కొండా సురేఖ తదుపరి రాజకీయ అడుగు ఎటువైపు?
- Published By: Vasishta
- August 25, 2026 / 10:45 AM IST
తెలంగాణ రాజకీయాల్లో మరో కీలక పరిణామం ఉత్కంఠ రేపుతోంది. కాంగ్రెస్ హైకమాండ్, రాష్ట్ర నాయకత్వంతో విభేదాల నేపథ్యంలో మంత్రి కొండా సురేఖను కేబినెట్ నుంచి తొలగించేందుకు రంగం సిద్ధమైనట్లు రాజకీయ వర్గాల్లో తీవ్ర చర్చ జరుగుతోంది. ఇప్పటికే కొనసాగుతున్న వివాదాల నడుమ, సురేఖ స్వచ్ఛందంగా మంత్రి పదవికి రాజీనామా చేసే ఆలోచనలో లేరని, ప్రభుత్వమే ఆమెను మంత్రివర్గం నుంచి బర్తరఫ్ చేసే అవకాశాలు బలంగా కనిపిస్తున్నాయని తెలుస్తోంది. ఒకవేళ కేబినెట్ నుంచి ఉద్వాసన పలికితే, కొండా సురేఖ రాజకీయ భవిష్యత్తు ఎలా ఉండబోతోంది? ఆమె తదుపరి అడుగు ఎటువైపు పడనుంది? అనే ప్రశ్నలు రాష్ట్ర రాజకీయాల్లో హాట్ టాపిక్గా మారాయి.
కొండా సురేఖ ఎమ్మెల్యే పదవీ కాలం ఇంకా దాదాపు రెండేళ్ల పాటు మిగిలి ఉంది. ఈ తరుణంలో ఆమె కాంగ్రెస్ పార్టీలోనే ఎమ్మెల్యేగా కొనసాగుతారా లేక ఎమ్మెల్యే పదవికి రాజీనామా చేసి ఇతర పార్టీల వైపు చూస్తారా అన్నది కీలకంగా మారింది. ఒక పార్టీ తరఫున గెలిచిన ఎమ్మెల్యే స్వచ్ఛందంగా మరో పార్టీలో చేరితే రాజ్యాంగంలోని ‘పార్టీ ఫిరాయింపుల నిరోధక చట్టం’ కింద అనర్హత వేటు పడే ప్రమాదం ఉంది. అందువల్ల ఎలాంటి చట్టపరమైన, రాజకీయ చిక్కులు లేకుండా నిర్ణయం తీసుకోవడం సురేఖకు కత్తిమీద సాములా మారింది.
కొండా కుటుంబం తమ రాజకీయ భవిష్యత్తు కోసం ప్రత్యామ్నాయ దారులను వెతుకుతున్నట్లు విస్తృతంగా ప్రచారం జరుగుతోంది. కొండా సురేఖ కుమార్తె జనసేన పార్టీ వైపు ఆసక్తిగా ఉన్నట్లు విశ్వసనీయ వర్గాల సమాచారం. తెలంగాణలో విస్తరణ దిశగా అడుగులు వేస్తున్న జనసేన, బలమైన కేడర్ ఉన్న కొండా కుటుంబానికి వేదికవుతుందా అన్నది చర్చనీయాంశంగా మారింది. మరోవైపు బీజేపీ కూడా కొండా సురేఖ ముందున్న ప్రధాన ప్రత్యామ్నాయాల్లో ఒకటిగా కనిపిస్తోంది. కాంగ్రెస్ను ఢీకొట్టేందుకు బలమైన బీసీ నేతలను చేర్చుకోవాలని చూస్తున్న కాషాయ దళం వైపు సురేఖ దృష్టి సారిస్తారా అన్న ఊహాగానాలు సాగుతున్నాయి.
ఒకవేళ కొండా సురేఖ ఎమ్మెల్యే పదవికి రాజీనామా చేసి కొత్త పార్టీ తరఫున ఉప ఎన్నికకు వెళ్లాల్సి వస్తే అది అత్యంత సవాలుతో కూడుకున్న వ్యవహారం. గతంలో మునుగోడు ఉప ఎన్నికలో కోమటిరెడ్డి రాజగోపాల్ రెడ్డి ఎదుర్కొన్న పరాజయం తెలంగాణ రాజకీయాల్లో కీలక గుణపాఠంగా మారింది. ప్రస్తుత రాజకీయ పరిస్థితుల్లో అధికార పార్టీని కాదని ఉప ఎన్నికకు వెళ్లడం తీవ్రమైన రిస్క్తో కూడుకున్న పని అని రాజకీయ విశ్లేషకులు భావిస్తున్నారు. అందుకే సురేఖ రాజీనామా చేసి ఉప ఎన్నికను ఎదుర్కోవడం కంటే, కాంగ్రెస్లోనే ఉంటూ ఎమ్మెల్యే సీటును కాపాడుకోవడానికే ప్రాధాన్యత ఇచ్చే అవకాశాలు ఉన్నాయనే వార్తలూ వస్తున్నాయి.
మంత్రివర్గం నుంచి తప్పించడం దాదాపు ఖాయమైన ప్రస్తుత పరిస్థితుల్లో, కొండా సురేఖ కాంగ్రెస్లోనే కొనసాగుతారా, ఎమ్మెల్యే పదవికి కట్టుబడి ఉంటూ వేచిచూసే ధోరణి అవలంబిస్తారా, లేక అనర్హత ముప్పును సైతం లెక్కచేయకుండా బీజేపీ లేదా జనసేన గూటికి చేరతారా అన్నది రాబోయే రోజుల్లో తేలనుంది. కొండా దంపతుల రాజకీయ వ్యూహం ఇప్పుడు తెలంగాణ రాజకీయ వర్గాల్లో ఆసక్తికర చర్చకు దారితీస్తోంది.
