మసాలా దోశతో ఓట్ల వేట..అమెరికాలో కొత్త రాజకీయం!

—సూర్య ప్రకాష్ జోశ్యుల

అమెరికా ఎన్నికల ప్రచారం అంటే భారీ ర్యాలీలు, హోరాహోరీ ప్రసంగాలు, ప్రత్యర్థులపై విమర్శలు గుర్తుకొస్తాయి. కానీ టెక్సాస్‌లో మాత్రం ఓ రాజకీయ నాయకుడు వీటన్నింటికీ కాస్త భిన్నంగా ఆలోచించారు. ఓటర్ల మనసు గెలుచుకోవాలంటే వాళ్ల మధ్యకు వెళ్లాలి.. వాళ్లతో కలిసిపోవాలి అనుకున్నారో ఏమో కానీ, ఏకంగా మసాలా దోశ వేయడానికి సిద్ధమైపోయారు. అదీ ఏదో అమెరికన్ పాన్‌కేక్ కాదు.. మన దక్షిణ భారతీయుల ఫేవరెట్ మసాలా దోశ!

టెక్సాస్‌లో డెమొక్రటిక్ పార్టీ తరఫున సెనేట్ ఎన్నికల బరిలో ఉన్న జేమ్స్ తలారికో ఇప్పుడు ఓ వీడియోతో సోషల్ మీడియాలో చర్చనీయాంశంగా మారారు. ఓ ఇండియన్ రెస్టారెంట్‌కు వెళ్లిన ఆయన, అక్కడి చెఫ్ సాయంతో స్వయంగా దోశ వేయడానికి ప్రయత్నించారు. పెనంపై దోశ పిండిని పరిచి, అందులో బంగాళాదుంప మసాలా పెట్టి, దాన్ని మడిచే ప్రయత్నం చేశారు. పక్కనే ఉన్నవాళ్లు చప్పట్లు కొడుతూ ఆయనను ఉత్సాహపరిచారు. ఈ వీడియో బయటకు రావడంతో అమెరికా ఎన్నికల ప్రచారంలో దోశ ఎంట్రీపై ఆసక్తికరమైన చర్చ మొదలైంది.

అయితే ఇది కేవలం ఒక రెస్టారెంట్ విజిట్ అనుకుంటే పొరపాటే. నవంబర్ 3న జరగనున్న అమెరికా మిడ్‌టర్మ్ ఎన్నికలకు ముందు భారతీయ అమెరికన్లను ఆకట్టుకోవడానికి తలారికో చేస్తున్న ప్రయత్నాల్లో ఇదొకటి. ముఖ్యంగా టెక్సాస్‌లో భారతీయుల ఓట్లు కొన్ని కీలక ప్రాంతాల్లో ఎన్నికల ఫలితాలను ప్రభావితం చేసే అవకాశం ఉండటంతో ఆయన ఈ వర్గంపై ప్రత్యేకంగా దృష్టి పెట్టినట్లు కనిపిస్తోంది.

దోశ వెనుక అసలు లెక్క ఇదేనా?

తలారికో వెళ్లిన రెస్టారెంట్ పేరు ‘మదీరా ఎన్ మసాలా’. ఇది డల్లాస్ సమీపంలోని ఇర్వింగ్ ప్రాంతంలో ఉంది. ఇక్కడ భారతీయ అమెరికన్లు గణనీయమైన సంఖ్యలో నివసిస్తున్నారు. భారతీయ రెస్టారెంట్లు, కిరాణా దుకాణాలు, వ్యాపార సంస్థలతో ఈ ప్రాంతం ఒక ప్రత్యేకమైన ఇండియన్ కమ్యూనిటీ కేంద్రంగా ఎదిగింది. అందుకే ఎన్నికల సమయంలో ఈ ప్రాంతానికి వెళ్లడం రాజకీయంగా కూడా ప్రాధాన్యం సంతరించుకుంది.

రెస్టారెంట్‌లో దోశ వేయడంతోనే తలారికో తన పర్యటనను ముగించలేదు. అక్కడి భారతీయ అమెరికన్లతో మాట్లాడారు. అమెరికాలో వలస విధానాలు ఎలా ఉండాలి? ఇమ్మిగ్రేషన్ నిబంధనల్లో ఎలాంటి మార్పులు రావాలి? టెక్సాస్‌లో భిన్న సంస్కృతులకు ఎందుకు ప్రాధాన్యం ఇవ్వాలి? వంటి అంశాలపై తన అభిప్రాయాలను పంచుకున్నారు. అంటే ఒకవైపు భారతీయ ఆహారంతో స్థానికులకు దగ్గరవుతూనే, మరోవైపు వాళ్లకు సంబంధించిన రాజకీయ సమస్యలను కూడా ప్రస్తావించారు.

టెక్సాస్‌లో ఇండియన్స్ ఓట్లు అంత ముఖ్యమా?

అమెరికాలో భారతీయుల జనాభా మరీ ఎక్కువ కాకపోయినా, ఎన్నికల దగ్గరకు వచ్చేసరికి వారి ప్రాధాన్యం మాత్రం పెరుగుతోంది. ముఖ్యంగా టెక్సాస్‌లో ఈ పరిస్థితి స్పష్టంగా కనిపిస్తోంది. 2020-2024 అమెరికన్ కమ్యూనిటీ సర్వే అంచనాల ప్రకారం, టెక్సాస్‌లో సుమారు 5.51 లక్షల మంది భారతీయ మూలాలున్న ప్రజలు నివసిస్తున్నారు. రాష్ట్ర జనాభాలో ఇది దాదాపు 1.83 శాతం.

ఇక్కడ ఓ విషయం గమనించాలి. ఈ 5.51 లక్షల మందిలో పిల్లలు, అమెరికా పౌరసత్వం లేని వారు కూడా ఉంటారు. కాబట్టి వీరందరికీ ఓటు హక్కు ఉందని అనుకోకూడదు. అయినప్పటికీ, కొలిన్, ఫోర్ట్ బెండ్ వంటి ప్రాంతాల్లో భారతీయులతో పాటు ఇతర ఆసియా మూలాలున్న ప్రజల సంఖ్య పెరుగుతుండటం రాజకీయ పార్టీలకు కీలకంగా మారింది.

మరో ఆసక్తికరమైన విషయం ఏమిటంటే.. అమెరికాలోని భారతీయులంతా డెమొక్రాట్లకే ఓటు వేస్తారనే పరిస్థితి లేదు. గతంలో ఈ వర్గం నుంచి డెమొక్రటిక్ పార్టీకి ఎక్కువ మద్దతు లభించినప్పటికీ, ఇటీవలి ఎన్నికల్లో రిపబ్లికన్ల వైపు కూడా కొంతమంది ఆసియా అమెరికన్ ఓటర్లు మొగ్గు చూపుతున్నారు. దీంతో ఏ పార్టీ కూడా ఈ ఓటర్లను తేలిగ్గా తీసుకునే పరిస్థితి లేదు.

మరోవైపు అమెరికాలో భారతీయులపై కొందరు రిపబ్లికన్ కార్యకర్తలు చేస్తున్న వ్యతిరేక వ్యాఖ్యలు, వలస విధానాలపై కొనసాగుతున్న వివాదాలు కూడా ఎన్నికల ప్రచారంలో చర్చకు వస్తున్నాయి. ఇలాంటి సమయంలో భారతీయుల మధ్యకు వెళ్లి వారి సంస్కృతిలో భాగం కావడం ద్వారా తలారికో ఒక ప్రత్యేకమైన సందేశం ఇవ్వాలనుకుంటున్నట్లు కనిపిస్తోంది.

కెన్ పాక్స్టన్‌తో పోటీ.. తలారికోకు అంత ఈజీ కాదు!

ఇక ఈ దోశ వీడియో వైరల్ అవుతున్న సమయంలోనే టెక్సాస్ సెనేట్ ఎన్నికల పోరు కూడా ఆసక్తికరంగా మారింది. డెమొక్రటిక్ అభ్యర్థి జేమ్స్ తలారికోకు రిపబ్లికన్ పార్టీ తరఫున కెన్ పాక్స్టన్ గట్టి పోటీ ఇస్తున్నారు. పాక్స్టన్ 2015 నుంచి టెక్సాస్ అటార్నీ జనరల్‌గా కొనసాగుతున్నారు. రిపబ్లికన్ ప్రైమరీలో ప్రస్తుత సెనేటర్ జాన్ కార్నిన్ ఓడిపోవడంతో ఆయన అభ్యర్థిత్వం ఖరారైంది.

టెక్సాస్ అంటేనే రిపబ్లికన్లకు బలమైన రాష్ట్రం. అలాంటి చోట డెమొక్రటిక్ అభ్యర్థి గెలవడం అంత సులభమైన విషయం కాదు. కానీ ఈసారి పోటీ మాత్రం ఆసక్తికరంగా మారింది. తలారికో ఆర్థిక సమస్యలు, వలస విధానాలు, అన్ని వర్గాలకు సమాన ప్రాధాన్యం వంటి అంశాలను ముందుకు తీసుకొస్తుంటే, పాక్స్టన్ మాత్రం ట్రంప్, MAGA రాజకీయాలకు దగ్గరగా ఉంటూ సరిహద్దు భద్రత, సంప్రదాయవాద విధానాలు, పన్నుల తగ్గింపు వంటి అంశాలపై ప్రచారం చేస్తున్నారు.

పాక్స్టన్ రాజకీయ ప్రయాణంలో వివాదాలు కూడా తక్కువేమీ కాదు. 2023లో ఆయనపై వచ్చిన అధికార దుర్వినియోగ ఆరోపణలతో అభిశంసన విచారణ జరిగింది. అయితే టెక్సాస్ సెనేట్ ఆయనను నిర్దోషిగా ప్రకటించింది. ఈ వివాదాలను కూడా ప్రత్యర్థులు ఎన్నికల ప్రచారంలో ప్రస్తావిస్తున్నారు. మరోవైపు ఇరు పార్టీలూ ప్రకటనల కోసం భారీగా ఖర్చు చేస్తూ ఓటర్లను తమవైపు తిప్పుకునే ప్రయత్నం చేస్తున్నాయి.

తాజా సర్వేలో రెండు శాతం ఆధిక్యంలో తలారికో!

ఈ పోరులో తలారికోకు కొంత ఊరటనిచ్చే విషయం తాజా సర్వే. అక్టోబర్ 29న టెక్సాస్ సదరన్ యూనివర్సిటీ విడుదల చేసిన పోల్‌లో ఆయనకు 49 శాతం మద్దతు లభించగా, కెన్ పాక్స్టన్‌కు 47 శాతం మద్దతు వచ్చింది. అంటే తలారికో రెండు శాతం పాయింట్ల ఆధిక్యంలో ఉన్నారు. లిబర్టేరియన్ అభ్యర్థి టెడ్ బ్రౌన్‌కు 3 శాతం మద్దతు లభించగా, మరో 1 శాతం మంది ఇంకా ఎవరికి ఓటు వేయాలో నిర్ణయించుకోలేదు.

అభ్యర్థులపై ప్రజల్లో ఉన్న అభిప్రాయాలను చూస్తే కూడా పాక్స్టన్‌కు కొంత ఇబ్బందికరమైన పరిస్థితి కనిపిస్తోంది. తలారికోను 48 శాతం మంది అనుకూలంగా చూస్తుండగా, 51 శాతం మంది ప్రతికూల అభిప్రాయంతో ఉన్నారు. పాక్స్టన్ విషయంలో మాత్రం 42 శాతం మంది మాత్రమే అనుకూలంగా ఉండగా, 57 శాతం మంది వ్యతిరేక అభిప్రాయం వ్యక్తం చేశారు. ఈ సర్వేలో ఎన్నికల్లో ఓటు వేసే అవకాశం ఉన్న 2,000 మంది టెక్సాస్ ప్రజలను ప్రశ్నించారు.

అమెరికా ఎన్నికల్లో ఇప్పుడు దోశ కూడా ఒక ప్రచార అస్త్రమేనా?

ఒకప్పుడు అమెరికా ఎన్నికల్లో భారతీయ ఓటర్లను ఆకట్టుకోవాలంటే ఇమ్మిగ్రేషన్, ఉద్యోగాలు, వీసాల గురించి మాట్లాడితే సరిపోయేది. ఇప్పుడు పరిస్థితి మారుతోంది. భారతీయుల ఆహారం, సంస్కృతి, సంప్రదాయాలు కూడా రాజకీయ ప్రచారంలో భాగమవుతున్నాయి. ఒక అభ్యర్థి మసాలా దోశ వేస్తే అది సోషల్ మీడియాలో వైరల్ అవుతోంది. మరో అభ్యర్థి భారతీయ సమాజానికి దగ్గరయ్యే ప్రయత్నం చేస్తే అది కూడా రాజకీయ చర్చగా మారుతోంది.

ప్రచారంలో మసాలా దోశతో సందడి చేసిన తలారికోకు.. పోలింగ్ బూత్ దగ్గర భారతీయ అమెరికన్లు ఎంతవరకు మద్దతు ఇస్తారో చూడాలి!