తొలి మహిళా సుమో రెస్లర్ జీవితం ఆధారంగా ‘సుమో దిది’ ట్రైలర్ విడుదల.. జీ5లో స్ట్రీమింగ్ ఎప్పుడంటే?

మహిళల విజయాలకు సంబంధించి సమాజం నిర్దేశించుకున్న మూస పద్ధతులను ప్రశ్నిస్తూ, పట్టుదల, ఆత్మవిశ్వాసంతో ముందుకు సాగే ఒక అద్భుతమైన స్ఫూర్తిదాయక కథాంశంతో సుమో దిది(Sumo Didi) సినిమా ప్రేక్షకుల ముందుకు రానుంది. ప్రముఖ ఓటీటీ వేదిక జీ5 గ్లోబల్ (Zee5 Global) ఈ చిత్ర అధికారిక ట్రైలర్‌ను తాజాగా విడుదల చేసింది. భారతదేశ మొట్టమొదటి ప్రొఫెషనల్ మహిళా సుమో రెస్లర్ అయిన హేతల్ దవె (Hetal Dave) అసాధారణ నిజ జీవిత స్ఫూర్తితో ఈ సినిమాను తెరకెక్కించారు. జియో స్టూడియోస్, ఫ్రెష్ లైమ్ ఫిల్మ్స్ సంయుక్తంగా ఈ చిత్రాన్ని నిర్మించగా, జయంత్ రోహత్గి దర్శకత్వం వహించారు. శ్రీయమ్ భగ్నవాణి టైటిల్ పాత్రలో నటించగా, చైతన్య శర్మ తదితరులు కీలక పాత్రలు పోషించారు. ఈ సినిమా అక్టోబర్ 23, 2026 నుంచి కేవలం జీ5లో ప్రసారం కానుంది.

ప్రపంచం తన లోపంగా భావించిన అంశాన్నే తన అతిపెద్ద బలంగా మార్చుకున్న ఓ మహిళ కథే ఈ ‘సుమో దిది’. సంప్రదాయేతర సుమో రెజ్లింగ్ రంగంలో తనకంటూ ఒక ప్రత్యేక గుర్తింపు తెచ్చుకోవడానికి హేతల్ దవె పడిన కష్టాలు, ఎదుర్కొన్న సవాళ్లను ఈ చిత్రంలో కళ్లకు కట్టినట్లు చూపించారు. మహిళల శరీరాకృతి, వారి సామర్థ్యాలపై సమాజంలో ఉన్న అభిప్రాయాలను సవాల్ చేస్తూ సాగే ఈ ప్రయాణం ప్రతి ఒక్కరినీ ఆకట్టుకుంటుంది. టోక్యో ఇంటర్నేషనల్ ఫిల్మ్ ఫెస్టివల్, పామ్ స్ప్రింగ్స్ ఇంటర్నేషనల్ ఫిల్మ్ ఫెస్టివల్ వంటి ప్రతిష్టాత్మక అంతర్జాతీయ చలన చిత్రోత్సవాలలో ప్రదర్శితమై ఈ చిత్రం ఇప్పటికే విశేష గుర్తింపు పొందింది.

నటీనటులు, సాంకేతిక నిపుణులు…

ప్రధాన తారాగణం: శ్రీయమ్ భగ్నవాణి, చైతన్య శర్మ, అనుభా ఫతేపురియా, నితేష్ పాండే, రాఘవ్ ధీర్, మీనల్ కపూర్
దర్శకత్వం: జయంత్ రోహత్గి
నిర్మాతలు: జ్యోతి దేశ్‌పాండే, ఆకాశ్ చావ్లా, అరుణవ సేన్ గుప్తా, అమిత్ చంద్ర
స్ట్రీమింగ్ వేదిక: జీ5 (Zee5).
విడుదల తేదీ: అక్టోబర్ 23, 2026.

ఈ చిత్రం కేవలం ఒక సుమో రెస్లర్ ప్రయాణమే కాకుండా, కష్టాలను ఎదుర్కొని తనకంటూ ఒక శక్తివంతమైన స్థానాన్ని ఏర్పరచుకున్న యువతి విజయగాథ అని చిత్ర యూనిట్ పేర్కొంది. అక్టోబర్ 23 నుంచి జీ5 గ్లోబల్‌లో ఈ సినిమాను వీక్షించవచ్చు.