజాభిప్రాయ సేకరణకు అందుబాటులో ఉంటుంది. ప్రస్తుతం ఉన్న నిబంధన ప్రకారం, ఉద్యోగం కోల్పోయిన హెచ్-1బీ, ఎల్-1, ఓ-1, ఈ-1 వంటి వీసాదారులు 60 రోజుల్లోపు మరో స్పాన్సర్‌ను వెతుక్కోవచ్చు లేదా తమ వ్యవహారాలు చక్కబెట్టుకోవచ్చు.

2017లో నాటి అధ్యక్షుడు ఒబామా హయాంలో ఈ వెసులుబాటును కల్పించారు. అయితే, ఈ గ్రేస్ పీరియడ్ వల్ల పరిపాలనా భారం పెరుగుతోందని, వీసా స్టేటస్‌ను నేరుగా ఉద్యోగంతో ముడిపెట్టడం ద్వారా అమెరికన్లకు అవకాశాలు పెరుగుతాయని డీహెచ్‌ఎస్ తన ప్రతిపాదనలో పేర్కొంది. ప్రజాభిప్రాయ సేకరణ పూర్తయిన తర్వాతే దీనిపై తుది నిర్ణయం వెలువడుతుంది. అప్పటివరకు ప్రస్తుతం ఉన్న 60 రోజుల గ్రేస్ పీరియడ్ నిబంధనే అమల్లో ఉంటుంది.