ప్రభుత్వాన్ని మార్చడమే మా థ్యేయం..ప్రశాంత్ భూషణ్ వ్యాఖ్యల కలకలం..!
- Published By: Srinivas Mohan
- October 17, 2026 / 10:34 AM IST
ప్రధాన ఎన్నికల కమిషనర్ కు వ్యతిరేకంగా సాగుతున్న నిరసనల వెనక ఉద్దేశం ప్రభుత్వాన్ని మార్చడమే అని బీజేపీ పదే పదే ఆరోపిస్తోంది. కూటమిలో ఉన్న ప్రతినిధుల వ్యాఖ్యలను అందుకుకారణంగా చూపిస్తోంది. అయితే లేటెస్టుగా ఇండీకూటమి ఆందోళనల్లో పాల్గొంటున్న సీనియర్ న్యాయవాది … నిరసనకారుల బృంద సభ్యుడు ప్రశాంత్ భూషణ్ కీలక వ్యాఖ్యలు చేశారు.. “అవును, మేము ప్రభుత్వాన్ని మార్చాలనే కోరుకుంటున్నాం” అని చేసిన వ్యాఖ్యలు రాజకీయంగా దుమారం రేపాయి.
ఢిల్లీలో ఏఐఎస్ఏ నాయకురాలు నేహా బోరా, సీజేపీ వ్యవస్థాపకుడు అభిజిత్ దీప్కేలతో కలిసి ప్రశాంత్ భూషణ్ మీడియా ప్రతినిధులతో మాట్లాడారు. “ప్రభుత్వంపై అసంతృప్తిని వ్యక్తం చేయడం ప్రజాస్వామ్యంలో నేరం కాదు. ఈ పోరాటం ఇప్పుడు నిజంగా ప్రభుత్వాన్ని మార్చడం కోసమే. ప్రభుత్వం ఇలాగే నిరంకుశంగా వ్యవహరిస్తే, కచ్చితంగా వ్యవస్థలో మార్పు వస్తుంది. గతంలో బీజేపీ కూడా అధికార మార్పిడి కోసం ఎన్నో ఉద్యమాలు చేపట్టింది. ఇప్పుడు మేము చేస్తుంటే కుట్ర అని ఆరోపిస్తారా? ఈ నియంతృత్వ వైఖరికి వ్యతిరేకంగా, ప్రజాస్వామ్యాన్ని అణచివేస్తున్న సర్కారుపై మా పోరాటం కొనసాగుతుంది” అని ఆయన స్పష్టం చేశారు.
ప్రశాంత్ భూషణ్ వ్యాఖ్యలపై రక్షణ మంత్రి రాజ్ నాథ్ సింగ్ శుక్రవారం లక్నోలో ఘాటుగా స్పందించారు. “అరాచక రాజకీయాల్లో యువతను పావులుగా మార్చాలని నిరసనకారులు కుట్ర పన్నుతున్నారు. బంగ్లాదేశ్‌ తరహాలో ఇక్కడ కూడా ప్రభుత్వాన్ని కూల్చడమే వారి లక్ష్యం. వారిలో ఒకరు ఈ విషయాన్ని బహిరంగంగానే వెల్లడించారు, దీన్నిబట్టి వారి అసలు ఎజెండా తేటతెల్లమవుతోంది” అని ఆయన వ్యాఖ్యానించారు. రాహుల్ గాంధీ, ఆయన అనుచరులు దేశంలో అశాంతిని రేకెత్తించడం, రాజ్యాంగ సంస్థల విశ్వసనీయతను దెబ్బతీయడం మానుకోవాలని రాజ్ నాథ్ హితవు పలికారు.
మరోవైపు, నిరసనకారుల బృందంలోని నేహా బోరా, బంగ్లాదేశ్‌లో జరిగిన యువజన ఉద్యమం తమకు స్ఫూర్తి అని పేర్కొన్న వీడియోను బీజేపీ ప్రధానాస్త్రంగా మలుచుకుంది. ఈ వీడియోను ప్రస్తావిస్తూ బీజేపీ జాతీయ అధికార ప్రతినిధి సీ.ఆర్. కేశవన్ మాట్లాడుతూ, “సీఈసీకి వ్యతిరేకంగా సాగుతున్న నిరసనలు కేవలం ఒక ముసుగు మాత్రమే. భారత ప్రజాస్వామ్య వ్యవస్థను విచ్ఛిన్నం చేసి, అప్రజాస్వామిక పద్ధతుల్లో అధికారాన్ని హస్తగతం చేసుకోవడమే రాహుల్ గాంధీ, ఆయన వర్గం అసలు వ్యూహం” అని ఆరోపించారు. ప్రశాంత్ భూషణ్, నేహా బోరాల వ్యాఖ్యలు దేశంలో అరాచకాన్ని సృష్టించాలనే వారి దురుద్దేశాన్ని బహిర్గతం చేశాయని బీజేపీ నేతలు విమర్శిస్తున్నారు.
