మొక్కలకు తెగుళ్లు, పురుగుల బెడద లేకుండా ఏపుగా పెరగాలంటే..? ఇంగువతో ఇలా చేయండి!

మనందరి వంటగదిలో నిత్యం ఉపయోగించే ఇంగువ మన ఆరోగ్యానికే కాకుండా, గార్డెనింగ్‌లో మొక్కల సంరక్షణకు కూడా ఉపయోగపడుతుంది. ఘాటైన వాసన, సహజసిద్ధమైన కొన్ని క్రియాశీల సమ్మేళనాలు కలిగిన ఇంగువను మొక్కల పెంపకంలో ఒక ఇంటి చిట్కాగా ఉపయోగిస్తుంటారు. ముఖ్యంగా మొక్కలకు ఆశించే కొన్ని రకాల పురుగుల బెడదను తగ్గించడానికి, వాటి ఆరోగ్యాన్ని కాపాడుకోవడానికి ఇంగువతో తయారుచేసిన ద్రావణాన్ని ఉపయోగించవచ్చు. అయితే ఇది పూర్తిస్థాయి ఎరువుకు లేదా శాస్త్రీయంగా నిరూపితమైన తెగుళ్ల నివారణ మందులకు ప్రత్యామ్నాయం కాదు. సరైన పద్ధతిలో, తగిన మోతాదులో ఉపయోగిస్తే మొక్కల సంరక్షణలో ఒక అదనపు సహాయక మార్గంగా ఉపయోగపడుతుంది.

మట్టి మిశ్రమంలో ఇంగువ.. పురుగుల నివారణకు స్ప్రే

మొక్కలు నాటేటప్పుడు మట్టి మిశ్రమంలో ఒకటి లేదా రెండు గ్రాముల ఇంగువ పొడిని కలపడం వల్ల వేరుకుళ్లు తెగులు రాకుండా ఉంటుంది. ఇది మట్టిలోని హానికరమైన వేరు పురుగులను నివారించి, వేర్లు బలంగా పెరిగేందుకు సహాయపడుతుంది.

కుండీల మట్టిపై ఇంగువ పొడిని చల్లడం వల్ల వర్షాకాలంలో వచ్చే నత్తలు, గాజు పురుగులు మరియు చీమల బెడద తప్పుతుంది. ఇది ఇండోర్ మొక్కలు, కూరగాయలు మరియు పూల కుండీలన్నింటికీ ఎంతో సురక్షితమైన మరియు సులువైన ఉపాయం.

ఇంగువ నీటి స్ప్రే.. మజ్జిగ, పసుపుతో మొక్కలకు రక్షణ

ఒక లీటరు నీటిలో 1-2 గ్రాముల ఇంగువ పొడిని కలిపి బాగా షేక్ చేసి మొక్కలపై స్ప్రే చేయాలి. దీని గాటైన వాసన వల్ల పిండినల్లి, పేనుబంక, తెల్లదోమ మరియు ఆకు తినే పచ్చపురుగులు మొక్కల దగ్గరకు రాకుండా దూరంగా పారిపోతాయి.

అర లీటరు పులిసిన మజ్జిగ, 5 లీటర్ల నీరు, ఒక స్పూన్ పసుపు మరియు ఒక స్పూన్ ఇంగువ కలిపిన ద్రావణం మొక్కలకు అద్భుతమైన బలాన్ని ఇస్తుంది. ఇది మొదట్లో పోయడం వల్ల పూత రాలిపోకుండా నిలిచి, వారం రోజుల్లోనే కొత్త పూత మరియు పిందెలు వస్తాయి.

ఆకుకూరల సంరక్షణ.. ఇంగువ వాడకంలో జాగ్రత్తలు

ఈ ద్రావణాన్ని ప్రతి 15 రోజులకు ఒకసారి స్ప్రే చేయడం వల్ల కరివేపాకుపై ఉండే నల్లటి పేనుబంక సమస్య పూర్తిగా తగ్గుతుంది. పాలకూర, కొత్తిమీర వంటి ఆకుకూరలను మిడతలు తినకుండా కాపాడి, మొక్కలు ఎల్లప్పుడూ పచ్చగా పెరిగేలా చేస్తుంది.

ఇంగువ స్ప్రేను కేవలం ఉదయం లేదా సాయంత్రం చల్లని వేళల్లో మాత్రమే పిచికారీ చేయాలి. మొక్కలు పూత దశలో ఉన్నప్పుడు ఆకులపై స్ప్రే చేయకుండా కేవలం మొదట్లో మాత్రమే పోయడం వల్ల పాలినేషన్‌కు ఎలాంటి భంగం కలగదు.