మాటల్లో ధీమా.. క్షేత్రస్థాయిలో బలహీనత! వైసీపీ ఓటమికి అసలు కారణాలివేనా..

ఆంధ్రప్రదేశ్ రాజకీయాల్లో వచ్చే ఎన్నికల నాటికి అధికారంలోకి వస్తామని ధీమా వ్యక్తం చేస్తున్న వైఎస్సార్ కాంగ్రెస్ పార్టీకి (YSRCP) తాజా స్థానిక సంస్థల ఎన్నికల ఫలితాలు కొత్త సవాలుగా మారాయి. మునిసిపల్ ఎన్నికల్లో తెలుగుదేశం పార్టీ నేతృత్వంలోని కూటమి ఘన విజయాన్ని అందుకోగా, పరిషత్ ఎన్నికల్లోనూ ఇదే ప్రభావం కనిపిస్తోంది. 40 శాతం ఓటు బ్యాంకు తమకు ఉందని, రాష్ట్రంలో బలమైన ప్రతిపక్షంగా ఉన్నామని వైసీపీ నేతలు చేస్తున్న ప్రకటనలకు క్షేత్రస్థాయి ఫలితాలు భిన్నంగా ఉండటం రాజకీయంగా చర్చనీయాంశమైంది. 2029లో అధికారంలోకి వస్తామన్న లక్ష్యం నెరవేరాలంటే ప్రకటనలతో పాటు పార్టీ నిర్మాణం, నాయకుల పనితీరు, కేడర్ బలం కూడా ముఖ్యమని ఈ ఎన్నికలు స్పష్టం చేస్తున్నాయి.

ఎన్నికల్లో ఓటమికి అధికార కూటమి అక్రమాలకు పాల్పడిందని, రిగ్గింగ్ చేసిందని వైసీపీ విమర్శలు చేసే అవకాశం ఉంది. అయితే రాష్ట్రవ్యాప్తంగా వచ్చిన ఫలితాలను పరిశీలిస్తే అన్ని ప్రాంతాల్లోనూ ఒకే పరిస్థితి లేదని తెలుస్తోంది. కొన్ని చోట్ల వైసీపీ అభ్యర్థులు విజయాలు సాధించడం, మరికొన్ని ప్రాంతాల్లో గట్టిపోటీ ఇవ్వడం వెనుక స్థానిక నాయకుల కృషి కీలకంగా కనిపిస్తోంది. రాయలసీమలో నంద్యాల (Nandyal) మునిసిపాలిటీని వైసీపీ గెలుచుకోవడంలో యువ నాయకుడు బైరెడ్డి సిద్ధార్థ్ రెడ్డి (Byreddy Siddharth Reddy) పాత్ర ఉందనే అభిప్రాయం వ్యక్తమవుతోంది. బేతంచెర్లలో పార్టీ ఆధిపత్యాన్ని నిలబెట్టుకోవడంతో పాటు డోన్‌లో పోరాటం చేయడంలో మాజీ మంత్రి బుగ్గన రాజేంద్రనాథ్ రెడ్డి (Buggana Rajendranath Reddy) కృషి ఉందని చెబుతున్నారు.

అలాగే అనంతపురం (Anantapur) కార్పొరేషన్‌ను వైసీపీ దక్కించుకోవడం వెనుక మాజీ ఎంపీ, పార్టీ జిల్లా అధ్యక్షుడు అనంత వెంకటరామిరెడ్డి (Anantha Venkatarami Reddy) కీలకంగా వ్యవహరించారని రాజకీయ వర్గాల్లో చర్చ జరుగుతోంది. ఈ ప్రాంతాల్లో నాయకులు ఎన్నికలను ప్రతిష్టాత్మకంగా తీసుకుని పనిచేయడంతో పార్టీకి కొన్ని విజయాలు దక్కాయి. అయితే ఇదే స్థాయిలో రాష్ట్రవ్యాప్తంగా నాయకులు పనిచేయలేకపోవడం వైసీపీకి నష్టంగా మారిందనే విశ్లేషణలు వినిపిస్తున్నాయి.

పార్టీలో నాయకత్వం, క్షేత్రస్థాయి కార్యకర్తల మధ్య సమన్వయం తగ్గిందన్న విమర్శలు కూడా ఉన్నాయి. స్థానిక ఎన్నికలపై మొదటి నుంచీ కొందరు నాయకులు ఆసక్తి చూపలేదని, ఎన్నికలు ఎందుకనే ధోరణితో వ్యవహరించారని ప్రచారం జరిగింది. అధిష్ఠానం మాత్రం అభ్యర్థులను బరిలోకి దించాలని నిర్ణయించడంతో అనేక ప్రాంతాల్లో నామినేషన్లు దాఖలయ్యాయి. కానీ అభ్యర్థుల సామర్థ్యం, ఆర్థిక స్థితిగతులు, స్థానికంగా వారికి ఉన్న బలం వంటి అంశాలను పూర్తిస్థాయిలో పరిశీలించలేదనే ఆరోపణలు వినిపిస్తున్నాయి. పోటీలో నిలిచిన అభ్యర్థులకు అవసరమైన రాజకీయ, ఆర్థిక సహకారం అందించడంలోనూ పార్టీ వెనుకబడిందనే అభిప్రాయాలు ఉన్నాయి.

మునిసిపల్ ఎన్నికల ఫలితాలు వెలువడిన తర్వాత కూటమి బలం మరింత స్పష్టమైంది. ఈ ప్రభావం పరిషత్ ఎన్నికల్లో వైసీపీ పోటీపై కూడా పడినట్లు కనిపిస్తోంది. అనేక ప్రాంతాల్లో పార్టీ అభ్యర్థులు ఉత్సాహంగా ప్రచారం చేయకపోవడం, నాయకులు పూర్తిస్థాయిలో అందుబాటులో లేకపోవడం కూటమికి అనుకూలంగా మారింది. ఫలితంగా కొన్ని చోట్ల పోటీ ఏకపక్షంగా సాగింది.

ఈ పరిణామాలు వైసీపీ కార్యకర్తల్లోనూ నిరాశను పెంచుతున్నాయని రాజకీయ పరిశీలకులు భావిస్తున్నారు. నాయకులు ఎన్నికల సమయంలో మాత్రమే అభ్యర్థులకు బీ ఫారాలు ఇచ్చి బాధ్యతల నుంచి తప్పుకుంటే పార్టీ బలోపేతం కావడం కష్టమే. ఓటమికి కారణాలను గుర్తించి, నాయకత్వం నుంచి క్షేత్రస్థాయి కార్యకర్తల వరకు సమన్వయాన్ని పెంచుకోవాల్సిన అవసరం ఉంది. స్థానిక ఎన్నికలు ఇచ్చిన ఈ ఫలితాలను వైసీపీ అధిష్ఠానం ఎలా విశ్లేషిస్తుంది? పార్టీని తిరిగి ప్రజల్లోకి తీసుకెళ్లేందుకు ఎలాంటి మార్పులు చేస్తుంది? అన్నది ఇప్పుడు రాష్ట్ర రాజకీయాల్లో ఆసక్తికరంగా మారింది.