మీ మొబైల్‌లో కనిపించే ఈ ‘న్యూస్’ అసలు వార్తే కాదు..! కోట్ల రూపాయల ఉచ్చు..!

— సూర్య ప్రకాష్ జోశ్యుల

నిన్న…

ఎప్పటిలాగే మొబైల్‌లో వార్తలు చదువుతున్నాను. అప్పుడే…ఒక హెడ్‌లైన్ నా కళ్ల ముందుకు వచ్చింది.

“95 ఏళ్ల నటుడు అల్జీమర్స్‌ను జయించాడు… ప్రపంచానికి దాచిన రహస్యం చివరికి బయటపడింది!”

పక్కనే…

ఒక ప్రముఖ సంస్థ లోగో.

ఒక ప్రపంచప్రసిద్ధ నటుడి ఫోటో.

మొత్తం చూస్తే…

అది వార్త కాదు అని అనుమానించే ఒక్క కారణం కూడా కనిపించలేదు.

“ఏమై ఉంటుందా?” అనిపించింది.

క్లిక్ చేశాను.

…

ఆ ఒక్క క్లిక్‌తో నేను వార్తలోకి కాదు… ఎంతో తెలివిగా అల్లిన ఒక డిజిటల్ ఉచ్చులోకి అడుగుపెట్టానని అప్పటికి నాకు తెలియదు.

…

ఐదు నిమిషాల తర్వాత నాకు అర్థమైంది…నేను వార్త చదవడం లేదు.ఎవరో నా నమ్మకంతో ఆడుకుంటున్నారు. దర్యాప్తు మొదలైంది… ఆ పేజీని మొదటి లైన్ నుంచి చివరి లైన్ వరకు పరిశీలించాను.

మొదట…

ఒక ప్రముఖ నటుడు.

తర్వాత…

ఒక నోబెల్ బహుమతి గ్రహీత.

తర్వాత…

“ఈ నిజాన్ని పెద్ద ఫార్మా కంపెనీలు దాచేశాయి.”

తర్వాత…

“ప్రభుత్వాలు ఈ సమాచారాన్ని బయటకు రానివ్వడం లేదు.” అన్నీ చదివాక… చివర్లో ఒక పెద్ద బటన్. “ఇప్పుడే ఆర్డర్ చేయండి.” అక్కడే కథ ముగిసింది. కానీ అసలు కథ అక్కడే మొదలైంది.

అయితే ఎలా కనిపెట్టాను?

ఒక చిన్న విషయం… మొత్తం కథను కూల్చేసింది

లోగో… పెద్ద సంస్థది.

డిజైన్…ప్రముఖ న్యూస్ వెబ్‌సైట్‌లా.

భాష… ప్రొఫెషనల్.

కానీ… నేను ఒక్కసారి పైన చూసాను. URL. అక్కడ దొరికిపోయింది… wellnessfrontierr.com. లోగో ఒకటి. పేరు ఒకటి. వెబ్‌సైట్ ఇంకొకటి. అప్పుడు అర్థమైంది… బయట కనిపించేది వార్త. లోపల దాగి ఉన్నది ఉచ్చు.

ఒక్కసారి మీ మొబైల్ తీసుకోండి ఇప్పుడే Chrome ఓపెన్ చేయండి. లేదా…మీకు ఇష్టమైన న్యూస్ వెబ్‌సైట్ ఓపెన్ చేయండి. కిందికి స్క్రోల్ చేయండి.

ఇలాంటి హెడ్‌లైన్స్ కనిపిస్తున్నాయా?

“7 రోజుల్లో షుగర్‌కు గుడ్‌బై!”

“డాక్టర్లు దాచిన రహస్యం!”

“ఈ వీడియో తొలగించేలోపు చూడండి!”

అయితే… ఈ కథనం మీ కోసమే.

స్కామర్లు మందు అమ్మరు… ముందుగా ఆశను అమ్ముతారు

ఊహించండి. మీ ఇంట్లో… తాతయ్యకు మతిమరుపు. తెలిసి ఉన్న వాళ్లకు కిడ్నీ సమస్య. అమ్మకు షుగర్.
కుటుంబం మొత్తం ఆందోళనలో ఉంది. అలాంటి సమయంలో… “పూర్తిగా నయం అయింది.” అనే వార్త కనిపిస్తే? ఎవరు ఆశపడరు?

స్కామర్లు వ్యాధిని కాదు… ఆ ఆశను వ్యాపారంగా మార్చేస్తారు.

ఒక్కసారి ఆలోచించండి…

నిజంగానే అల్జీమర్స్‌కు విప్లవాత్మక చికిత్స కనిపెట్టుంటే… అది… ఒక వింత వెబ్‌సైట్‌లో ఎందుకు అమ్ముతున్నారు? ప్రపంచ ఆరోగ్య సంస్థ ఎందుకు ప్రకటించడం లేదు? ప్రముఖ ఆసుపత్రులు ఎందుకు ఉపయోగించడం లేదు? ప్రముఖ వైద్య జర్నల్స్ ఎందుకు ప్రచురించడం లేదు? ఈ నాలుగు ప్రశ్నలకు సమాధానం దొరికితే… చాలా స్కామ్‌లు అక్కడికక్కడే కూలిపోతాయి.

మీ భయమే… వాళ్ల బిజినెస్ మోడల్

మీరు… షుగర్ గురించి వెతికారు. కిడ్నీ గురించి చదివారు. అల్జీమర్స్ గురించి తెలుసుకోవాలనుకున్నారు.
ఆసక్తి ఉన్న విషయాలకు సంబంధించిన ప్రకటనలు కనిపించడం సహజం. అందులో… ఇలాంటి మోసపూరిత ప్రకటనలు కూడా కలిసివచ్చే అవకాశం ఉంది. అందుకే…

వాళ్లు యాదృచ్ఛికంగా రావడం కాదు. మీ దృష్టిని ఆకర్షించే కథను ఎంచుకుంటారు. AI వచ్చాక… నిజం, అబద్ధం మధ్య గీత మరింత మసకబారొచ్చు

ఇప్పటి వరకు… ఫోటోలు. నకిలీ కథలు. టెక్స్ట్. రేపు… మీకు ఇష్టమైన హీరో. మీరు నమ్మే డాక్టర్. మీకు తెలిసిన న్యూస్ యాంకర్. వాళ్లే నిజంగా మాట్లాడుతున్నట్టు కనిపించే డీప్‌ఫేక్ వీడియోలు. చూడటానికి నిజం. కానీ… అది నిజం కాకపోవచ్చు.

ఈ ఐదు సంకేతాలు కనిపిస్తే వెంటనే ఆగండి

✅ “7 రోజుల్లో నయం”

✅ “డాక్టర్లు దాచిన రహస్యం”

✅ “ఇప్పుడే కొనండి”

✅ ప్రముఖుల ఫోటోలతో సంచలన కథ

✅ అధికారిక సంస్థ పేరుకు సరిపోని URL

ఈ ఐదింటిలో రెండు లేదా అంతకంటే ఎక్కువ కనిపిస్తే… ముందు ఆగండి. తర్వాత ధృవీకరించండి.

ఎందుకు చాలామంది చెప్పరు?

మోసపోయిన తర్వాత… చాలామంది నిశ్శబ్దంగా ఉంటారు.”నేను ఎలా నమ్మాను?” అనే సిగ్గు. ఎవరు ఏమనుకుంటారో అనే భయం. అదే… ఇలాంటి మోసాలను ఇంకా బతికిస్తోంది.

చివరిగా… నేను నేర్చుకున్న ఒక పాఠం

ఆ రోజు… నేను ఒక హెడ్‌లైన్‌పై క్లిక్ చేశాను. కానీ… ఆ హెడ్‌లైన్ నన్ను ఒక ప్రశ్న అడిగింది. “నువ్వు చదివేది వార్తనా… లేక ఎవరో నీ నమ్మకాన్ని కొనడానికి రాసిన కథనా?”

అప్పటి నుంచి…

నేను ఒక అలవాటు మార్చుకున్నాను. హెడ్‌లైన్ చూసే ముందు… URL చూస్తాను. మీరు కూడా అదే చేయండి. ఎందుకంటే… ఇప్పుడు స్కామర్లు మీ బ్యాంక్ OTPని దొంగిలించడానికి మాత్రమే ప్రయత్నించడం లేదు. మీ ఆలోచనను ప్రభావితం చేసి… మీ నమ్మకాన్ని దోచుకోవడానికి ప్రయత్నిస్తున్నారు.

ముందు… మీ ఆసక్తిని పట్టుకుంటారు. తర్వాత…మీ నమ్మకాన్ని గెలుస్తారు.చివరికి…మీ డబ్బు, మీ ఆరోగ్యం, మీ వ్యక్తిగత సమాచారాన్ని లక్ష్యంగా చేసుకుంటారు.

అందుకే గుర్తుంచుకోండి…

డిజిటల్ యుగంలో స్కామర్ల లాభాల వెనుక ఉన్న అసలు రహస్యం మన పాస్‌వర్డ్ లేదా OTP కాదు… మనల్ని నమ్మించే వారి మాయాజాలమే!

వారి నకిలీ కథల వలలో పడకుండా మనల్ని మనం కాపాడుకోవడం… ఇప్పుడు ప్రతి కుటుంబం నేర్చుకోవాల్సిన కొత్త డిజిటల్ నైపుణ్యం.