Sabarimala: శబరిమల మహిళల ప్రవేశంపై కేరళ సర్కార్ యూటర్న్
- Published By: Phanindra
- March 15, 2026 / 10:00 AM IST
చారిత్రాత్మక శబరిమల (Sabarimala) అయ్యప్ప స్వామి ఆలయంలోకి అన్ని వయసుల మహిళల ప్రవేశంపై కేరళలోని అధికార లెఫ్ట్ డెమోక్రటిక్ ఫ్రంట్ (LDF) ప్రభుత్వం అనూహ్య నిర్ణయం తీసుకుంది. గతంలో తాను అనుసరించిన విధానానికి పూర్తి భిన్నంగా వ్యవహరిస్తూ, ఈ సున్నితమైన అంశంపై యూ టర్న్ తీసుకుంది. శబరిమల ఆలయ సంప్రదాయాలను, అనాదిగా వస్తున్న ఆచార వ్యవహారాలను తప్పనిసరిగా రక్షించాల్సిన అవసరం ఉందని స్పష్టం చేస్తూ.. ఇకపై ఆచారాలకే పెద్దపీట వేయాలని పినరయి విజయన్ సర్కార్ నిర్ణయించింది.
ఈ కీలక పరిణామంపై కేరళ రాష్ట్ర కేబినెట్ ప్రత్యేకంగా సమావేశమై సుదీర్ఘంగా చర్చించింది. ఆలయ (Sabarimala) ఆచారాలను కాపాడాలంటూ ట్రావెన్కోర్ దేవస్థానం బోర్డు (TDB) తీసుకున్న నిర్ణయానికి మంత్రివర్గం అధికారికంగా ఆమోదముద్ర వేసింది. తమ మారిన వైఖరిని, సంప్రదాయాల పట్ల తమకున్న తాజా మద్దతును అత్యున్నత న్యాయస్థానమైన సుప్రీంకోర్టుకు సైతం అధికారికంగా అఫిడవిట్ రూపంలో తెలియజేయాలని కేరళ ప్రభుత్వం తీర్మానించింది.
గతంలో శబరిమలలోకి (Sabarimala) మహిళల ప్రవేశాన్ని అనుమతిస్తూ సుప్రీంకోర్టు ఇచ్చిన తీర్పును ఇదే ఎల్డీఎఫ్ ప్రభుత్వం బలంగా సమర్థించిన విషయం తెలిసిందే. ఆ తీర్పును అమలు చేసే క్రమంలో అప్పట్లో అయ్యప్ప భక్తుల నుంచి తీవ్ర స్థాయి వ్యతిరేకత, రాష్ట్రవ్యాప్త ఆందోళనలు వ్యక్తమైనప్పటికీ ప్రభుత్వం వెనక్కి తగ్గలేదు. కానీ, ఇప్పుడు అనూహ్యంగా రూటు మార్చి భక్తుల మనోభావాలకు, ఆలయ నియమాలకు అనుకూలంగా నిలబడటం సర్వత్రా ఆసక్తి రేకెత్తిస్తోంది.
ఎన్నికల వ్యూహమేనా?
ప్రభుత్వ తాజా నిర్ణయం వెనుక బలమైన రాజకీయ కారణాలు ఉన్నాయని రాజకీయ విశ్లేషకులు స్పష్టం చేస్తున్నారు. రాష్ట్రంలో త్వరలో జరగనున్న అసెంబ్లీ ఎన్నికలను దృష్టిలో ఉంచుకునే ఎల్డీఎఫ్ సర్కార్ ఈ ఎత్తుగడ (Sabarimala) వేసినట్లు తెలుస్తోంది. గతంలో మహిళల ప్రవేశాన్ని సమర్థించడం వల్ల మెజారిటీ భక్తుల మద్దతు కోల్పోయామన్న అంచనాతో ఉన్న అధికార పార్టీ.. రాబోయే ఎన్నికల్లో ఆ డ్యామేజ్ను కంట్రోల్ చేసుకోవడానికే ఈ వ్యూహాత్మక ‘యూ టర్న్’ తీసుకుందని పొలిటికల్ సర్కిల్స్లో బలంగా వినిపిస్తోంది. ఏది ఏమైనా, ప్రభుత్వ తాజా నిర్ణయం శబరిమల (Sabarimala) చరిత్రలో మరో కీలక మలుపు కానుంది.
