9వ నాట్స్ సంబరాల కిక్ ఆఫ్ ఈవెంట్ విజయవంతం
ఉత్తర అమెరికా తెలుగు సొసైటీ (నాట్స్) ఆధ్వర్యంలో రెండేళ్ళకోమారు నిర్వహించే 9వ నాట్స్ అమెరికా తెలుగు సంబరాల కిక్-ఆఫ్ మరియు కర్టెన్ రైజర్ వేడుకలు డల్లాస్లో ఘనంగా జరిగాయి. 2027 మే 28 నుండి 30 వరకు టెక్సాస్లోని డల్లాస్లో జరగబోయే ఈ వేడుకలను పురస్కరించుకుని ఈ కార్యక్రమాన్ని నిర్వహించారు. టెక్సాస్లోని ప్లానోలో గల మారియట్ ఎట్ లెగసీ టౌన్ సెంటర్లో నిర్వహించిన ఈ కార్యక్రమానికి ప్రవాస తెలుగు వారి నుంచి విశేష స్పందన లభించింది. ఈ కార్యక్రమానికి ఎంతోమంది ఉత్సాహంతో హాజరయ్యారు. రద్దీగా ఉండే దీపావళి వారాంతంలో కూడా, దేశంలోని నలుమూలల నుండి విచ్చేసిన 40 మందికి పైగా అంకితభావం కలిగిన బోర్డ్ ఆఫ్ డైరెక్టర్స్, ఎగ్జిక్యూటివ్ కమిటీ సభ్యులతో సహా 1,000 మందికి పైగా ప్రవాస భారతీయులు ఒకచోట చేరి ఈ చారిత్రాత్మక సాయంత్రాన్ని మరపురాని విజయవంతం అయ్యేలా చేశారు.
మన భాష, సంస్కృతి మరియు సేవ పట్ల తమ అంకితభావాన్ని చాటుకున్నారు. నాట్స్ నిజంగా ఒక కుటుంబం అని వారు నిరూపించారు. అమెరికా, భారత జాతీయ గీతాలాపనతో వేడుకలు ప్రారంభమయ్యాయి. అనంతరం నాట్స్ బోర్డు చైర్మన్ కిషోర్ కంచర్ల, అధ్యక్షుడు రాజశేఖర్ అల్లాడ, కన్వెన్షన్ కమిటీ ప్రతినిధులు వేదికపై 9వ తెలుగు సంబరాల అధికారిక బ్యానర్ను ఆవిష్కరించారు. “భాషే రమ్యం — సేవే గమ్యం” నినాదంతో 2027 మే 28, 29, 30 తేదీల్లో డాలస్ వేదికగా జరగనున్న ఈ మహాసభలను చరిత్రలో నిలిచిపోయేలా నిర్వహిస్తామని నేతలు పేర్కొన్నారు. 9వ అమెరికా తెలుగు సంబరాలను ముందుండి నడిపించబోయే సమర్థవంతమైన నాయకత్వ బృందాన్ని ఈ సందర్భంగా నాట్స్ చైర్మన్ కిషోర్ కంచర్ల వారిని అందరికీ పరిచయం చేశారు.
ఈ సంబరాలకు కన్వీనర్ గా ప్రేమ్ కలిదిండి, చీఫ్ కోఆర్డినేటర్ గా అజయ్ గోవాడ, ట్రెజరర్ గా ఆది గెల్లి, సెక్రటరీగా భాను లంక వ్యవహరించనున్నారు. భాను లంక మరియు కిషోర్ నారె గార్ల మార్గదర్శకత్వంలో అవిశ్రాంతంగా పనిచేసి, నేటికీ అందరూ ప్రశంసించేలా ప్రపంచ స్థాయి టెక్సాస్ ఆతిథ్యాన్ని అందించిన డల్లాస్ చాప్టర్ బృందానికి ఈ సందర్భంగా ఆయన హృదయపూర్వక ధన్యవాదాలు తెలియజేశారు.



ఈ కార్యక్రమానికి ఫ్రిస్కో మేయర్ మార్క్ హిల్ మరియు సెలీనా మేయర్ ర్యాన్ టబ్స్లతో పాటు, నాట్స్ అడ్వైజరీ బోర్డు సభ్యులు శ్రీధర్ అప్పసాని మరియు విజయ్ శేఖర్ అన్నె గార్లు హాజరయ్యారు. వారిని ఈ సందర్భంగా ఘనంగా సత్కరించారు.
ప్రేమ్ కలిదిండి మరియు రాజ్ అల్లాడ తమ ప్రసంగాలలో నాట్స్ అసలైన ఆత్మ నిరంతర సమాజ సేవలోనే కనిపిస్తుందని చెప్పారు. అమెరికాలో నాట్స్ 24/7 హెల్ప్లైన్ మరియు విపత్తు సహాయక చర్యల నుండి, మాతృభూమి భారతదేశంలో ప్రజల జీవితాలను మార్చే అనేక సేవా కార్యక్రమాల్లో నాట్స్ ముందుంటోందని తెలిపారు. ఈ సేవా యజ్ఞానికి మద్దతుగా నిలవడానికి కిక్-ఆఫ్ వేడుకలో ఉదారంగా ముందుకు వచ్చిన ప్రతి దాతకు మరియు స్పాన్సర్కు చైర్మన్ కిషోర్ కంచర్ల హృదయపూర్వక కృతజ్ఞతలు తెలియజేశారు.
శ్రేయోభిలాషులు మరియు స్పాన్సర్లందరికీ: మీ భాగస్వామ్యమే మా సేవలకు అసలైన శక్తి అని అంటూ, 2027 డల్లాస్ సంబరాలను తెలుగు వారసత్వం మరియు సేవా నిరతికి నిదర్శనంగా అత్యంత వైభవంగా నిర్వహించడానికి అందరూ ముందుకు రావాలని పిలుపునిచ్చారు.
ఈ వేడుకల్లో ప్రముఖ సంగీత దర్శకుడు కోటి నిర్వహించిన లైవ్ మ్యూజికల్ కాన్సర్ట్ ప్రత్యేక ఆకర్షణగా నిలిచింది. ఆయన ఆలపించిన సినీ గీతాలు ఆహుతులను ఉర్రూతలూగించాయి. మరోవైపు, సంబరాల నిర్వహణ కోసం వేదికపై నుంచే నిధుల సేకరణ ప్రారంభించగా, దాతలు పెద్ద ఎత్తున విరాళాలు ప్రకటించారు. అంతకుముందు నాట్స్ నాయకత్వ బృందం డౌన్టౌన్ డాలస్లోని కన్వెన్షన్ సెంటర్ను సందర్శించి ప్రధాన వేడుకల ఏర్పాట్లను సమీక్షించింది.







