నీట్ యూజీ-2026 పేపర్ లీక్ కేసులో కీలక మలుపు..!
దేశవ్యాప్తంగా లక్షలాది మంది వైద్య విద్యార్థుల భవిష్యత్తుతో ముడిపడి ఉన్న నీట్ యూజీ-2026 (NEET UG-2026) ప్రశ్నాపత్రం లీకేజీ కేసు విచారణలో కీలక పరిణామం చోటుచేసుకుంది. ఈ కేసులో మొత్తం 14 మంది నిందితులపై ఢిల్లీలోని రౌస్ అవెన్యూ ప్రత్యేక ఫాస్ట్ ట్రాక్ కోర్టు శనివారం అధికారికంగా అభియోగాలను ఖరారు చేసింది. ప్రత్యేక న్యాయమూర్తి అజయ్ గుప్తా నేతృత్వంలోని న్యాయస్థానం నిందితులపై నేరపూరిత కుట్ర, మోసం, నమ్మకద్రోహం, సాక్ష్యాల ధ్వంసం వంటి అభియోగాలతో పాటు భారతీయ న్యాయ సంహిత (BNS), అవినీతి నిరోధక చట్టం, పబ్లిక్ పరీక్షల చట్టం-2024 మరియు కాపీరైట్ చట్టం కింద అభియోగాలు నమోదు చేసింది.
అయితే తమపై మోపిన ఆరోపణలను నిందితులు తోసిపుచ్చడంతో, ఈ నెల 25వ తేదీ నుంచి కేసుపై రోజువారీ విచారణ ప్రారంభించాలని కోర్టు ఆదేశించింది. ఈ పేపర్ లీకేజీ కుంభకోణంపై దర్యాప్తు చేపట్టిన కేంద్ర దర్యాప్తు సంస్థ (CBI) సుమారు 20,000 పేజీలతో కూడిన ప్రధాన, అనుబంధ ఛార్జిషీట్లను దాఖలు చేసింది. ఇందులో నేషనల్ టెస్టింగ్ ఏజెన్సీ (NTA) ప్రశ్నాపత్రాల అనువాద పనుల కోసం నియమించిన ముగ్గురు సబ్జెక్టు నిపుణులు— మనీషా గురునాథ్ మంధారే (బయాలజీ), ప్రహ్లాద్ విఠల్రావు కులకర్ణి (కెమిస్ట్రీ), మనీషా సంజయ్ హవల్దార్ (ఫిజిక్స్) ప్రధాన నిందితులుగా ఉన్నారు. వీరు తమకున్న రహస్య సమాచార ప్రాప్యతను దుర్వినియోగం చేస్తూ, ఎన్టీఏ కార్యాలయంలోని భద్రతా లోపాలను ఆసరాగా చేసుకుని ప్రశ్నలను బయటకు తీసి దళారులు, కోచింగ్ సెంటర్ల నిర్వాహకులకు విక్రయించినట్లు సీబీఐ తన ఛార్జిషీట్లో పేర్కొంది.
ఈ ముగ్గురు సబ్జెక్టు నిపుణులతో పాటు మహారాష్ట్ర, రాజస్థాన్, హర్యానా రాష్ట్రాల్లో పేపర్లను విద్యార్థులకు చేరవేసిన మరో 11 మంది ప్రైవేట్ వ్యక్తులు, కోచింగ్ సెంటర్ల నిర్వాహకులపైనా అభియోగాలు నమోదయ్యాయి. ఈ ఏడాది మే 3న నిర్వహించిన నీట్ యూజీ పరీక్ష ప్రశ్నాపత్రం లీక్ కావడంతో ఎన్టీఏ మే 12న ఆ పరీక్షను రద్దు చేసి, జూన్ 21న తిరిగి పరీక్ష నిర్వహించిన సంగతి తెలిసిందే. దాదాపు 20 లక్షల మందికి పైగా విద్యార్థులను తీవ్ర మానసిక వేదనకు గురిచేయడమే కాకుండా, ప్రభుత్వ ఖజానాకు కోట్లాది రూపాయల నష్టం కలిగించిన ఈ కేసులో 360 మంది సాక్షులు, 422 డాక్యుమెంట్ల ఆధారంగా సీబీఐ విచారణను ముందుకు తీసుకెళ్తోంది.







