ట్రంప్‌ను అడ్డుకునే అసలైన ఆయుధం డబ్బే! డెమొక్రాట్ల కొత్త యుద్ధ వ్యూహం ఇదే?

అమెరికా అధ్యక్షుడిగా డొనాల్డ్ ట్రంప్‌ను ఎదుర్కోవడం అంత సులభం కాదు. ప్రత్యర్థులను లెక్కచేయకుండా నిర్ణయాలు తీసుకోవడం, తన మాటే శాసనంగా మార్చుకోవడం ఆయనకు అలవాటు. కానీ ఇప్పుడు పరిస్థితులు మారుతున్నాయి. అమెరికా మిడ్‌టర్మ్ ఎన్నికలు ట్రంప్‌కు ఊహించని రాజకీయ షాక్ ఇచ్చాయి. కాంగ్రెస్‌పై రిపబ్లికన్ల ఆధిపత్యానికి తెరపడటంతో.. మరో రెండేళ్లు వైట్‌హౌస్‌లో కొనసాగాల్సిన ట్రంప్‌కు కొత్త సవాళ్లు మొదలయ్యాయి. ఇకపై ఆయన తీసుకునే ప్రతి కీలక నిర్ణయానికి డెమొక్రాట్ల నుంచి అడ్డంకులు ఎదురయ్యే పరిస్థితి కనిపిస్తోంది.

అయితే అధ్యక్షుడి అధికారాలను ఉపయోగించుకుని ప్రత్యర్థులను ఎదుర్కోవడం ట్రంప్‌కు కొత్త కాదు. కానీ ఈసారి డెమొక్రాట్లు కూడా వ్యూహం మార్చారు. ట్రంప్‌ను నేరుగా ఢీకొట్టడం కంటే.. ఆయన అధికారాలకు అడ్డుకట్ట వేసే మరో మార్గాన్ని ఎంచుకున్నారు. అధ్యక్షుడిగా ట్రంప్ ఎంతటి నిర్ణయాలు తీసుకున్నా, వాటిని అమలు చేయలేని పరిస్థితి సృష్టించగలరా? అసలు ట్రంప్‌ను కట్టడి చేయడానికి ప్రత్యర్థులు సిద్ధం చేసిన అస్త్రం ఏమిటి?

అధ్యక్షుడి కుర్చీ ట్రంప్‌దే.. ఖజానా తాళాలు మాత్రం కాంగ్రెస్‌వే!

అమెరికా రాజకీయ వ్యవస్థలో అధ్యక్షుడికి విస్తృత అధికారాలు ఉంటాయి. కానీ ప్రభుత్వ ఖర్చుల విషయంలో మాత్రం ఆయన సొంతంగా నిర్ణయాలు తీసుకోలేరు. ఫెడరల్ ప్రభుత్వానికి నిధులు కేటాయించడం, బడ్జెట్‌ను ఆమోదించడం, దేశ రుణ పరిమితిని పెంచడం వంటి కీలక అధికారాలు కాంగ్రెస్ చేతుల్లో ఉంటాయి. అంటే ట్రంప్ ఒక విధానాన్ని ప్రకటించవచ్చు. దాన్ని అమలు చేయాలని అధికారులను ఆదేశించవచ్చు. కానీ అందుకు అవసరమైన నిధులు విడుదల కావాలంటే కాంగ్రెస్ ఆమోదం తప్పనిసరి.

ఇప్పుడు డెమొక్రాట్లకు ఇదే ప్రధాన ఆయుధంగా మారింది. ట్రంప్ ప్రతిపాదించే దేశీయ విధానాలకు, భారీ ప్రభుత్వ ప్రాజెక్టులకు అవసరమైన నిధుల విషయంలో వారు అడ్డంకులు సృష్టించవచ్చు. అధ్యక్షుడి నిర్ణయాలను నేరుగా రద్దు చేయలేకపోయినా.. వాటి అమలుకు అవసరమైన ఆర్థిక వనరులను నియంత్రించడం ద్వారా వైట్‌హౌస్‌పై ఒత్తిడి పెంచవచ్చు.

మాజీ అంతర్జాతీయ ద్రవ్య నిధి (IMF) సలహాదారు జోష్ లిప్స్కీ అభిప్రాయం ప్రకారం.. కాంగ్రెస్‌కు ఉన్న నిధుల కేటాయింపు అధికారాలు అధ్యక్షుడిపై రాజకీయ ఒత్తిడి తీసుకురావడానికి అత్యంత ప్రభావవంతమైన మార్గాల్లో ఒకటి.

ట్రంప్‌కు ఇది కొత్త కాదు.. 2018లోనూ ఇదే జరిగింది!

డెమొక్రాట్ల వ్యూహం ట్రంప్‌కు గతంలోనే పరిచయమైంది. ఆయన మొదటి విడత అధ్యక్ష పాలనలోనూ ఇలాంటి పరిస్థితి ఎదురైంది. 2018లో డెమొక్రాట్లు ప్రతినిధుల సభపై ఆధిపత్యం సాధించారు. దీంతో ట్రంప్ ప్రతిష్టాత్మకంగా భావించిన మెక్సికో సరిహద్దు గోడ నిర్మాణానికి నిధుల కేటాయింపు విషయంలో తీవ్ర ప్రతిష్టంభన ఏర్పడింది.

సరిహద్దు గోడ నిర్మాణం కోసం ట్రంప్ భారీగా నిధులు కోరగా.. డెమొక్రాట్లు అందుకు అంగీకరించలేదు. ఈ వివాదం చివరకు అమెరికా ప్రభుత్వ చరిత్రలోనే సుదీర్ఘమైన షట్‌డౌన్‌లలో ఒకదానికి దారితీసింది. ప్రభుత్వ కార్యకలాపాలు నిలిచిపోయి వేలాది మంది ఉద్యోగులు ఇబ్బందులు ఎదుర్కొన్నారు.

ఇప్పుడు మళ్లీ అలాంటి పరిస్థితులు తలెత్తే అవకాశాలు కనిపిస్తున్నాయి. అయితే ఈసారి ట్రంప్‌కు ఎదురయ్యే సవాళ్లు కేవలం ఒక్క ప్రాజెక్టుకే పరిమితం కాకపోవచ్చు. ఆయన రెండో విడత పాలనలోని కీలక విధానాలన్నింటిపైనా కాంగ్రెస్‌తో పోరు తప్పకపోవచ్చు.

డిసెంబర్ 11.. ట్రంప్‌కు తొలి పరీక్ష!

ట్రంప్ ప్రభుత్వానికి ఎదురుకాబోతున్న తక్షణ సమస్య ఫెడరల్ ప్రభుత్వ నిధుల గడువు. ప్రస్తుతం అమల్లో ఉన్న ప్రభుత్వ నిధుల కేటాయింపుల గడువు డిసెంబర్ 11తో ముగియనుంది. అప్పటిలోగా కొత్త బడ్జెట్ లేదా తాత్కాలిక నిధుల బిల్లుపై నిర్ణయం తీసుకోవాల్సి ఉంటుంది.

అవసరమైన నిధులపై కాంగ్రెస్‌లో ఏకాభిప్రాయం కుదరకపోతే ప్రభుత్వ కార్యకలాపాలు నిలిచిపోయే ప్రమాదం ఉంటుంది. దీనినే ప్రభుత్వ షట్‌డౌన్ అంటారు. అత్యవసర సేవలు మినహా అనేక ప్రభుత్వ విభాగాల కార్యకలాపాలు ప్రభావితమవుతాయి. ఉద్యోగుల జీతాల చెల్లింపుల్లోనూ సమస్యలు తలెత్తవచ్చు.

ప్రస్తుత కాంగ్రెస్ పదవీకాలం ముగిసేలోగా తాత్కాలిక నిధుల బిల్లును ఆమోదించే అవకాశం ఉన్నప్పటికీ.. 2027లో బడ్జెట్ విషయంలో పెద్ద రాజకీయ పోరు తప్పకపోవచ్చని విశ్లేషకులు అంచనా వేస్తున్నారు. ప్రభుత్వ ఖజానా నుంచి ఒక్కో డాలర్ విడుదల కావాలన్నా రాజకీయ బేరసారాలు తప్పని పరిస్థితి ఏర్పడవచ్చు.

డబ్బుతోనే కాదు.. ట్రంప్ నియామకాలకు కూడా అడ్డంకులు!

కాంగ్రెస్ చేతిలో ఉన్న మరో కీలక అధికారం ప్రభుత్వ నియామకాలపై ప్రభావం చూపగలగడం. ట్రంప్ తనకు నచ్చిన వ్యక్తులను కీలక పదవుల్లో నియమించుకోవాలనుకున్నా.. కొన్ని నియామకాలకు సెనేట్ ఆమోదం అవసరం. అక్కడ డెమొక్రాట్లు తమ రాజకీయ బలాన్ని ఉపయోగించి నియామకాలను ఆలస్యం చేయవచ్చు లేదా వ్యతిరేకించవచ్చు.

దీంతో ట్రంప్‌కు మరో సమస్య ఎదురుకానుంది. అధ్యక్షుడిగా ఆయన నిర్ణయాలు తీసుకున్నప్పటికీ, వాటిని అమలు చేసే ప్రభుత్వ యంత్రాంగంలో కీలక పదవులు ఖాళీగా ఉంటే పాలనపై ప్రభావం పడుతుంది. అంటే నిధుల దగ్గరే కాకుండా.. అధికారుల నియామకాల దగ్గర కూడా వైట్‌హౌస్‌కు కాంగ్రెస్‌తో పోరాటం తప్పకపోవచ్చు.

ఇంట్లో అడ్డంకులు పెరిగితే.. విదేశాలపై దూకుడు పెంచుతారా?

దేశీయంగా కాంగ్రెస్ నుంచి ప్రతిఘటన ఎదురవుతున్న నేపథ్యంలో ట్రంప్ విదేశాంగ విధానంపై మరింత దృష్టి పెట్టవచ్చని విశ్లేషకులు భావిస్తున్నారు. తిరిగి ఎన్నిక కావాలన్న ఒత్తిడి లేకపోవడంతో అంతర్జాతీయ వేదికపై తనదైన ముద్ర వేయడానికి ప్రయత్నించవచ్చని అట్లాంటిక్ కౌన్సిల్ యూరప్ సెంటర్ సీనియర్ డైరెక్టర్ జోర్న్ ఫ్లెక్ అభిప్రాయపడ్డారు.

ముఖ్యంగా వాణిజ్య విధానం, దిగుమతి సుంకాలు, అంతర్జాతీయ ఒప్పందాల విషయంలో అధ్యక్షుడికి ఉన్న అధికారాలను ట్రంప్ మరింతగా ఉపయోగించుకోవచ్చు. అయితే కాంగ్రెస్ కూడా ఈ అధికారాలపై తిరిగి నియంత్రణ సాధించేందుకు ప్రయత్నించే అవకాశం ఉంది.

రష్యాతో ట్రంప్ వ్యవహరించే తీరుపైనా కాంగ్రెస్‌లో అభ్యంతరాలు వ్యక్తమయ్యే అవకాశం ఉంది. ఉక్రెయిన్ యుద్ధానికి సంబంధించి మాస్కోతో ఇంధన రంగంలో ఏవైనా ఒప్పందాలు చేసుకోవాలని ట్రంప్ ప్రయత్నిస్తే రాజకీయంగా ఇబ్బందులు ఎదురుకావచ్చు. రష్యాపై ఆంక్షలను సడలించే విషయంలో అమెరికా కాంగ్రెస్‌లో ఇరు పార్టీలకు చెందిన పలువురు నేతలు వ్యతిరేకంగా ఉన్నారు.

మరోవైపు రష్యా నుంచి గ్యాస్ దిగుమతులను 2027 నాటికి పూర్తిగా నిలిపివేయాలన్న యూరోపియన్ యూనియన్ నిర్ణయం కూడా ట్రంప్ దౌత్య ప్రయత్నాలకు పరిమితులు విధించవచ్చు. ఈ నేపథ్యంలో రష్యాతో ఏదైనా రాజీకి ప్రయత్నించినా చట్టపరమైన, రాజకీయపరమైన అడ్డంకులు ఎదురుకావచ్చని అట్లాంటిక్ కౌన్సిల్ వైస్ ప్రెసిడెంట్ లాండన్ డెరెంజ్ హెచ్చరించారు.

ట్రంప్ కుటుంబం, ఎలాన్ మస్క్.. విచారణలకు రంగం సిద్ధం!

ఇక డెమొక్రాట్ల చేతికి కాంగ్రెస్‌లోని కీలక కమిటీల నియంత్రణ వస్తే ట్రంప్‌కు మరో తలనొప్పి మొదలవుతుంది. ప్రతినిధుల సభలో ఓవర్‌సైట్ అండ్ గవర్నమెంట్ రిఫార్మ్ కమిటీకి నాయకత్వం వహించే అవకాశం ఉన్న డెమొక్రాట్ నేత రాబర్ట్ గార్సియా ఇప్పటికే రిపబ్లికన్లకు ‘Lawyer up’ అంటూ హెచ్చరిక జారీ చేశారు. ట్రంప్ ప్రభుత్వంపై పలు అంశాల్లో విచారణలు చేపట్టేందుకు డెమొక్రాట్లు సిద్ధమవుతున్నట్లు సంకేతాలు ఇచ్చారు.

అభిశంసన చేస్తారా?

ట్రంప్‌ను పదవి నుంచి తొలగించడం అంత సులభం కాదు! డెమొక్రాట్ల చేతిలో ఉన్న మరో రాజకీయ అస్త్రం అభిశంసన (Impeachment). ట్రంప్‌పై అభిశంసన ప్రక్రియను ప్రారంభించే అవకాశం ఉన్నప్పటికీ.. ఆయనను అధ్యక్ష పదవి నుంచి తొలగించడం మాత్రం అంత సులభం కాదు.

ట్రంప్ మొదటి విడత పాలనలో రెండుసార్లు అభిశంసన ప్రక్రియను ఎదుర్కొన్నారు. అయితే సెనేట్‌లో అవసరమైన మూడింట రెండొంతుల మద్దతు లభించకపోవడంతో రెండు సందర్భాల్లోనూ ఆయన పదవిలో కొనసాగారు. ఇప్పుడు కూడా సెనేట్‌లో అంతటి మెజారిటీ లేకుండా ఆయనను తొలగించడం సాధ్యం కాదు.

రెండేళ్ల అధికార పోరు.. ట్రంప్‌కు అసలైన సవాలు ఇదే!

ట్రంప్ తన అధికారాలను ఉపయోగించి నిర్ణయాలు తీసుకోవాలనుకుంటారు. డెమొక్రాట్లు మాత్రం బడ్జెట్, నిధుల కేటాయింపు, విచారణలు, నియామకాల ద్వారా ఆయనను ప్రశ్నించవచ్చు.

అధ్యక్షుడి కుర్చీలో ట్రంప్ ఉన్నా.. ప్రభుత్వ ఖజానా తాళాలు ఆయన ఒక్కరి చేతుల్లో లేవు. ఆ తాళాలు ఎప్పుడు తిప్పాలి? ఎప్పుడు తలుపులు మూసేయాలి? అన్నది ఇప్పుడు కాంగ్రెస్ రాజకీయాలపై ఆధారపడి ఉంది.

—సూర్య ప్రకాష్ జోశ్యుల