నర్శీపట్నంలో పద్మావతి విజయఢంకా.. రాజకీయంగా మరింత బలపడిన అయ్యన్న కుటుంబం..

ఉమ్మడి విశాఖపట్నం జిల్లాలో తెలుగుదేశం పార్టీకి బలమైన రాజకీయ పునాది కలిగిన నాయకుల్లో చింతకాయల అయ్యన్నపాత్రుడు (Chintakayala Ayyanna Patrudu) ఒకరు. నాలుగు దశాబ్దాలకు పైగా రాజకీయాల్లో కొనసాగుతున్న ఆయన ప్రస్తుతం ఆంధ్రప్రదేశ్ శాసనసభ స్పీకర్‌గా బాధ్యతలు నిర్వహిస్తున్నారు. 2024 ఎన్నికల్లో విజయం సాధించడంతో ఆయన ఎమ్మెల్యేగా ఏడోసారి అసెంబ్లీలో అడుగుపెట్టారు. రాష్ట్ర రాజకీయాల్లో ఇంత సుదీర్ఘ అనుభవం, ఏడుసార్లు శాసనసభకు ఎన్నికైన నాయకులు చాలా అరుదుగా కనిపిస్తారు. 1983లో తొలిసారి ఎమ్మెల్యేగా గెలిచిన అయ్యన్నపాత్రుడు.. ఎన్టీఆర్ (N. T. Rama Rao), చంద్రబాబు నాయుడు ( Chandrababu Naidu) ప్రభుత్వాల్లో మంత్రిగా పనిచేశారు. ప్రస్తుతం ఆయన కుటుంబ సభ్యులు కూడా రాజకీయాల్లో కీలక స్థానాలను అందుకుంటుండటంతో ఈ కుటుంబం మరోసారి చర్చలోకి వచ్చింది.

ఇటీవల జరిగిన పురపాలక ఎన్నికల్లో అయ్యన్నపాత్రుడు సతీమణి చింతకాయల పద్మావతి (Chintakayala Padmavathi) సాధించిన విజయం కుటుంబ రాజకీయ ప్రస్థానంలో మరో ముఖ్యమైన ఘట్టంగా నిలిచింది. నర్సీపట్నం (Narsipatnam) మునిసిపాలిటీలో కూటమి అభ్యర్థులు ఘన విజయం సాధించగా, మొత్తం 40 వార్డులకు గాను 39 స్థానాలను కైవసం చేసుకున్నారు. ఈ ఫలితంతో మునిసిపాలిటీలో కూటమికి తిరుగులేని ఆధిపత్యం లభించింది. పద్మావతి చైర్‌పర్సన్‌గా బాధ్యతలు చేపట్టేందుకు మార్గం సుగమమైంది. ఈ నెల 23న ఆమె ప్రమాణ స్వీకారం చేయనున్నారు.

పద్మావతికి స్థానిక రాజకీయాల్లో ఇది తొలి అనుభవం కాదు. 2021లో వైసీపీ అధికారంలో ఉన్న సమయంలో జరిగిన మునిసిపల్ ఎన్నికల్లో ఆమె టీడీపీ తరఫున కౌన్సిలర్‌గా పోటీ చేసి విజయం సాధించారు. అప్పట్లో 28 వార్డులున్న మునిసిపాలిటీలో టీడీపీ 12 స్థానాలను గెలుచుకుని బలమైన ప్రతిపక్షంగా నిలిచింది. కౌన్సిలర్‌గా ప్రజా సమస్యలపై పనిచేసిన ఆమెకు ఇప్పుడు చైర్‌పర్సన్ బాధ్యతలు దక్కడం రాజకీయంగా ప్రాధాన్యత సంతరించుకుంది. గతంలో ప్రతిపక్షంలో ఉన్న కుటుంబం ఇప్పుడు మునిసిపల్ పాలనలో కీలక స్థానాన్ని దక్కించుకుంది.

మరోవైపు అయ్యన్నపాత్రుడు పెద్ద కుమారుడు చింతకాయల విజయ్ (Chintakayala Vijay) రాజ్యసభ సభ్యుడిగా బాధ్యతలు చేపట్టడం కూడా కుటుంబానికి మరో కీలక పరిణామం. నాలుగు నెలల క్రితం ఆయనకు ఈ అవకాశం దక్కింది. ఉత్తరాంధ్ర నుంచి పెద్దల సభకు ప్రాతినిధ్యం వహించే అవకాశం రావడంతో ఆయన రాజకీయ ప్రస్థానంలో కొత్త అధ్యాయం ప్రారంభమైంది. గతంలో 1998లో అయ్యన్నపాత్రుడు అనకాపల్లి (Anakapalli) నుంచి లోక్‌సభకు ఎన్నికై ఎంపీగా పనిచేశారు. ఇప్పుడు ఆయన కుమారుడు రాజ్యసభలో అడుగుపెట్టడంతో కుటుంబానికి పార్లమెంటు ఉభయ సభలతో అనుబంధం ఏర్పడింది.

ఇక రెండో కుమారుడు చింతకాయల రాజేష్ (Chintakayala Rajesh) కూడా స్థానిక రాజకీయాల్లో చురుగ్గా వ్యవహరిస్తున్నారు. 2021లో టీడీపీ తరఫున కౌన్సిలర్‌గా గెలిచిన ఆయన గత ఐదేళ్లుగా నర్సీపట్నం మునిసిపల్ రాజకీయాల్లో కీలకంగా ఉన్నారు. తొలుత చైర్మన్ పదవికి రాజేష్ పోటీ చేస్తారనే ప్రచారం జరిగినప్పటికీ, మహిళలకు రిజర్వేషన్ రావడంతో పద్మావతి ఎన్నికల బరిలోకి దిగారు. 2029 అసెంబ్లీ ఎన్నికల్లో రాజేష్ నర్సీపట్నం నుంచి టీడీపీ అభ్యర్థిగా పోటీ చేసే అవకాశం ఉందనే చర్చ కూడా స్థానికంగా వినిపిస్తోంది.

అదే జరిగితే అయ్యన్న కుటుంబం నుంచి మరో వ్యక్తి కూడా చట్టసభల్లోకి ప్రవేశించినట్లవుతుంది. ఇప్పటికే స్పీకర్‌గా అయ్యన్నపాత్రుడు, రాజ్యసభ సభ్యుడిగా విజయ్, మునిసిపల్ చైర్‌పర్సన్‌గా పద్మావతి బాధ్యతలు చేపట్టనుండటంతో కుటుంబ రాజకీయ ప్రాతినిధ్యం విస్తరించింది. సుదీర్ఘకాలంగా పార్టీకి సేవలందిస్తున్న సీనియర్ నేత కుటుంబానికి వరుసగా కీలక అవకాశాలు లభించడం టీడీపీ రాజకీయాల్లో ఆసక్తికర పరిణామంగా మారింది.