విశాఖ కార్పొరేషన్‌ పోరులో వైసీపీకి కొత్త సవాల్‌..

విశాఖపట్నం (Visakhapatnam) కార్పొరేషన్‌ ఎన్నికలు మరోసారి రాజకీయంగా ఆసక్తిని పెంచుతున్నాయి. గత ఎన్నికల్లో సాధించిన ఆధిపత్యాన్ని నిలబెట్టుకోవడం వైఎస్సార్ కాంగ్రెస్ పార్టీ (YSR Congress Party)కి ఇప్పుడు పెద్ద సవాల్‌గా మారింది. ముఖ్యంగా 2021 ఎన్నికల సమయంలో పార్టీకి అండగా నిలిచి వ్యూహాలను అమలు చేసిన విజయసాయిరెడ్డి (Vijayasai Reddy) ప్రస్తుతం రాజకీయంగా వైసీపీకి దూరంగా ఉండటంతో, అప్పట్లో ఆయన నిర్వహించిన పాత్రను ఎవరు భర్తీ చేస్తారన్న చర్చ మొదలైంది.

2021లో విశాఖ మున్సిపల్ కార్పొరేషన్ ఎన్నికలను విజయసాయిరెడ్డి అత్యంత ప్రతిష్టాత్మకంగా తీసుకున్నారు. 2019 అసెంబ్లీ ఎన్నికల్లో వైసీపీ రాష్ట్రవ్యాప్తంగా మంచి ఫలితాలు సాధించినప్పటికీ, విశాఖ నగర పరిధిలోని నాలుగు అసెంబ్లీ స్థానాలను తెలుగుదేశం పార్టీ (TDP) గెలుచుకుంది. దీంతో కార్పొరేషన్ ఎన్నికల్లో కూడా అదే ప్రభావం కనిపించకుండా ముందుగానే వైసీపీ వ్యూహరచన చేసింది. ఎన్నికలకు కొన్ని నెలల ముందే విజయసాయిరెడ్డి నగరంపై ప్రత్యేక దృష్టి పెట్టారు.

వార్డు అభ్యర్థుల ఎంపిక నుంచి ప్రచార నిర్వహణ వరకు ఆయన కీలకంగా వ్యవహరించారు. స్థానిక నాయకులతో సమన్వయం చేస్తూ పార్టీ శ్రేణులను ఎన్నికల కోసం సిద్ధం చేశారు. నగరంలో పాదయాత్ర నిర్వహించడం ద్వారా ప్రజల్లోకి వెళ్లారు. ఈ ప్రయత్నాలన్నీ వైసీపీకి అనుకూలంగా మారడంతో ఆ ఎన్నికల్లో కార్పొరేషన్‌పై పార్టీ పట్టు సాధించింది. విశాఖలో రాజకీయంగా తమ ఉనికిని బలంగా చాటుకునేందుకు ఆ విజయం వైసీపీకి ఉపయోగపడింది.

అయితే ఇప్పుడు పరిస్థితులు పూర్తిగా మారిపోయాయి. విజయసాయిరెడ్డి స్థానంలో కొంతకాలం వైవీ సుబ్బారెడ్డి (YV Subba Reddy) బాధ్యతలు నిర్వహించినా, ఆయనపై వచ్చిన విమర్శలు, పార్టీ అంతర్గత అసంతృప్తి కారణంగా ఆ బాధ్యతల నుంచి తప్పించారు. ప్రస్తుతం కాకినాడ రూరల్ మాజీ ఎమ్మెల్యే కురసాల కన్నబాబు (Kurasala Kannababu)కు విశాఖ బాధ్యతలు అప్పగించారు. అయితే ఆయన నుంచి 2021లో కనిపించినంత దూకుడు లేదనే అభిప్రాయం పార్టీ వర్గాల్లో వ్యక్తమవుతోంది. నాయకులను ఒకే వేదికపైకి తీసుకురావడం, విస్తృతంగా పర్యటించడం వంటి కార్యక్రమాలు పెద్దగా కనిపించకపోవడంతో వైసీపీ శ్రేణుల్లో చర్చ మొదలైంది.

ఇదే సమయంలో తెలుగుదేశం పార్టీ విశాఖలో తన బలాన్ని గణనీయంగా పెంచుకుంది. నగరంలో డేటా సెంటర్లు, ఐటీ ప్రాజెక్టులు, పరిశ్రమలు, ఆర్సెలార్ మిట్టల్ (ArcelorMittal) స్టీల్‌ ప్రాజెక్ట్‌ వంటి పెట్టుబడులు రావడం ప్రభుత్వానికి రాజకీయంగా కలిసొస్తోందని టీడీపీ భావిస్తోంది. ఎంపీ భరత్ (Bharat), ఎమ్మెల్యేలు, పార్టీ రాష్ట్ర అధ్యక్షుడు పల్లా శ్రీనివాసరావు (Palla Srinivasa Rao) మధ్య సమన్వయం కూడా పార్టీకి బలంగా మారింది.

2021తో పోలిస్తే ప్రస్తుతం విశాఖలో టీడీపీ రాజకీయంగా మరింత పటిష్టంగా కనిపిస్తోంది. ఈ నేపథ్యంలో గత కార్పొరేషన్ విజయాన్ని పునరావృతం చేయాలని వైసీపీ ప్రయత్నిస్తుందా? లేక టీడీపీ తన ప్రస్తుత బలంతో కార్పొరేషన్‌పై పట్టు సాధిస్తుందా? అన్నది రాబోయే ఎన్నికల్లో తేలనుంది.