గ్రేటర్ టొరంటో తెలుగు సాంస్కృతిక సంఘం ఆధ్వర్యంలో ఘనంగా తెలుగు భాషా దినోత్సవం..

కెనడాలోని టొరంటోలో తెలుగు భాషా దినోత్సవం , గిడుగు వెంకట రామమూర్తి జయంతి వేడుకలను ‘తెలుగు కల్చరల్ అసోసియేషన్ ఆఫ్ గ్రేటర్ టొరంటో’ (TCAGT) ఆధ్వర్యంలో ఆగస్టు 30, 2026న మిస్సిసాగా వ్యాలీ కమ్యూనిటీ సెంటర్ ఆడిటోరియంలో అత్యంత ఘనంగా నిర్వహించారు. గ్రేటర్ టొరంటో ప్రాంతం నలుమూలల నుంచి విచ్చేసిన తెలుగు కుటుంబాలు ఈ వేడుకల్లో పెద్ద సంఖ్యలో పాల్గొని మన భాషా, సాహిత్య వారసత్వాన్ని వేడుకగా జరుపుకున్నాయి. ఈ ప్రత్యేక వేదికపై ప్రముఖ కవి, రచయిత, విద్యావేత్త , సామాజిక వేత్త శ్రీ బండ్ల మాధవరావు గారిని ఘనంగా సత్కరించారు.

ఈ కార్యక్రమం TCAGT కార్యదర్శి ప్రవళిక కూన ఆత్మీయ స్వాగతంతో ప్రారంభమైంది. ఆమె విశిష్ట అతిథులను, సంఘ కార్యవర్గ సభ్యులను వేదికపైకి ఆహ్వానించారు. ఈ వేడుకలో TCAGT అధ్యక్షులు శివ యెల్లాల, బోర్డ్ ఆఫ్ ట్రస్టీస్ సభ్యురాలు దేవి చౌదరి, సీనియర్ అడ్వైజర్ సూర్య బెజవాడ, ముఖ్య అతిథి శ్రీ బండ్ల మాధవరావు గారు, ప్రత్యేక గౌరవ అతిథి శ్రీ రియాజ్ అలీ గారు పాల్గొన్నారు.

ప్రారంభోపన్యాసంలో TCAGT అధ్యక్షులు శివ యెల్లాల మాట్లాడుతూ.. కెనడాలో తెలుగు భాష, సంస్కృతి, సాహిత్య సంప్రదాయాలను పరిరక్షించి ప్రోత్సహించడమే తమ సంఘం ప్రధాన లక్ష్యమని పేర్కొన్నారు. తెలుగు భాషా దినోత్సవ చారిత్రక ప్రాధాన్యతను వివరించిన ఆయన, సామాన్య ప్రజలకు తెలుగు భాషను చేరువ చేసిన గిడుగు రామమూర్తి పంతులు చేసిన విశిష్ట కృషికి నివాళులర్పించారు. అలాగే TCAGT వ్యవస్థాపకుల ఆశయాలను గుర్తుచేస్తూ.. భావితరాల్లో తెలుగు భాష, సంస్కృతి, అస్తిత్వంపై మరింత అవగాహన పెంపొందించేందుకు సంఘం నిరంతరం కృషి చేస్తుందని తెలిపారు.

బోర్డ్ ఆఫ్ ట్రస్టీస్ సభ్యురాలు దేవి చౌదరి శ్రీ బండ్ల మాధవరావు గారి సాహిత్య రచనలపై తన అభిమానాన్ని వ్యక్తం చేస్తూ, ఆయన రచనలు పాఠకులపై చూపిన గాఢమైన ప్రభావాన్ని వివరించారు. ఆయన ప్రసిద్ధ కవితా సంపుటి “పొలంగట్ల వెంట” నుంచి కొన్ని కవితలను పఠించి, తనను భావోద్వేగానికి గురిచేసిన అంశాలను ప్రస్తావించారు.

సీనియర్ అడ్వైజర్ సూర్య బెజవాడ అతిథులకు స్వాగతం పలుకుతూ.. TCAGTతో తనకు ఉన్న రెండు దశాబ్దాలకు పైబడిన అనుబంధాన్ని గుర్తుచేసుకున్నారు. కెనడాలోని తెలుగు కుటుంబాల్లో సాంస్కృతిక చైతన్యాన్ని పెంపొందించడంలో, కమ్యూనిటీ నెట్‌వర్క్‌ను అభివృద్ధి చేయడంలో, పిల్లలకు తెలుగు భాషను నేర్పించడంలో TCAGT పోషించిన విలువైన పాత్రను వివరించారు. ఇటీవల ఆంధ్రప్రదేశ్ ప్రభుత్వం ద్వారా APNRT స్టేట్ కోఆర్డినేటర్లలో ఒకరిగా కెనడాకు నియమితులైన శ్రీ రియాజ్ అలీ గారిని ఈ సందర్భంగా ఘనంగా సత్కరించారు. TCAGT లైఫ్ మెంబర్‌గా, మాజీ కార్యవర్గ సభ్యుడిగా ఆయన అందించిన సేవలను గుర్తుచేసుకుంటూ, కార్యదర్శి ప్రవల్లిక కూన, ట్రస్టీ దేవి చౌదరి ఆయనను శాలువా, పుష్పగుచ్చంతో సన్మానించారు.

ముఖ్య అతిథి శ్రీ బండ్ల మాధవరావు గారిని పరిచయం చేస్తూ సూర్య బెజవాడ మాట్లాడుతూ.. అమెరికాకు చెందిన ప్రముఖ సాహితీ అభిమాని శ్రీ తోటకూర ప్రసాద్ గారు , పద్మభూషణ్ అవార్డు గ్రహీత, ప్రొఫెసర్ డాక్టర్ యార్లగడ్డ లక్ష్మీప్రసాద్ గారు ఆయన పేరును TCAGTకి విశేషంగా సిఫారసు చేశారని తెలిపారు.

కెనడాలో తెలుగు భాష, సంస్కృతిని పరిరక్షించేందుకు TCAGT నాయకత్వం, వాలంటీర్లు చేస్తున్న కృషిని బండ్ల మాధవరావు గారు అభినందించారు. ప్రవాస భారతీయులు తాము నివసిస్తున్న దేశాల అభివృద్ధికి, మాతృభూమి అభ్యున్నతికి కూడా తమ వంతు బాధ్యత నిర్వర్తించాలని పిలుపునిచ్చారు. తన ప్రసిద్ధ రచన “పొలంగట్ల వెంట”లోని “ఏడాదికొక సారైనా”, “బతుకు తెరవైంది” వంటి ప్రముఖ కవితలను ప్రస్తావిస్తూ వాటిలోని లోతైన సామాజిక, తాత్విక భావాలను వివరించారు. ఆయన వాగ్ధాటి సభికులను విశేషంగా ఆకట్టుకుంది.

అనంతరం జరిగిన ప్రశ్నోత్తర కార్యక్రమంలో సభికులు అడిగిన వివిధ ప్రశ్నలకు బండ్ల మాధవరావు గారు ఎంతో స్పష్టతతో, ఉత్సాహంగా సమాధానాలు ఇచ్చారు. శ్రీ బండ్ల మాధవరావు గారి విశిష్ట సాహిత్య సేవలకు గుర్తింపుగా TCAGT అధ్యక్షులు శివ యెల్లాల, సీనియర్ అడ్వైజర్ సూర్య బెజవాడ కలిసి ఆయనను, ఆయన సతీమణి డాక్టర్ ఉమారాణి గారిని సంప్రదాయ శాలువాలు, పుష్పగుచ్చాలతో ఘనంగా సత్కరించారు. అధ్యక్షులు శివ యెల్లాల మాట్లాడుతూ.. www.telugutoronto.com వెబ్‌సైట్‌ను సందర్శించి సంఘం వివరాలు తెలుసుకోవాలని కోరారు.

పద్మిని యెల్లాల, కోశాధికారి తేజ వాఝా, మౌనిక, నవీన్ వడ్లమూడి, శ్రీనివాస్ కాడి, శరత్ కూన, సూరజ్ పెండం , అనేక మంది వాలంటీర్లు ఈ కార్యక్రమ విజయానికి విశేషంగా కృషి చేశారు. కార్యదర్శి ప్రవల్లిక కూన వందన సమర్పణ చేస్తూ అతిథులు, వాలంటీర్లు, స్పాన్సర్లు , బంజారా రెస్టారెంట్ రాజేష్ విరెల్లా, బెజ్ బజార్ అనిత బెజవాడలకు కృతజ్ఞతలు తెలిపారు. సభికులు సంప్రదాయ మసాలా టీ, స్వీట్లు, అల్పాహారాన్ని ఆస్వాదిస్తూ తెలుగు భాషా, సాహిత్య విశేషాలపై ఉత్సాహంగా చర్చించుకున్నారు. ఈ వేడుక భావితరాలకు తెలుగు వారసత్వాన్ని అందించాల్సిన బాధ్యతను గుర్తుచేసిన స్ఫూర్తిదాయక కార్యక్రమంగా నిలిచింది.