అమెరికాలో విషాదం.. స్కైడైవింగ్ చేస్తూ తెలుగు యువకుడు మృతి!

అమెరికాలోని మసాచుసెట్స్‌లో జరిగిన ఒక స్కైడైవింగ్ ప్రమాదంలో 28 ఏళ్ల భారతీయ మూలాలున్న యువకుడు మరణించాడు. మణి చంద్ర తేజ గడ్డం అనే వ్యక్తి జూలై 12న ఆరెంజ్‌లోని ‘జంప్ టౌన్ స్కైడైవింగ్’ కేంద్రంలో స్కైడైవింగ్ చేస్తుండగా ఈ ఘటన చోటుచేసుకుంది.

ప్రమాదం ఎలా జరిగిందంటే…

స్కైడైవింగ్ చేస్తున్న సమయంలో పారాచూట్ తెరిచి కిందకు దిగుతుండగా, ఒక్కసారిగా వచ్చిన బలమైన గాలుల వల్ల ల్యాండింగ్ ప్రక్రియకు ఆటంకం ఏర్పడింది. సుమారు 30 అడుగుల ఎత్తు నుండి అతను కిందపడిపోవడంతో తీవ్రంగా గాయపడ్డాడు. వెంటనే అతడిని ఆసుపత్రికి తరలించగా, చికిత్స పొందుతూ మరణించినట్లు వైద్యులు ధృవీకరించారు.

ఈ ఘటనపై నార్త్‌వెస్ట్రన్ డిస్ట్రిక్ట్ అటార్నీ కార్యాలయం, సంబంధిత అధికారులు దర్యాప్తు చేస్తున్నారు. పరికరాల్లో ఎలాంటి లోపాలు లేవని అధికారులు ప్రాథమికంగా భావిస్తుండగా, దీనికి సంబంధించి అధికారిక మరణ కారణం ఇంకా వెల్లడి కాలేదు. ప్రమాదం జరిగిన విషయాన్ని జంప్ టౌన్ స్కైడైవింగ్ సంస్థ ధృవీకరిస్తూ, దర్యాప్తులో పూర్తిగా సహకరిస్తున్నామని తెలిపింది. ఇది హఠాత్తుగా సంభవించిన వాతావరణ మార్పు వల్ల జరిగిన ప్రమాదమని వారు పేర్కొన్నారు.

మృతుడు విజయవాడకు చెందిన వారని, హైదరాబాద్‌లో నివసించారని, నార్త్ ఈస్టర్న్ యూనివర్సిటీలో చదువుకున్నారని సమాచారం. ఇటీవల అతను స్కైడైవింగ్ ‘ఏ’ లైసెన్స్‌ను కూడా పొందారని, ఇది అతనికి స్వతంత్రంగా స్కైడైవింగ్ చేయడానికి అనుమతిస్తుందని తెలుస్తోంది. అయితే, ఈ వివరాలను అధికారులు ఇంకా ధృవీకరించలేదు. సాధారణంగా స్కైడైవింగ్ సురక్షితమైన క్రీడగా పరిగణించినప్పటికీ, ల్యాండింగ్ సమయంలో ఎదురయ్యే హఠాత్తు వాతావరణ మార్పులు ప్రమాదకరంగా మారతాయని నిపుణులు హెచ్చరిస్తున్నారు.