తెలంగాణ కాంగ్రెస్‌లో ‘డిఫెన్స్’ సంక్షోభం!

తెలంగాణ రాజకీయాలు మునుపెన్నడూ లేనంత వాడివేడిగా మారాయి. అధికార కాంగ్రెస్, ప్రధాన ప్రతిపక్షం బీఆర్ఎస్ మధ్య సాగుతున్న పోరు ఇప్పుడు తీవ్ర స్థాయికి చేరింది. అధికారం కోల్పోయిన అసహనాన్ని దూకుడుగా మార్చుకున్న గులాబీ దళం, ప్రభుత్వ వైఫల్యాలుగా భావిస్తున్న ప్రతి అంశాన్ని ఆయుధంగా మలచుకుంటోంది. అయితే, ప్రతిపక్షం దూకుడుగా విసురుతున్న రాజకీయ బాణాలను తిప్పికొట్టడంలో కాంగ్రెస్ కమ్యూనికేషన్ యంత్రాంగం తీవ్రంగా తడబడుతోందనే అభిప్రాయం రాజకీయ వర్గాల్లో బలంగా వినిపిస్తోంది.

బీఆర్ఎస్ వర్కింగ్ ప్రెసిడెంట్ కేటీఆర్, మాజీ మంత్రి హరీష్ రావు నేతృత్వంలో ప్రతిపక్షం వ్యూహాత్మక దాడిని కొనసాగిస్తోంది. లగచర్ల వివాదం, మూసీ ప్రక్షాళన వ్యయం, హైడ్రా కూల్చివేతల పరిణామాలు, టెస్సరాక్ట్ భూ కేటాయింపులు, సీఎం కుటుంబ సభ్యుల ప్రమేయంపై ఆరోపణలు… ఇలా ప్రతి అంశాన్ని సోషల్ మీడియా, మీడియా సమావేశాల ద్వారా ప్రజల్లోకి బలంగా తీసుకెళ్తున్నారు. ప్రతిరోజూ ఏదో ఒక వివాదంతో ప్రభుత్వంపై నెగెటివ్ నెరేటివ్‌ను సెట్ చేయడంలో వారు దూకుడు ప్రదర్శిస్తున్నారు.

బీఆర్ఎస్ సంధించే రాజకీయ ఆరోపణలకు సమాధానం ఇచ్చే బాధ్యతను దాదాపుగా మంత్రి దుద్దిళ్ల శ్రీధర్ బాబు ఒక్కరే భుజాన వేసుకున్న పరిస్థితి కనిపిస్తోంది. అయితే, శ్రీధర్ బాబు శైలి అత్యంత హుందాగా, చట్టబద్ధమైన నిబంధనలు, పాలసీ అంశాల చుట్టూ తిరుగుతుంది. ప్రతిపక్షం చేసే మాస్, అగ్రెసివ్ దాడిని ఎదుర్కోవడానికి కేవలం సాంకేతిక వివరణలు మాత్రమే సరిపోవని రాజకీయ పరిశీలకులు విశ్లేషిస్తున్నారు. రాజకీయ ఆరోపణలకు ఘాటైన రాజకీయ భాషలోనే సమాధానం ఇవ్వకపోతే, ప్రతిపక్షాల ప్రచారమే నిజమనే భావన ప్రజల్లో నాటుకుపోయే ప్రమాదం ఉంది.

కాంగ్రెస్ కేబినెట్‌లో బలమైన వాగ్ధాటి ఉన్న నేతలు, ప్రతిపక్షంలో ఉన్నప్పుడు తీవ్రంగా పోరాడిన సీనియర్లు ఉన్నప్పటికీ, ప్రభుత్వంపై ఇంతటి దాడి జరుగుతున్న వేళ వారిలో ఎక్కువమంది ప్రేక్షక పాత్రకే పరిమితమవుతున్నారు. తమ శాఖల వ్యవహారాలు తప్ప, పార్టీ లేదా ప్రభుత్వ రక్షణ కోసం మూకుమ్మడిగా గళం విప్పకపోవడం చర్చనీయాంశంగా మారింది. ఇది పార్టీలోని సమన్వయ లోపమా లేక సీఎం రేవంత్ రెడ్డి స్వయంగా రంగంలోకి దిగే వరకు వేచి చూసే ధోరణా అనేది అర్థం కావడం లేదు.

ప్రతి చిన్న ఆరోపణకూ ముఖ్యమంత్రే స్వయంగా బహిరంగ సభల్లో సమాధానం చెప్పాల్సి రావడం సరైన రాజకీయ వ్యూహం కాదన్నది విశ్లేషకుల మాట. ముఖ్యమంత్రికి రక్షణగా బలమైన ద్వితీయ ప్రత్యామ్నాయ నాయకత్వం, అధికార ప్రతినిధుల బృందం రోజువారీగా కౌంటర్లు ఇవ్వాల్సి ఉంది. మరోవైపు, ఆధునిక యుద్ధక్షేత్రమైన సోషల్ మీడియాలో బీఆర్ఎస్ విస్తృత ప్రచారానికి దీటుగా కాంగ్రెస్ సోషల్ మీడియా వింగ్ వేగంగా, సాక్ష్యాధారాలతో కూడిన కౌంటర్లను అందించడంలో తీవ్రంగా వెనుకబడి ఉంది.

ప్రతిపక్షం నిర్మిస్తున్న రాజకీయ వ్యూహాన్ని తేలిగ్గా తీసుకుంటే అధికార పక్షానికి ఇబ్బందులు తప్పవు. కేవలం కొద్దిమంది మంత్రుల వివరణలకే పరిమితం కాకుండా, దూకుడు స్వభావం ఉన్న నాయకులతో సమర్థవంతమైన ‘కమ్యూనికేషన్ వార్ రూమ్’ను బలోపేతం చేసుకోవాల్సిన అవసరం కాంగ్రెస్‌కు ఉంది. బీఆర్ఎస్ మైండ్ గేమ్‌ను తిప్పికొట్టాలంటే కలెక్టివ్ అటాక్, పదునైన కమ్యూనికేషన్ వ్యూహమే కాంగ్రెస్ ముందున్న తక్షణ కర్తవ్యం.