చమురు ఆంక్షల్లో ట్రంప్ కీలక సవరణలు..! , చైనాలకు ఊరట..!

ఇటీవలే రష్యాతో భారీ డీజిల్ డీల్ కుదుర్చుకున్న అమెరికా అధినేత ట్రంప్.. మరో కీలక నిర్ణయం తీసుకున్నారు. రష్యా, ఇరాన్‌లను లక్ష్యంగా చేసుకుని రూపొందించిన కఠినమైన చట్టంలోని పలు కీలక నిబంధనలకు మినహాయింపునిస్తూ ఎగ్జిక్యూటివ్ ఆర్డర్ జారీ చేశారు. ‘లిండ్సే ఓ. గ్రాహం శాంక్షనింగ్ రష్యా అండ్ ఇరాన్ యాక్ట్ ఆఫ్ 2026’గా పిలిచే ఈ చట్టం అమల్లోకి రావడానికి కేవలం ఒక రోజు ముందు ట్రంప్ ఈ నిర్ణయం తీసుకోవడం అంతర్జాతీయంగా ప్రాధాన్యత సంతరించుకుంది. ఈ చర్య ద్వారా రష్యా నుంచి భారీగా ఇంధనాన్ని దిగుమతి చేసుకుంటున్న భారత్, చైనా వంటి దేశాలకు తక్షణమే భారీ ఊరట లభించినట్లయింది.

‘లిండ్సే ఓ. గ్రాహం శాంక్షనింగ్ రష్యా అండ్ ఇరాన్ యాక్ట్ ఆఫ్ 2026..

ఈ చట్టం, రష్యా ఆర్థిక వ్యవస్థను దెబ్బతీయడమే లక్ష్యంగా రూపొందించబడింది. ఈ చట్టంలోని నిబంధనలు అమల్లోకి వస్తే, రష్యా నుంచి అత్యధికంగా ముడి చమురు, సహజ వాయువును కొనుగోలు చేసే దేశాల నుంచి వచ్చే వస్తువులపై 100% వరకు టారిఫ్‌లు విధించే అధికారం అమెరికాకు లభిస్తుంది. అదేవిధంగా, రష్యా ఇంధన ఉత్పత్తులపై అధిక సుంకాలు, ఆంక్షల ఉల్లంఘనకు సహకరించే దేశాలపై కఠిన చర్యలు తీసుకునేందుకు వీలు కలుగుతుంది. ప్రపంచంలో రష్యా చమురుకు అతిపెద్ద కొనుగోలుదారులుగా ఉన్న భారత్, చైనాలపై ఈ చట్టం తీవ్ర ప్రభావం చూపిస్తుందని ఆందోళనలు వ్యక్తమయ్యాయి. తాజా మినహాయింపుతో ఆ దేశాలపై పడాల్సిన ఆర్థిక భారం ప్రస్తుతానికి తప్పింది.

జాతీయ ప్రయోజనాల కోసమేనన్న ట్రంప్

అమెరికా జాతీయ ప్రయోజనాల దృష్ట్యానే ఈ మినహాయింపు నిర్ణయం తీసుకుంటున్నట్లు ట్రంప్ తన ఎగ్జిక్యూటివ్ ఆర్డర్‌లో పేర్కొన్నారు. ఈ మేరకు అవసరమైన నివేదికను, ధృవీకరణ పత్రాన్ని అమెరికా కాంగ్రెస్‌కు సమర్పించారు. ఈ ఉత్తర్వుల ద్వారా చట్టంలోని సెక్షన్ 112, 113 కింద విధించాల్సిన సుంకాలను, రష్యా ఇంధన కార్యకలాపాలతో సంబంధం ఉన్న విదేశీ సంస్థలు, వ్యక్తులపై విధించాల్సిన పలు ఆంక్షలను తక్షణమే నిలిపివేశారు. అయితే, ఈ మినహాయింపు కేవలం తాత్కాలికమేనని, భవిష్యత్తులో అవసరమైతే ఈ ఆంక్షలను పునరుద్ధరించే అధికారం అధ్యక్షుడికి ఉంటుందని స్పష్టమవుతోంది.

ట్రంప్ నిర్ణయం భారత్‌కు వ్యూహాత్మకంగా పెద్ద ఊరటగా చెప్పవచ్చు. తన ఇంధన భద్రత అవసరాల కోసం వివిధ దేశాల నుంచి ఇంధనాన్ని సేకరించడం తప్పనిసరి అని భారత్ మొదటి నుంచి అమెరికాతో జరిపిన చర్చల్లో బలంగా వాదిస్తూ వస్తోంది. రష్యా నుంచి చమురు కొనుగోళ్లు కేవలం తమ ఇంధన అవసరాలను తీర్చుకోవడానికేనని స్పష్టం చేసింది. ఇప్పుడు ట్రంప్ తీసుకున్న నిర్ణయం పరోక్షంగా భారత్ వాదనకు బలం చేకూర్చినట్లయింది.