SIM Binding: వాట్సాప్, టెలిగ్రామ్ వినియోగదారులకు ఊరట
- Published By: Phanindra
- April 1, 2026 / 06:33 AM IST
స్మార్ట్ఫోన్ వినియోగదారులకు, ప్రముఖ మెసేజింగ్ యాప్స్ (Messaging Apps) వాట్సాప్, టెలిగ్రామ్, సిగ్నల్, అరట్టై వంటి సంస్థలకు కేంద్ర ప్రభుత్వం తాత్కాలిక ఊరట కల్పించే యోచనలో ఉన్నట్లు తెలుస్తోంది. సైబర్ నేరాలను, ఫేక్ అకౌంట్లను అరికట్టే దిశగా కేంద్రం అత్యంత ప్రతిష్టాత్మకంగా తీసుకొచ్చిన ‘సిమ్ బైండింగ్’ (SIM Binding) నిబంధనల అమలు గడువును ఈ ఏడాది డిసెంబర్ నెలాఖరు వరకు పొడిగించే అవకాశం ఉందని టెలికాం రంగ నిపుణులు భావిస్తున్నారు. ఈ మేరకు టెలికాం విభాగానికి (DoT) చెందిన పలువురు ఉన్నతాధికారులను ఉటంకిస్తూ జాతీయ ఆంగ్ల మీడియా సంస్థలు ప్రముఖ కథనాలను ప్రచురించాయి.
అసలేంటీ సిమ్ బైండింగ్?
సిమ్ బైండింగ్ అంటే.. మీ ఫోన్లో భౌతికంగా సిమ్ కార్డ్ (SIM Card) ఉంటేనే వాట్సాప్ లేదా ఇతర మెసేజింగ్ యాప్లు పనిచేస్తాయన్నమాట. గతంలో సిమ్ లేకుండా వైఫై (Wi-Fi) ద్వారా లేదా వేరే పరికరంలో ఓటీపీ (OTP) పొందడం ద్వారా యాప్లను యాక్సెస్ చేసుకునే వెసులుబాటు ఉండేది. దీనివల్ల సైబర్ నేరగాళ్లు, స్కామర్లు సులభంగా నకిలీ ఖాతాలను సృష్టించి నేరాలకు పాల్పడుతున్నారని గుర్తించిన కేంద్రం, గతేడాది నవంబర్లో ఈ కఠిన నిబంధనలను (SIM Binding) తెరపైకి తెచ్చింది. వీటిని దేశవ్యాప్తంగా అమలు చేయడానికి టెక్ కంపెనీలకు 90 రోజుల కచ్చితమైన గడువు (Deadline) విధించింది.
ఇవి కూడా చదవండి
సాంకేతిక సవాళ్లే ప్రధాన అడ్డంకి
అయితే కేంద్రం విధించిన గడువులోగా ఈ నిబంధనలను అమలు చేయడంలో తాము తీవ్రమైన సాంకేతిక సవాళ్లను (Technical Challenges) ఎదుర్కొంటున్నామని టెక్ దిగ్గజాలు టెలికాం శాఖ దృష్టికి తీసుకెళ్లాయి. కోట్లాది మంది వినియోగదారుల ఖాతాలను వారి భౌతిక సిమ్లతో అనుసంధానం (SIM Binding) చేయడం, దానిని కచ్చితంగా ధృవీకరించడం కోసం భారీ స్థాయిలో టెస్టింగ్ (Testing) చేయాల్సి వస్తోందని వివరించాయి. ఆండ్రాయిడ్, ఐఓఎస్ (iOS) వంటి వివిధ ఆపరేటింగ్ సిస్టమ్లలో (OS Updates) ఈ కొత్త ఫీచర్ను సురక్షితంగా, ఎటువంటి అవాంతరాలు లేకుండా ఇంటిగ్రేట్ చేయడానికి మరింత సమయం పడుతుందని యాప్స్ సంస్థలు కేంద్రానికి విజ్ఞప్తి చేశాయి.
డిసెంబర్ వరకు గడువు పెంపు?
టెక్ కంపెనీల అభ్యర్థనలను, వారు ఎదుర్కొంటున్న వాస్తవ సాంకేతిక ఇబ్బందులను పరిగణనలోకి తీసుకున్న కేంద్ర టెలికాం శాఖ.. ఈ సవాళ్లను పూర్తిగా అధిగమించి, సిమ్ బైండింగ్ (SIM Binding) ప్రక్రియను పక్కాగా, లోపాల్లేకుండా అమలు చేసేందుకు ఆయా సంస్థలకు మరికొంత సమయం ఇవ్వాలని ప్రాథమికంగా నిర్ణయించినట్లు విశ్వసనీయ వర్గాల సమాచారం. ఈ గడువును డిసెంబర్ (December 2026) వరకు పొడిగించే అవకాశం ఉన్నప్పటికీ, కేంద్ర ప్రభుత్వం నుంచి లేదా టెలికాం శాఖ నుంచి అధికారిక ప్రకటన (Official Announcement) వెలువడాల్సి ఉంది.
ఇవి కూడా చదవండి
