ఈ మొక్కలు మీ ఇంట్లో ఉంటే బొద్దింకలు పరార్..

ఇంట్లో బొద్దింకలు కనిపించడం చాలా మందికి పెద్ద సమస్యగా మారుతోంది. ముఖ్యంగా వంటగది, బాత్రూమ్, స్టోర్‌రూమ్ వంటి ప్రదేశాల్లో ఇవి ఎక్కువగా తిరుగుతుంటాయి. బొద్దింకలను తరిమేందుకు చాలామంది రసాయన స్ప్రేలు ఉపయోగిస్తుంటారు. అయితే కొన్ని ఇండోర్ మొక్కలు (Indoor Plants) సహజంగా విడుదల చేసే సువాసనలు, నూనెల కారణంగా బొద్దింకలు దూరంగా ఉంచుతాయి. ఇవి ఇంటికి పచ్చదనాన్ని అందించడమే కాకుండా ఆహ్లాదకరమైన వాతావరణాన్ని కూడా కల్పిస్తాయి.

1. పుదీనా

పుదీనా (Mint) మొక్క ఈ జాబితాలో ముందుంటుంది. పుదీనా ఆకుల నుంచి వచ్చే ఘాటైన వాసన బొద్దింకలకు అంతగా నచ్చదు. అందుకే వంటగది కిటికీ దగ్గర లేదా బాల్కనీలో పుదీనా మొక్కను పెంచితే మంచి ఫలితం కనిపించే అవకాశం ఉంటుంది. పైగా తాజా పుదీనాను వంటల్లో కూడా ఉపయోగించుకోవచ్చు.

2.లావెండర్

లావెండర్ (Lavender) మొక్క అందమైన పూలతో పాటు ఆహ్లాదకరమైన సువాసనకు ప్రసిద్ధి. మనుషులకు ఈ వాసన ఎంతో ఇష్టంగా అనిపించినా, కొన్ని రకాల కీటకాలు , బొద్దింకలు ఈ సువాసనకు దూరంగా ఉండే అవకాశం ఉంది. పరోక్ష సూర్యకాంతి వచ్చే ప్రదేశంలో ఈ మొక్కను ఉంచితే బాగా పెరుగుతుంది.

3.లెమన్‌గ్రాస్

లెమన్‌గ్రాస్ (Lemongrass) కూడా సహజ కీటక నివారణ లక్షణాలు ఉన్న మొక్కగా గుర్తింపు పొందింది. దీని ఆకుల్లో ఉండే సిట్రస్ వాసన (Citrus Aroma) బొద్దింకలకు ఇబ్బందిగా అనిపిస్తుందని అంటారు. ఇంటి ప్రవేశ ద్వారం లేదా కిటికీ పక్కన కుండీలో పెంచితే చక్కగా పెరుగుతుంది.

4.రోజ్‌మేరీ,బే లీఫ్ మొక్క

రోజ్‌మేరీ (Rosemary) మొక్కను వంటల్లో సుగంధ ద్రవ్యంగా ఉపయోగిస్తారు. దీని ఆకుల నుంచి వచ్చే ఘాటైన వాసన కారణంగా బొద్దింకలు దగ్గరకు రాకుండా ఉండే అవకాశముందని భావిస్తారు. ఈ మొక్కకు తగినంత వెలుతురు లభించే ప్రదేశంలో ఉంచితే ఆరోగ్యంగా పెరుగుతుంది.

బే లీఫ్ (Bay Leaf) లేదా తేజపత్రి మొక్క కూడా బొద్దింకలను దూరంగా ఉంచడంలో సహాయపడుతుంది. ఈ మొక్క ఆకుల సువాసన కారణంగా బొద్దింకలు ఆ ప్రాంతానికి రావడానికి ఇష్టపడవని చెబుతారు. వంటల్లో ఉపయోగించే ఈ ఆకులను ఎండబెట్టి అల్మారాలు లేదా నిల్వ గదుల్లో కూడా ఉంచుతుంటారు.

5.ఇంటి పరిశుభ్రత కూడా ముఖ్యం

అయితే మొక్కలు మాత్రమే ఉంటే బొద్దింకలు పూర్తిగా మాయమవుతాయని అనుకోవడం సరైంది కాదు. ఇంటిని ఎప్పుడూ శుభ్రంగా ఉంచడం, ఆహార పదార్థాలను మూతపెట్టి నిల్వ చేయడం, చెత్తను ఎక్కువసేపు ఇంట్లో ఉంచకుండా తొలగించడం, నీరు లీక్ అయ్యే ప్రదేశాలను సరిచేయడం వంటి అలవాట్లు కూడా చాలా ముఖ్యమైనవి. అవసరమైతే నిపుణుల సహాయం తీసుకుని కీటక నియంత్రణ చర్యలు చేపట్టడం మంచిది.

సహజమైన పద్ధతులతో ఇంటిని పరిశుభ్రంగా ఉంచాలని కోరుకునే వారికి ఈ ఇండోర్ మొక్కలు మంచి ఎంపికగా చెప్పవచ్చు. ఇవి ఇంటి అందాన్ని పెంచడమే కాకుండా ఆహ్లాదకరమైన సువాసనను అందిస్తూ, కొన్ని కీటకాలు మరియు బొద్దింకలు చేరకుండా ఉండేందుకు కొంతవరకు తోడ్పడే అవకాశం ఉంది.