కేబినెట్ విస్తరణ మళ్లీ తెరపైకి..!

తెలంగాణలో కాంగ్రెస్ ప్రభుత్వం అధికారంలోకి వచ్చి రెండున్నరేళ్లు గడుస్తున్నా, ఇప్పటికీ పూర్తిస్థాయి మంత్రివర్గ విస్తరణ కొలిక్కి రాలేదు. ప్రజా పాలన అందిస్తున్నామని చెబుతున్నప్పటికీ, మంత్రివర్గంలో ఇంకా మూడు ఖాళీలు ఉండటం, కీలక శాఖలపై పూర్తిస్థాయి మంత్రి పర్యవేక్షణ కొరవడటం పాలనపై ప్రభావం చూపుతోందన్న విమర్శలున్నాయి. తాజాగా మంత్రి కొండా సురేఖ బర్తరఫ్ తో ఈ ఖాళీల సంఖ్య పెరగడం లేదా సమీకరణాలు మారడం ఖాయమనే సంకేతాలు వెలువడుతున్నాయి. దీంతో మరోసారి కేబినెట్ విస్తరణపై ఊహాగానాలు ఊపందుకున్నాయి.

మంత్రివర్గంలో చోటు దక్కించుకోవడానికి ఆశావహులైన సీనియర్ ఎమ్మెల్యేలు, యువ నాయకులు తీవ్ర ప్రయత్నాలు సాగిస్తున్నారు. ఢిల్లీ స్థాయి నుంచి రాష్ట్ర స్థాయి వరకు పైరవీలు ఊపందుకున్నాయి. అయితే, కేబినెట్ విస్తరణపై ప్రతిసారీ ముహూర్తాలు ఖరారవుతున్నాయంటూ వస్తున్న వార్తలు ఆశావహులను అయోమయానికి గురిచేస్తున్నాయి. దసరా నాటికి ఈ విస్తరణ ఉండే అవకాశం ఉందంటూ పార్టీ వర్గాల్లో ఇప్పుడు మరోసారి జోరుగా ప్రచారం జరుగుతోంది. అయితే కాంగ్రెస్ హైకమాండ్ ఎప్పుడు ఏ నిర్ణయం తీసుకుంటుందో అంచనా వేయడం కష్టమనే అభిప్రాయం వ్యక్తమవుతోంది. విస్తరణ జరిగే వరకు ఏ ఒక్కరు కూడా స్పష్టతనివ్వలేని పరిస్థితి నెలకొంది.

ఈసారి జరిగే ప్రక్రియ కేవలం ఖాళీల భర్తీకి పరిమితం కాదని, ఏకంగా కేబినెట్ పునర్వ్యవస్థీకరణ జరిగే అవకాశం ఉందనే అంచనాలు గట్టిగా వినిపిస్తున్నాయి. ప్రభుత్వ పనితీరు, జిల్లాల వారీగా రాజకీయ సమీకరణాలు, సామాజిక వర్గాల ప్రాతినిధ్యం ఆధారంగా కొంతమంది మంత్రులను తప్పించే అవకాశం ఉందనే ప్రచారం జరుగుతోంది. అలాగే, కొద్దికాలంగా ఆశగా ఎదురుచూస్తున్న అర్హులైన నాయకులకు అవకాశం కల్పించడం, ఇప్పటికే ఉన్న మంత్రుల శాఖల్లో పెద్ద ఎత్తున మార్పులు చేర్పులు చేయడం వంటి భారీ ప్రక్షాళనకు హైకమాండ్ సిద్ధమవుతున్నట్లు తెలుస్తోంది.

తెలంగాణలో ఏ పార్టీ అధికారంలో ఉన్నా సామాజిక వర్గాల సమతుల్యత చాలా కీలకం. ముఖ్యంగా ఉద్యమ కాలం నుంచి పార్టీ వెంట నడిచిన వారికి, అసెంబ్లీ ఎన్నికల్లో గెలుపునకు కృషి చేసిన వివిధ వర్గాలకు సముచిత స్థానం కల్పించడం కాంగ్రెస్ అధిష్టానానికి పెను సవాల్‌గా మారుతోంది. ఉమ్మడి జిల్లాల వారీగా ప్రాతినిధ్యం లేని ప్రాంతాలకు మంత్రివర్గంలో చోటు కల్పించాలనే డిమాండ్లు బలంగా ఉన్నాయి. ఈ నేపథ్యంలో అసంతృప్తులను చల్లార్చడం, పార్టీలో అసమ్మతి రాగాలు వినిపించకుండా అందరినీ సమన్వయం చేయడం సీఎం రేవంత్ రెడ్డితో పాటు అధిష్టానం ముందున్న ప్రధాన కర్తవ్యం. మరి హైకమాండ్ నిర్ణయాలు మంత్రివర్గ రూపురేఖలను ఏ విధంగా మారుస్తాయో, ఎవరిని అదృష్టం వరిస్తుందో వేచి చూడాలి.