న్యూయార్క్లో మోహన్ భగవత్ కార్యక్రమం.. విమర్శకులపై అమెరికన్ గాయని మేరీ మిల్బెన్ ఆగ్రహం!
- Published By: Vishal
- August 29, 2026 / 01:02 PM IST
అమెరికాలోని ప్రతిష్టాత్మక మాడిసన్ స్క్వేర్ గార్డెన్ (MSG) వేదికగా రాష్ట్రీయ స్వయంసేవక్ సంఘ్ (RSS) చీఫ్ మోహన్ భగవత్ పాల్గొననున్న కార్యక్రమాన్ని వ్యతిరేకిస్తున్న వారిపై అమెరికన్ గాయని, నటి మేరీ మిల్బెన్ తీవ్రంగా మండిపడ్డారు. ముఖ్యంగా ఈ కార్యక్రమాన్ని వ్యతిరేకిస్తున్న న్యూయార్క్ నగర మేయర్ జోహ్రాన్ మమ్దానీని ఆమె తప్పుపట్టారు. ప్రధాని నరేంద్ర మోదీ , భారతీయ జనతా పార్టీ (బీజేపీ) పట్ల ఉన్న కక్షతోనే భగవత్ ప్రత్యర్థులు ఈ కార్యక్రమాన్ని వ్యతిరేకిస్తున్నారని ఈ ఆఫ్రికన్-అమెరికన్ సింగర్ ఆరోపించారు.
మిల్బెన్ విమర్శలు…
“మమ్దానీ , ఈ సోషలిస్ట్ పిచ్చివాళ్లందరూ ప్రధాని నరేంద్ర మోడీని, బీజేపీని వ్యతిరేకిస్తున్నందుకే మోహన్ భగవత్ పాల్గొనే మాడిసన్ స్క్వేర్ గార్డెన్ కార్యక్రమాన్ని వ్యతిరేకిస్తున్నారు” అని మిల్బెన్ సోషల్ మీడియా వేదికగా పేర్కొన్నారు. ఈ వ్యతిరేకత వెనుక ఉన్న వారి రాజకీయ భావజాలాన్ని తప్పుపడుతూ.. వామపక్ష భావజాలం అనుసరించే వారికి పెట్టుబడిదారీ విధానం అర్థం కాదని, మాడిసన్ స్క్వేర్ గార్డెన్ సోషలిస్ట్ వాదనలకు తలవంచదని, కేవలం పెట్టుబడిదారీ విధానానికే లొంగుతుందని అన్నారు. మీరు కూడా పెట్టుబడిదారులుగా మారి, తగినంత డబ్బు సమీకరించి, మాడిసన్ స్క్వేర్ గార్డెన్ను అద్దెకు తీసుకుని మోదీ వ్యతిరేక భావాలతో సొంతంగా ఒక ర్యాలీ నిర్వహించుకోండి అంటూ న్యూయార్క్ మేయర్కు , సోషలిస్టుల బృందానికి ఆమె చురకలంటించారు.
అయితే, ఈ సమావేశానికి ‘సార్వత్రిక ఏకత్వ వేడుక'(సార్వత్రిక ఏకత్వం) అని పేరు పెట్టడం తనకు నచ్చిందని, ఈ వేదికపై భారత్లో మత స్వేచ్ఛ వంటి అంశాలపై అర్థవంతమైన చర్చ జరుగుతుందని ఆశిస్తున్నట్లు ఆమె అభిప్రాయపడ్డారు. 2023లో వాషింగ్టన్లోని రొనాల్డ్ రీగన్ భవనంలో ప్రధాని మోదీ ప్రసంగానికి ముందు భారత జాతీయ గీతాన్ని ఆలపించిన మేరీ మిల్బెన్, ‘జన గణ మన’, ‘ఓం జై జగదీషే హరే’ వంటి గీతాలతో భారత్లో ఆదరణ పొందారు.
న్యూయార్క్లో ఆర్ఎస్ఎస్ కార్యక్రమం…
ఆర్ఎస్ఎస్ అధిపతి మోహన్ భగవత్ శనివారం మాన్హట్టన్లోని మాడిసన్ స్క్వేర్ గార్డెన్లో జరగనున్న ఈ కార్యక్రమంలో ప్రసంగించారు. ఈ సమావేశాన్ని హిందూ అమెరికన్ సమాజాన్ని ఏకతాటిపైకి తెచ్చే ‘సార్వత్రిక ఏకత్వ వేడుక’గా నిర్వాహకులు అభివర్ణించారు. అయితే, భగవత్ హాజరు , ఆర్ఎస్ఎస్ చరిత్రను ప్రస్తావిస్తూ పలు స్థానిక సంస్థలు ఈ కార్యక్రమాన్ని తీవ్రంగా వ్యతిరేకించాయి. న్యూయార్క్ నగర మేయర్ జోహ్రాన్ మమ్దానీ స్పందిస్తూ, తాను ఈ ర్యాలీకి మద్దతు ఇవ్వనని, అయితే ఒక ప్రైవేట్ కార్యక్రమాన్ని రద్దు చేసే అధికారం తనకు ఉందో లేదో తెలియదని అన్నారు.
