నెక్ట్స్ లెవెల్ లో పెద్ది ఓపెనింగ్స్

గ్లోబల్ స్టార్ రామ్ చరణ్(ram charan) నటించిన పెద్ది(peddi) రిలీజ్ కు రోజులు దగ్గరపడుతున్న కొద్దీ సినిమా చుట్టూ ఉన్న హైప్ మరింత పెరుగుతోంది. ఇప్పటికే ప్రమోషనల్ కంటెంట్ ప్రేక్షకుల్లో మంచి ఆసక్తిని రేకెత్తించగా, ఓవర్సీస్ మార్కెట్‌లో ప్రారంభమైన అడ్వాన్స్ బుకింగ్స్ ఆ ఉత్సాహాన్ని మరో స్థాయికి తీసుకెళ్లాయి. ముఖ్యంగా అమెరికాలో టికెట్లకు వస్తున్న రెస్పాన్స్ ట్రేడ్ వర్గాల దృష్టిని ఆకర్షిస్తోంది. ప్రీ సేల్స్ ట్రెండ్‌ను పరిశీలిస్తే, రామ్ చరణ్ కెరీర్‌లోనే అత్యంత బలమైన ఓపెనింగ్స్ అందుకునే సినిమాల్లో పెద్ది ఒకటిగా నిలిచే అవకాశాలు కనిపిస్తున్నాయని సినీ విశ్లేషకులు అభిప్రాయపడుతున్నారు.

ఇదిలా ఉండగా, ఏపీ ప్ర‌భుత్వం సినిమా రిలీజ్ నేప‌థ్యంలో ప్రత్యేక వెసులుబాట్లు కల్పించడం కూడా కలెక్షన్ల అంచనాలను మరింత పెంచింది. రిలీజ్ కు ముందు నిర్వహించే ప్రత్యేక ప్రీమియర్ షోలకు అనుమతులు లభించడంతో పాటు, టికెట్ ధరల్లో తాత్కాలిక పెంపుకు గ్రీన్ సిగ్నల్ ఇచ్చింది. తొలి వారం పాటు అదనపు ధరలతో టికెట్లు విక్రయించే అవకాశం ఉండటంతో నిర్మాతలకు భారీ ఆదాయం వచ్చే అవకాశం ఉందని ట్రేడ్ వర్గాలు భావిస్తున్నాయి. పెద్ద సినిమాల విషయంలో ఇలాంటి నిర్ణయాలు ప్రారంభ వసూళ్లపై గణనీయమైన ప్రభావం చూపుతాయన్నది ఎన్నోసార్లు చూశాం.

అయితే ఇప్పుడు అందరి దృష్టి తెలంగాణ ప్రభుత్వ నిర్ణయంపైనే నిలిచింది. తెలంగాణ‌లో కూడా ప్రత్యేక షోలు, టికెట్ ధరల పెంపునకు అనుమతి లభిస్తే పెద్ది బాక్సాఫీస్ ప్రయాణం మరింత దూకుడుగా మారే అవకాశాలు ఉన్నాయి. రెండు తెలుగు రాష్ట్రాల్లో ఒకే విధమైన సౌకర్యాలు అమల్లోకి వస్తే తొలి రోజు నుంచి వీకెండ్ ముగిసే వరకు వసూళ్లు భారీ స్థాయిలో నమోదయ్యే అవకాశం ఉందని ట్రేడ్ నిపుణులు అంచనా వేస్తున్నారు. దీంతో విడుదలకు ముందే పెద్ది చుట్టూ రికార్డుల చర్చ ప్రారంభమైంది.