విదేశాలకు వెళ్లి చదువుకోవాలనుకుంటున్నారా? అయితే ఈ ఒక్క విషయం మర్చిపోవద్దు!

—సూర్య ప్రకాష్ జోశ్యుల

విదేశాల్లో చదువుకోవాలని అనగానే చాలామందికి అమెరికా, కెనడా, బ్రిటన్, ఆస్ట్రేలియా వంటి దేశాలు గుర్తొస్తాయి. మంచి యూనివర్సిటీలో సీటు సంపాదించి, అక్కడ చదువు పూర్తి చేసి, మంచి కంపెనీలో ఉద్యోగం తెచ్చుకుని జీవితంలో సెటిల్ అయిపోవాలని కలలు కంటారు. ఇందుకోసం తల్లిదండ్రులు అప్పులు చేయడానికైనా, ఆస్తులు అమ్మడానికైనా వెనుకాడటం లేదు. కానీ ఇప్పుడు విదేశీ చదువుల విషయంలో భారతీయ విద్యార్థుల ఆలోచనలో ఒక కీలకమైన మార్పు వస్తోంది. ఫలానా దేశంలో చదివితే మంచి డిగ్రీ వస్తుందా? అనే దానికంటే.. అక్కడ చదువు పూర్తయ్యాక ఉద్యోగం దొరుకుతుందా? ఆ దేశంలోనే కొన్నేళ్లు పనిచేసే అవకాశం ఉంటుందా? అన్నదానిపైనే ఎక్కువగా దృష్టి పెడుతున్నారు.

ఎందుకంటే విదేశీ విద్య కోసం లక్షలు ఖర్చు పెట్టడం ఒక ఎత్తయితే.. చదువు పూర్తయ్యాక ఉద్యోగం దొరక్కపోతే పరిస్థితి ఏమిటన్నది మరో పెద్ద సమస్య. మారుతున్న వీసా నిబంధనలు, ఇమ్మిగ్రేషన్ ఆంక్షలు ఈ ఆందోళనను మరింత పెంచుతున్నాయి. తాజాగా IDP Education విడుదల చేసిన ఒక నివేదిక కూడా భారతీయ విద్యార్థుల ఆలోచనల్లో వస్తున్న ఈ మార్పును బయటపెట్టింది. విదేశీ విద్యపై ఆసక్తి తగ్గకపోయినా, ఏ దేశానికి వెళ్లాలి? ఏ కోర్సు చదవాలి? అనే నిర్ణయాల వెనుక ఇప్పుడు ఉద్యోగమే అసలైన లెక్కగా మారుతోంది.

డిగ్రీ వస్తే సరిపోదు.. ఉద్యోగం కూడా రావాలి!

విదేశాల్లో చదువుకోవాలనుకునే భారతీయ విద్యార్థులకు ఇప్పుడు యూనివర్సిటీ పేరు కంటే అక్కడ చదువు పూర్తయ్యాక వచ్చే అవకాశాలే ఎక్కువగా ఆకర్షిస్తున్నాయి. IDP Education నిర్వహించిన సర్వేలో పాల్గొన్న భారతీయ విద్యార్థుల్లో 22 శాతం మంది విదేశాల్లో గ్రాడ్యుయేషన్ పూర్తయిన తర్వాత లభించే ఉద్యోగ అవకాశాలనే తమ నిర్ణయానికి ప్రధాన కారణంగా పేర్కొన్నారు. ప్రపంచవ్యాప్తంగా విద్యార్థుల ఆలోచన మాత్రం కొంత భిన్నంగా ఉంది. అంతర్జాతీయ విద్యార్థుల్లో 23 శాతం మందికి విదేశాల్లో జీవించడానికి అయ్యే ఖర్చే అతిపెద్ద ఆందోళనగా మారింది.

ఈ సర్వేలో 106 దేశాలు, ప్రాంతాలకు చెందిన 4,800 మందికి పైగా విద్యార్థులు పాల్గొనగా, అందులో 994 మంది భారతీయులే ఉన్నారు. గత మార్చిలో విడుదల చేసిన నివేదికలో భారతీయ విద్యార్థుల వాటా 17 శాతంగా ఉండగా, తాజా నివేదికలో అది 21 శాతానికి చేరింది. అంటే విదేశీ విద్యపై భారతీయుల ఆసక్తి ఎంత ఉందో అర్థం చేసుకోవచ్చు. అయితే ఆ ఆసక్తి వెనుక ఇప్పుడు కేవలం చదువు మాత్రమే లేదు. చదివిన తర్వాత సంపాదించగలమా? పెట్టిన డబ్బు తిరిగి వస్తుందా? కెరీర్‌లో ముందుకు వెళ్లగలమా? అనే లెక్కలు కూడా ఉన్నాయి.

అమెరికా, కెనడా, బ్రిటన్.. వీసా టెన్షన్ ఉన్నా వెనక్కి తగ్గడం లేదు!

విదేశీ విద్య కోసం వెళ్లాలనుకునే విద్యార్థులకు ఇప్పుడు వీసా నిబంధనలు పెద్ద తలనొప్పిగా మారాయి. ఒక దేశంలో చదువు పూర్తయ్యాక అక్కడే ఉద్యోగం చేసుకోవడానికి అనుమతి ఉంటుందా? వర్క్ పర్మిట్ నిబంధనలు మారితే పరిస్థితి ఏమిటి? ఇమ్మిగ్రేషన్ ఆంక్షలు పెరిగితే తమ భవిష్యత్తు ఎలా ఉంటుంది? ఇలాంటి ప్రశ్నలు విద్యార్థులను వెంటాడుతున్నాయి. అయినప్పటికీ భారతీయ విద్యార్థులంతా విదేశీ చదువుల ఆలోచనను పక్కన పెట్టేయడం లేదు.

వీసా, ఇమ్మిగ్రేషన్ విధానాల్లో మార్పుల గురించి తెలిసినప్పటికీ 32 నుంచి 41 శాతం మంది భారతీయ విద్యార్థులు తమ విదేశీ విద్య ప్రణాళికల్లో ఎలాంటి మార్పులు చేసుకోలేదని నివేదిక వెల్లడించింది. ప్రపంచవ్యాప్తంగా ఇలాంటి అభిప్రాయం వ్యక్తం చేసిన విద్యార్థుల సంఖ్య 24 నుంచి 31 శాతం మధ్యే ఉంది. అంటే ఇతర దేశాలతో పోలిస్తే భారతీయ విద్యార్థులు విదేశీ విద్య విషయంలో ఇంకా గట్టిగానే ఉన్నారు. కాకపోతే గతంలో ఉన్నంత గుడ్డి నమ్మకంతో కాకుండా, ప్రతి అవకాశాన్ని ఒకటికి రెండుసార్లు పరిశీలిస్తున్నారు.

ఒక్క అమెరికానే ఎందుకు? ఇప్పుడు ప్లాన్ బీ కూడా సిద్ధం చేసుకుంటున్నారు!

ఒకప్పుడు విదేశాల్లో చదువుకోవాలనుకునేవారికి అమెరికా అంటే ప్రత్యేకమైన క్రేజ్ ఉండేది. మరికొందరు కెనడా లేదా బ్రిటన్‌ను ఎంచుకునేవారు. కానీ ఇప్పుడు ఒక దేశాన్ని మాత్రమే నమ్ముకుని ఉండే పరిస్థితి కనిపించడం లేదు. అక్కడ వీసా నిబంధనలు కఠినమైతే మరో దేశం, ఉద్యోగ అవకాశాలు తగ్గితే ఇంకో దేశం.. ఇలా ప్రత్యామ్నాయాలను కూడా సిద్ధం చేసుకుంటున్నారు.

విదేశీ విద్యను పరిశీలిస్తున్న భారతీయ విద్యార్థుల్లో 74 శాతం మంది ఒకటి కంటే ఎక్కువ దేశాలను తమ ఎంపికల్లో ఉంచుకున్నారని నివేదిక చెబుతోంది. ప్రపంచవ్యాప్తంగా ఈ సంఖ్య 83 శాతంగా ఉంది. అయితే కొందరు మాత్రం విదేశీ విద్యపై తమ నిర్ణయాన్ని పూర్తిగా మార్చుకుంటున్నారు. సర్వేలో పాల్గొన్న మొత్తం విద్యార్థుల్లో విదేశీ విద్యను వద్దనుకున్నవారి సంఖ్య మార్చిలో 11 శాతంగా ఉండగా, అక్టోబర్ నాటికి 16 శాతానికి పెరిగింది. ఈ విభాగంలో భారతీయ విద్యార్థుల వాటా 22 శాతంగా ఉంది. మొత్తం సర్వేలో పాల్గొన్న వారితో పోలిస్తే విదేశీ చదువులను విరమించుకున్న భారతీయ విద్యార్థులు 7 శాతం ఉన్నారు.

AI వచ్చేసింది.. ఇప్పుడు కోర్సులు ఎంచుకోవడంలోనూ అదే కీలకం!

విదేశాల్లో ఏ కోర్సు చదవాలనే విషయంలోనూ విద్యార్థుల ఆలోచన మారుతోంది. ఒకప్పుడు కంప్యూటర్ సైన్స్, మేనేజ్‌మెంట్, ఇంజినీరింగ్ వంటి కోర్సులకు మంచి డిమాండ్ ఉండేది. ఇప్పుడు వాటితో పాటు ఆర్టిఫిషియల్ ఇంటెలిజెన్స్ (AI) నైపుణ్యాలు ఉంటే భవిష్యత్తులో ఉద్యోగ అవకాశాలు ఎలా ఉంటాయన్నది కూడా విద్యార్థులు ఆలోచిస్తున్నారు. ఎందుకంటే AI ఇప్పటికే అనేక రంగాల్లో ఉద్యోగాల స్వరూపాన్ని మార్చేస్తోంది. రాబోయే రోజుల్లో ఏ ఉద్యోగాలకు డిమాండ్ ఉంటుంది? ఏ నైపుణ్యాలు నేర్చుకుంటే కంపెనీలు ప్రాధాన్యత ఇస్తాయి? అనే ప్రశ్నలు కోర్సుల ఎంపికను ప్రభావితం చేస్తున్నాయి.

భారతీయ విద్యార్థుల్లో 47 శాతం మంది AI, టెక్నాలజీకి సంబంధించిన నైపుణ్యాలను భవిష్యత్తులో ఉద్యోగం సంపాదించడానికి అత్యంత ముఖ్యమైనవిగా భావిస్తున్నారు. ప్రపంచవ్యాప్తంగా ఈ అభిప్రాయం వ్యక్తం చేసినవారు 42 శాతం మాత్రమే. అంతేకాదు, AI ఆధారిత ఉద్యోగ అవకాశాలను చూసి 25 శాతం మంది భారతీయ విద్యార్థులు కొన్ని ప్రత్యేక సబ్జెక్టులపై ఆసక్తి పెంచుకున్నారట. అంటే విదేశాల్లో చదువుకోవడానికి వెళ్లే ముందే అక్కడి యూనివర్సిటీలో ఏం నేర్పిస్తారు? ఆ కోర్సు పూర్తయ్యాక AI ప్రభావం పెరుగుతున్న ఉద్యోగ మార్కెట్‌లో తమకు ఎంత ఉపయోగపడుతుంది? అనే విషయాలను కూడా లెక్కలోకి తీసుకుంటున్నారు.

కౌన్సెలర్లను అడుగుతున్నారు.. ChatGPTతోనూ చెక్ చేసుకుంటున్నారు!

విదేశీ విద్య కోసం యూనివర్సిటీని ఎంచుకోవడం, కోర్సును నిర్ణయించుకోవడం, అప్లికేషన్లు పెట్టడం అంత సులభమైన వ్యవహారం కాదు. అందుకే చాలామంది విద్యార్థులు ఎడ్యుకేషన్ కౌన్సెలర్ల సహాయం తీసుకుంటుంటారు. కానీ ఇప్పుడు ఆ సలహాలతో పాటు AI టూల్స్‌ను కూడా ఉపయోగిస్తున్నారు. ఒక కౌన్సెలర్ చెప్పిన సమాచారం నిజమేనా? తాము ఎంచుకున్న యూనివర్సిటీకి మంచి ఉద్యోగ అవకాశాలు ఉన్నాయా? ఇతర దేశాల్లో ఇంతకంటే మెరుగైన కోర్సులు ఉన్నాయా? ఇలాంటి సందేహాలకు సమాధానాలు వెతకడానికి AIని ఆశ్రయిస్తున్నారు.

సర్వేలో పాల్గొన్న భారతీయ విద్యార్థుల్లో 50 శాతం మంది విదేశీ విద్యా సలహాదారులు లేదా కౌన్సెలర్లపై ఆధారపడుతున్నట్లు చెప్పారు. ప్రపంచవ్యాప్తంగా ఈ సంఖ్య 37 శాతంగా ఉంది. అదే సమయంలో 44 శాతం మంది భారతీయ విద్యార్థులు తమ పరిశోధన, నిర్ణయ ప్రక్రియలో జనరేటివ్ AIని ఉపయోగిస్తున్నట్లు వెల్లడించారు. ప్రపంచ సగటు 41 శాతంగా ఉంది. AI ఉపయోగిస్తున్న భారతీయ విద్యార్థుల్లో 62 శాతం మంది ఇప్పటికే తీసుకున్న నిర్ణయం సరైనదేనా అని నిర్ధారించుకోవడానికి దాన్ని ఉపయోగిస్తుండగా, 22 శాతం మంది మాత్రం AI ఇచ్చిన సమాచారం కారణంగా తమ నిర్ణయాన్ని మార్చుకున్నారట.

విదేశీ చదువుల అసలు లెక్క మారుతోంది!

వీసా నిబంధనలు, ఇమ్మిగ్రేషన్ విధానాల్లో మార్పులు ఉన్నప్పటికీ భారతీయ విద్యార్థులు అంతర్జాతీయ విద్యపై ఆసక్తిని కొనసాగిస్తున్నారు. అయితే ఇప్పుడు చదువు పూర్తయిన తర్వాత వచ్చే ఉద్యోగ అవకాశాలు, దీర్ఘకాలిక కెరీర్ ప్రయోజనాలకే ఎక్కువ ప్రాధాన్యత ఇస్తున్నారు.

ఈ నివేదిక కోసం 2026 ఆగస్టు 18 నుంచి సెప్టెంబర్ 16 వరకు విద్యార్థుల అభిప్రాయాలను సేకరించారు. ఇందులో విదేశాల్లో చదువుకోవాలని అనుకుంటున్నవారు, ఇప్పటికే దరఖాస్తు చేసుకున్నవారు, ప్రస్తుతం చదువుతున్నవారు, గతంలో చదివినవారితో పాటు విదేశీ విద్య ఆలోచనను విరమించుకున్నవారు కూడా ఉన్నారు.

ఏదైమైనా….

విదేశీ విద్య అనేది ఇక కేవలం ఒక హోదా కోసం చేసే ప్రయాణం కాదు. కుటుంబం చేసే భారీ ఖర్చుకు తగిన ప్రతిఫలం రావాలి. చదువు పూర్తయ్యాక మంచి ఉద్యోగం రావాలి. సాధ్యమైతే అదే దేశంలో కెరీర్‌ను నిర్మించుకోవాలి. అందుకే ఇప్పుడు భారతీయ విద్యార్థులు యూనివర్సిటీ బ్రోచర్లను చూసి మాత్రమే నిర్ణయం తీసుకోవడం లేదు. ఆ డిగ్రీతో తమ భవిష్యత్తు ఎలా ఉండబోతోందో ముందే లెక్కలు వేసుకుంటున్నారు. చివరికి విదేశాల్లో చదివిన గొప్పదనం కంటే.. అక్కడ చదివి జీవితంలో ఎంత ముందుకు వెళ్లగలిగామన్నదే ముఖ్యంగా మారుతోంది!