న్యూజెర్సీలో ఘోర రోడ్డు ప్రమాదం.. వినుకొండ యువతి మృతి!

అమెరికాలోని న్యూజెర్సీలో  ఘోర రోడ్డు ప్రమాదం జరిగింది. ఈ ప్రమాదంలో పల్నాడు జిల్లా వినుకొండ మండలం ఉమ్మడివరం గ్రామానికి చెందిన మక్కెన ప్రసన్న (27) ప్రాణాలు కోల్పోయారు.

ప్రమాదం జరిగిన తీరు..
2022లో ఉన్నత విద్య కోసం అమెరికా వెళ్లిన ప్రసన్న, ఎంఎస్ పూర్తి చేసి ఉద్యోగ ప్రయత్నాల్లో ఉన్నారు. ఈ క్రమంలో మంగళవారం తన స్నేహితులతో కలిసి కారులో ఓ కార్యక్రమానికి వెళ్లి వస్తుండగా, వాహనం అదుపు తప్పి చెట్టును ఢీకొట్టింది. ఈ దురదృష్టకర ప్రమాదంలో ప్రసన్న అక్కడికక్కడే మరణించగా, ఆమెతో ఉన్న స్నేహితులకు గాయాలయ్యాయి.

శోకసంద్రంలో కుటుంబం..
సాధారణ రైతు కుటుంబానికి చెందిన ప్రసన్న మరణవార్త విన్న తల్లిదండ్రులు వెంకటేశ్వర్లు, గోవిందమ్మలు కన్నీరుమున్నీరుగా విలపిస్తున్నారు. ఆమె మరణంతో ఉమ్మడివరం గ్రామంలో విషాద ఛాయలు అలముకున్నాయి. తమ కూతురిని కోల్పోయిన తల్లిదండ్రుల వేదన వర్ణనాతీతం.

త్వరలో స్వగ్రామానికి పార్థివ దేహం..
ఈ విషయాన్ని తెలుసుకున్న వినుకొండ ఎమ్మెల్యే, చీఫ్ విప్ జీవీ ఆంజనేయులు స్పందించారు. బాధిత కుటుంబ సభ్యులతో మాట్లాడి వారికి ధైర్యం చెప్పారు. మృతురాలి పార్థివ దేహాన్ని వీలైనంత త్వరగా స్వగ్రామానికి రప్పించేందుకు ఉన్నతాధికారులతో మాట్లాడుతున్నట్లు ఆయన హామీ ఇచ్చారు. ప్రసన్న భౌతికకాయాన్ని త్వరగా భారత్‌కు తీసుకురావాలని కుటుంబ సభ్యులు ప్రభుత్వానికి విజ్ఞప్తి చేస్తున్నారు.