భారత్‌ విమానాల్లో ఈ పవర్ బ్యాంక్‌పై నిషేధం.. ప్రయాణానికి ముందు చెక్ చేసుకోండి!!

విమాన ప్రయాణానికి ముందు ను బ్యాగులో పెట్టుకుంటున్నారా? అయితే ఒక్కసారి దాని మోడల్ నంబర్‌ను చెక్ చేసుకోండి. ఎందుకంటే, విమానంలో పవర్ బ్యాంక్‌కు సంబంధించిన మంటల ఘటన తర్వాత భారత విమానయాన నియంత్రణ సంస్థ డీజీసీఏ (DGCA) ఒక నిర్దిష్ట మోడల్‌పై నిషేధం విధించింది. తెలియకుండానే ఆ పవర్ బ్యాంక్‌ను విమానంలోకి తీసుకెళ్తే ఇబ్బందులు ఎదురయ్యే అవకాశం ఉంది.

అసలు ఏం జరిగింది?

ఢిల్లీ నుంచి చెన్నైకి వెళ్తున్న ఇండిగో విమానంలో ఆదివారం పవర్ బ్యాంక్‌కు సంబంధించిన మంటల ఘటన చోటుచేసుకుంది. పరిస్థితిని దృష్టిలో ఉంచుకుని విమానాన్ని హైదరాబాద్‌కు మళ్లించారు. ఈ ఘటనను తీవ్రంగా పరిగణించిన డీజీసీఏ.. MOBIKINS MK-PB-04 మోడల్ పవర్ బ్యాంక్‌ను భారత్‌లో నడిచే విమానాల్లో తీసుకెళ్లడంపై నిషేధం విధించింది.

డీజీసీఏ చీఫ్ వీర్ విక్రమ్ యాదవ్ ఆదేశాల మేరకు, ప్రయాణికులు ఈ మోడల్‌ను విమానాల్లోకి తీసుకురాకుండా చూడాలని, విమానయాన సంస్థలు కూడా ఈ పరికరాన్ని కార్గో రూపంలో రవాణా చేయకుండా చర్యలు తీసుకోవాలని ఆదేశించారు. ఈ పవర్ బ్యాంక్‌ను గుర్తించడం, ప్రయాణికులకు ముందుగానే హెచ్చరికలు జారీ చేయడం వంటి చర్యలు చేపట్టాలని సూచించారు.

మీ పవర్ బ్యాంక్‌పై నిషేధం ఉందా? ఈ నంబర్ చూడండి!

ఇక్కడ ముఖ్యంగా గుర్తుంచుకోవాల్సిన విషయం ఒకటుంది. డీజీసీఏ అన్ని పవర్ బ్యాంకులపై నిషేధం విధించలేదు. MOBIKINS MK-PB-04 మోడల్‌పైనే ఈ ఆంక్షలు వర్తిస్తాయి.

అందువల్ల ప్రయాణానికి ముందు మీ పవర్ బ్యాంక్‌పై ఉన్న బ్రాండ్, మోడల్ నంబర్‌ను పరిశీలించండి. ఈ మోడల్‌కు చెందిన పరికరం మీ వద్ద ఉంటే విమానంలో తీసుకెళ్లవద్దు. ఇతర మోడళ్ల విషయంలోనూ సంబంధిత విమానయాన సంస్థ నిబంధనలను తప్పనిసరిగా పాటించాలి.

విమానంలో పవర్ బ్యాంక్ వాడొచ్చా? ఈ నిబంధనలు తెలుసా?

పవర్ బ్యాంక్‌ను వెంట తీసుకెళ్లడం, విమానంలో దాన్ని ఉపయోగించడం రెండూ వేర్వేరు విషయాలు. డీజీసీఏ భద్రతా మార్గదర్శకాల ప్రకారం, పవర్ బ్యాంకులు, విడిగా తీసుకెళ్లే బ్యాటరీలను హ్యాండ్ బ్యాగేజీలోనే ఉంచాలి. ఓవర్‌హెడ్ కంపార్ట్‌మెంట్లలో నిల్వ చేయకూడదు.

అంతేకాదు, విమాన ప్రయాణ సమయంలో పవర్ బ్యాంక్‌తో మొబైల్ ఫోన్ లేదా ఇతర ఎలక్ట్రానిక్ పరికరాలను ఛార్జ్ చేయడంపై కూడా ఆంక్షలు ఉన్నాయి. విమానంలోని సీటు వద్ద ఉండే పవర్ అవుట్‌లెట్‌ను ఉపయోగించి పవర్ బ్యాంక్‌ను ఛార్జ్ చేయడానికి కూడా అనుమతి లేదు.

పవర్ బ్యాంక్ వేడెక్కితే నిర్లక్ష్యం చేయొద్దు!

లిథియం-అయాన్ బ్యాటరీలు మన ఫోన్లు, పవర్ బ్యాంకులు, ఇతర ఎలక్ట్రానిక్ పరికరాల్లో విస్తృతంగా ఉపయోగిస్తారు. అయితే బ్యాటరీ దెబ్బతిన్నా, లోపభూయిష్టంగా ఉన్నా లేదా సరిగ్గా నిర్వహించకపోయినా మంటలు చెలరేగే ప్రమాదం ఉంటుంది. విమానంలో పొగ వ్యాపించడం, మంటలను అదుపు చేయడం వంటి సమస్యలు మరింత తీవ్రమవుతాయి.

ప్రయాణ సమయంలో మీ ఫోన్ లేదా ఇతర పరికరం అసాధారణంగా వేడెక్కినా, పొగ వచ్చినా, వింత వాసన వెలువడినా వెంటనే క్యాబిన్ సిబ్బందికి సమాచారం ఇవ్వాలి. బ్యాటరీకి సంబంధించిన సమస్యను మీరే పరిష్కరించడానికి ప్రయత్నించకుండా సిబ్బంది సూచనలు పాటించాలి.

ప్రయాణికులు ఏం చేయాలి?

విమాన టికెట్ బుక్ చేసుకున్నవారు, ముఖ్యంగా తరచూ విమానాల్లో ప్రయాణించేవారు, తమ పవర్ బ్యాంక్ మోడల్ నంబర్‌ను ముందుగానే తనిఖీ చేసుకోవాలి. విమానయాన సంస్థల తాజా బ్యాగేజీ నిబంధనలను కూడా తెలుసుకోవాలి.

ఒక చిన్న పవర్ బ్యాంక్ కారణంగా విమాన ప్రయాణ భద్రతకు ముప్పు ఏర్పడవచ్చని ఈ ఘటన మరోసారి గుర్తుచేస్తోంది. మీ బ్యాగులో ఉన్న పవర్ బ్యాంక్ సురక్షితమైనదేనా? ప్రయాణానికి ముందు ఈ ఒక్కసారి చెక్ చేసుకోవడం మంచిది.

—సూర్య ప్రకాష్ జోశ్యుల