మేం చెప్పినట్లే శాంతి చర్చలుండాలి.. మొండిపట్టుదలతో అమెరికా, ఇరాన్…!
పశ్చిమాసియాలో అమెరికా, ఇజ్రాయెల్ నుంచి బెదిరింపులు, దాడులు కొనసాగుతున్న వేళ.. ఇరాన్ ఐఆర్ జీసీ గట్టి హెచ్చరికలు చేసింది. ఇరాన్ శత్రువులు ..రాబోయే రోజుల్లో మరిన్ని పరాజయాలు, అవమానాలు ఎదుర్కోవాల్సి వస్తుందని ఇరాన్ ఇస్లామిక్ రివల్యూషనరీ గార్డ్ కార్ప్స్ (IRGC) చీఫ్ అహ్మద్ వహీది హెచ్చరించారు. ఇరాన్కు చెందిన అత్యంత రహస్యమైన భూగర్భ క్షిపణి కేంద్రం (Underground Missile City)ను సందర్శించిన సందర్భంగా ఆయన ఈ వ్యాఖ్యలు చేశారు.
అమెరికా, ఇజ్రాయెల్ నుంచి పెరుగుతున్న సైనిక ఒత్తిడి నేపథ్యంలో ఇరాన్ తన సైనిక సామర్థ్యాన్ని ప్రదర్శిస్తోంది. ఇందులో భాగంగా IRGC చీఫ్ అహ్మద్ వహీది భూగర్భ క్షిపణి కేంద్రాన్ని సందర్శించారు. అక్కడ సైనిక సన్నద్ధత, ఆధునిక ఆయుధాలు, రక్షణ వ్యవస్థలపై అధికారుల నుంచి వివరాలు తెలుసుకున్నారు. శత్రువులకు ఇరాన్ ఎప్పటికీ లొంగిపోదని స్పష్టం చేశారు. ఇరాన్ భూగర్భ క్షిపణి కేంద్రాల్లో బాలిస్టిక్ క్షిపణులు, క్షిపణి ప్రయోగ వాహనాలు, ఇతర అత్యాధునిక ఆయుధాలను నిల్వ చేస్తారు. ఈ కేంద్రాలను IRGC ఏరోస్పేస్ ఫోర్స్ పర్యవేక్షిస్తుంది. ఇరాన్ క్షిపణి కార్యక్రమం, వైమానిక రక్షణ వ్యవస్థల నిర్వహణలో ఈ విభాగం కీలక పాత్ర పోషిస్తుంది.
మరోవైపు, హార్ముజ్ జలసంధిలో అమెరికాకు చెందిన MQ-9 రీపర్ డ్రోన్ను కూల్చివేసినట్లు ఇరాన్ IRGC ప్రకటించింది. కొత్తగా అభివృద్ధి చేసిన వైమానిక రక్షణ వ్యవస్థతో ఈ డ్రోన్ను ధ్వంసం చేసినట్లు పేర్కొంది.ఇప్పటివరకు మొత్తం 58 అమెరికా MQ-9 రీపర్ డ్రోన్లను కూల్చివేసినట్లు ఇరాన్ వాదిస్తోంది. MQ-9 రీపర్ అనేది అమెరికా సైన్యం ఉపయోగించే అత్యాధునిక నిఘా, దాడి సామర్థ్యం కలిగిన మానవరహిత విమానం. శత్రు స్థావరాలను పర్యవేక్షించడంతో పాటు అవసరమైనప్పుడు దాడులు చేసేందుకు దీనిని ఉపయోగిస్తారు.
ఇరాన్పై మరిన్ని సైనిక బెదిరింపులు వస్తే ప్రతిఘటించేందుకు సిద్ధంగా ఉన్నామని IRGC ప్రకటించింది. బ్రిగేడియర్ జనరల్ హుస్సేన్ మొహెబ్బీ మాట్లాడుతూ.. యుద్ధం, శాంతి మధ్య అనిశ్చిత పరిస్థితిని ఇరాన్ నిరవధికంగా కొనసాగించబోదని తెలిపారు. ఈ సమస్యకు సైనిక పరిష్కారం లభించాల్సి ఉంటుందని లేదా అమెరికా ఇరాన్ షరతులను అంగీకరించాల్సి ఉంటుందని ఆయన వ్యాఖ్యానించారు.
2025 జూన్లో జరిగిన 12 రోజుల యుద్ధం తర్వాత ఇరాన్ కనీసం మూడు కొత్త వైమానిక రక్షణ వ్యవస్థలను అభివృద్ధి చేసినట్లు ఆయన పేర్కొన్నారు. తమ రక్షణ సామర్థ్యాలను పెంచేందుకు సైనిక నిపుణులు నిరంతరం పనిచేస్తున్నారని తెలిపారు. ఇదిలా ఉండగా, నవంబర్ 15న బహ్రెయిన్లోని అల్-రిఫా హెలికాప్టర్ స్థావరంలో ఉన్న అమెరికా వైమానిక రక్షణ రాడార్పై ఆరు డ్రోన్లతో దాడి చేసినట్లు IRGC ప్రకటించింది. అయితే ఇరాన్ నుంచి జరిగిన పలు దాడులను తమ వైమానిక రక్షణ వ్యవస్థలు అడ్డుకున్నాయని బహ్రెయిన్ వెల్లడించింది.
మరోవైపు అమెరికా అధ్యక్షుడు డొనాల్డ్ ట్రంప్ ఇరాన్తో ఒప్పందం చేసుకోవడానికి సిద్ధంగా ఉన్నట్లు ప్రకటించినప్పటికీ, తమ షరతులకు అనుగుణంగానే ఒప్పందం ఉండాలని స్పష్టం చేశారు. వైట్హౌస్లో మాట్లాడుతూ.. ఇరాన్తో మంచి ఒప్పందం చేసుకోవాలనుకుంటున్నామని, కానీ చెడు ఒప్పందానికి అంగీకరించబోమని ట్రంప్ అన్నారు. ఇరాన్ అణ్వాయుధాన్ని కలిగి ఉండటానికి అమెరికా అనుమతించదని, అవసరమైతే సైనిక చర్యకు కూడా వెనుకాడబోమని హెచ్చరించారు.







