తెలంగాణ కాంగ్రెస్లో ‘సర్జికల్ స్ట్రైక్’కు రంగం సిద్ధం?
- Published By: Vasishta
- August 30, 2026 / 03:45 PM IST
తెలంగాణలో కాంగ్రెస్ ప్రభుత్వం అధికారంలోకి వచ్చి రెండున్నరేళ్లు పూర్తయ్యాయి. అధికార పార్టీలో అంతర్గత రాజకీయ సమీకరణాలు శరవేగంగా మారుతున్నాయి. అటు పరిపాలనలో దూకుడు పెంచడం, ఇటు పార్టీలో పెరుగుతున్న అసంతృప్తులు, వివాదాలకు చెక్ పెట్టే లక్ష్యంతో మంత్రివర్గ పునర్వ్యవస్థీకరణ అంశం అత్యంత ప్రాధాన్యతను సంతరించుకుంది. మంత్రి కొండా సురేఖ వ్యవహారంలో టీపీసీసీ క్రమశిక్షణ కమిటీ ఇచ్చిన నివేదిక ఇప్పటికే ఏఐసీసీ గడప తొక్కింది. దీనికితోడు కేబినెట్ ప్రక్షాళనపై కీలక నిర్ణయాలు తీసుకునేందుకు కాంగ్రెస్ అధిష్ఠానం రంగం సిద్ధం చేసింది.
ఈ క్రమంలోనే సెప్టెంబరు 3న ముఖ్యమంత్రి రేవంత్రెడ్డి, ఉప ముఖ్యమంత్రి భట్టి విక్రమార్క, టీపీసీసీ చీఫ్ మహేశ్కుమార్గౌడ్లను ఢిల్లీకి రావాల్సిందిగా అధిష్ఠానం నుంచి పిలుపు వచ్చింది. విదేశీ పర్యటన ముగించుకుని సెప్టెంబరు 1న ఢిల్లీ చేరుకోనున్న ఏఐసీసీ సంస్థాగత వ్యవహారాల ఇన్చార్జి కేసీ వేణుగోపాల్.. పార్టీ అగ్రనేతలతో కలిసి ఈ అంశాలపై సమగ్రంగా చర్చించనున్నారు. కేవలం కొండా సురేఖ వ్యవహారానికే పరిమితం కాకుండా, మొత్తంగా ప్రభుత్వం-పార్టీ సమన్వయం, కేబినెట్ మార్పుచేర్పులపైనే ఈ భేటీ ప్రధానంగా సాగనుందన్న విశ్లేషణలు వినిపిస్తున్నాయి.
కొండా సురేఖ కుమార్తె సుస్మిత చేసిన వ్యాఖ్యలపై సీఎం రేవంత్రెడ్డి తీవ్ర అసంతృప్తితో ఉన్నట్లు తెలుస్తోంది. “రాత్రింబవళ్లూ కష్టపడి పార్టీని అధికారంలోకి తీసుకొచ్చాం. గౌరవించి మంత్రి పదవులు ఇస్తే.. ఇంట్లో ఉండే పిల్లలతో ఇష్టం వచ్చినట్లు తిట్టిస్తారా? దేనికైనా హద్దు ఉంటుంది కదా!” అంటూ సీఎం తన సన్నిహితుల వద్ద ఆవేదన, ఆగ్రహం వ్యక్తం చేయడం పరిస్థితుల తీవ్రతకు అద్దం పడుతోంది. రాఖీ పండుగ మరుసటి రోజే సీఎం ఈ రీతిలో స్పందించడం పార్టీ వర్గాల్లో పెను ప్రకంపనలు సృష్టిస్తోంది. నిబంధనలు అతిక్రమిస్తే ఎంతటి వారినైనా ఉపేక్షించేది లేదన్న సంకేతాన్ని ఇచ్చేందుకు అధిష్ఠానం సైతం కఠిన నిర్ణయాల దిశగానే మొగ్గు చూపుతున్నట్లు సమాచారం.
ఒకవేళ కొండా సురేఖను మంత్రివర్గం నుంచి తప్పిస్తే, ఆ స్థానాన్ని ఎవరితో భర్తీ చేయాలనే దానిపై ఇప్పటికే కసరత్తు ప్రారంభమైంది. పునర్వ్యవస్థీకరణలో భాగంగా టీపీసీసీ చీఫ్ మహేశ్కుమార్గౌడ్ను కేబినెట్లోకి తీసుకుంటారనే ప్రచారం బలంగా సాగుతోంది. అదే జరిగితే, పీసీసీ పగ్గాలను బీసీ లేదా ఎస్టీ వర్గానికి చెందిన నేతకు అప్పగించే దిశగా చర్చలు నడుస్తున్నాయి. అలాగే, పనితీరు సరిగా లేని మరో మంత్రిని కూడా తొలగించే అవకాశాలున్నాయని, పలువురు మంత్రుల శాఖల్లోనూ భారీ మార్పులు ఉంటాయని సమాచారం.
శాసనమండలి చైర్మన్ గుత్తా సుఖేందర్రెడ్డి చేసిన తాజా వ్యాఖ్యలు ఈ పరిణామాలకు మరింత ఆజ్యం పోశాయి. “రెండున్నరేళ్లు పూర్తయిన తరుణంలో కేబినెట్లో మార్పులు, షిఫ్టింగ్లు సహజం. గ్రూపు తగాదాలు తగ్గించుకోవాలి, పార్టీ లైన్ దాటిన వారిపై వేటు వేయకపోతే నష్టం తప్పదు” అని ఆయన స్పష్టం చేశారు. సీఎం రేవంత్రెడ్డికి పూర్తి స్వేచ్ఛ ఇవ్వాలని, పాలనలో ఆటంకాలు సృష్టించవద్దని గుత్తా చెప్పడం ప్రభుత్వంలో నాయకత్వ బలాన్ని పెంచే దిశగా వ్యూహాత్మక సంకేతంగా కనిపిస్తోంది.
మొత్తంగా చూస్తే.. సెప్టెంబరు 3న ఢిల్లీలో జరగబోయే కీలక భేటీ తెలంగాణ కాంగ్రెస్ రాజకీయ భవితవ్యాన్ని, ప్రభుత్వ రూపురేఖలను సమూలంగా మార్చే అవకాశాలు పుష్కలంగా ఉన్నాయి. ఇది కేవలం క్రమశిక్షణా చర్యగా మిగులుతుందా లేక సమగ్ర కేబినెట్ ప్రక్షాళన దిశగా సాగుతుందా అన్నది వేచి చూడాలి.
