విదేశీ విద్యార్థులకు అమెరికా కోర్టులో ఊరట..!
ట్రంప్ సర్కార్ కు కోర్టులో మరో గట్టి ఎదురుదెబ్బ తగిలింది. విద్యార్థులు, జర్నలిస్టులు సహా వివిధ రంగాలకు చెందిన వారి వీసా కాలపరిమితి పరిమితం చేసే ప్రతిపాదనను కోర్టు కొట్టేసింది.హోంల్యాండ్ సెక్యూరిటీ విభాగం (డీహెచ్ఎస్) నిర్ణయం ఏకపక్షంగా, చట్టవిరుద్ధంగా ఉందని స్పష్టం చేసింది. ఈ తీర్పుతో భారత విద్యార్థులు సహా లక్షలాది మంది అంతర్జాతీయ విద్యార్థులు ఊపిరి పీల్చుకున్నారు.
వివాదాస్పద ప్రతిపాదన?
గతంలో అమెరికా హోంల్యాండ్ సెక్యూరిటీ విభాగం (డీహెచ్ఎస్) విదేశీ విద్యార్థులు, స్కాలర్లు, జర్నలిస్టుల వీసా నిబంధనలను కఠినతరం చేయాలని ప్రతిపాదించింది. దీని ప్రకారం..అంతర్జాతీయ విద్యార్థులు గరిష్ఠంగా 4 సంవత్సరాలు మాత్రమే దేశంలో ఉండేందుకు వీలుంటుంది. ఆ తర్వాత ఉండాలంటే ప్రత్యేక ఫెడరల్ అనుమతి తప్పనిసరి.విదేశీ జర్నలిస్టుల వీసా గడువును చాలా సంవత్సరాల నుంచి 240 రోజులకు, చైనా జర్నలిస్టులకు 90 రోజులకు కుదించాలని ప్రతిపాదించారు.
చదువు పూర్తయ్యాక ఇచ్చే గ్రేస్ పీరియడ్ను 60 రోజుల నుంచి 30 రోజులకు తగ్గించాలని సూచించారు.
ఇవి కూడా చదవండి
చట్టవిరుద్ధమన్న న్యాయస్థానం
ఈ ప్రతిపాదనను బోస్టన్ ఫెడరల్ జడ్జి ఎఫ్. డెన్నిస్ సేలర్ కొట్టివేశారు. “డీహెచ్ఎస్ ప్రతిపాదన ఏకపక్షమైనది, విచక్షణారహితమైనది, అధికార దుర్వినియోగం, చట్టానికి విరుద్ధం” అని ఆయన తన తీర్పులో స్పష్టం చేశారు. “నిక్కచ్చిగా చెప్పాలంటే, విదేశీ విద్యార్థులకు విద్యావకాశాలు కల్పించాలన్న కాంగ్రెస్ ఉద్దేశాన్ని డీహెచ్ఎస్ నిరుత్సాహపరచాలని చూస్తోంది. ఎఫ్-1 వీసా కార్యక్రమాన్ని బలహీనపరిచేంత విస్తృత అధికారం డీహెచ్ఎస్కు చట్టం ఇవ్వలేదు” అని జడ్జి వ్యాఖ్యానించారు.
హర్షం వ్యక్తం చేసిన సంఘాలు
ఈ తీర్పుపై భారతీయ, విద్యా సంఘాలు హర్షం వ్యక్తం చేశాయి. “మరోసారి న్యాయస్థానం అంతర్జాతీయ విద్యార్థులను ఆదుకుంది. తద్వారా అమెరికా సైన్స్, టెక్నాలజీ, పరిశోధన భవిష్యత్తును కాపాడింది” అని ఫౌండేషన్ ఫర్ ఇండియా అండ్ ఇండియన్ డయాస్పోరా స్టడీస్ (ఎఫ్ఐఐడీఎస్) అధ్యక్షుడు ఖండేరావు కండ్ అన్నారు.
ఈ కేసులో ప్రధాన పిటిషనర్గా ఉన్న ప్రెసిడెంట్స్ అలయన్స్ ఆన్ హయ్యర్ ఎడ్యుకేషన్ ప్రెసిడెంట్ మిరియం ఫెల్డ్బ్లమ్ మాట్లాడుతూ.. ఇది అంతర్జాతీయ విద్యార్థులు, విశ్వవిద్యాలయాలకు లభించిన స్పష్టమైన విజయమని పేర్కొన్నారు. ఇలాంటి హానికర విధానాల వల్లే అంతర్జాతీయ విద్యార్థుల నమోదు గణనీయంగా తగ్గిపోయిందని ఆమె గుర్తుచేశారు.







