టాలీవుడ్‌కు ఆగస్టు జోష్.. వరుస హిట్లతో కళకళలాడిన థియేటర్లు!

కొంతకాలంగా వరుస ఫ్లాపులు, ఆశించిన స్థాయిలో రిలీజులు లేకపోవడంతో టాలీవుడ్ ఇండ‌స్ట్రీ తీవ్ర ఒత్తిడిని ఎదుర్కొంది. ప్రేక్షకుల రాక తగ్గడంతో పలు ప్రాంతాల్లో థియేటర్లు మూతపడే పరిస్థితి కూడా ఏర్పడింది. అయితే జూన్, జూలై నెలల్లో వచ్చిన కొన్ని స‌క్సెస్‌లు మార్కెట్‌లో క్రమంగా కదలిక తీసుకురాగా, ఆగస్టు నెల మాత్రం టాలీవుడ్‌కు మరింత ఊరటనిచ్చింది. విభిన్న జానర్లలో వచ్చిన సినిమాలు ఆడియ‌న్స్‌ను ఆకట్టుకోవడంతో నిర్మాతలు, డిస్ట్రిబ్యూటర్లు, ఎగ్జిబిటర్లలో మళ్లీ ఆశలు చిగురించాయి.

ఆగ‌స్ట్ నెల మొద‌ట్లో వరుణ్ తేజ్(Varun Tej) నటించిన కొరియన్ కనకరాజు(Korean Kanakaraju) మంచి ఫలితాన్ని అందించి ఆయన కెరీర్‌కు ఊరటనిచ్చింది. లోకేష్ కనగరాజ్(Lokesh Kanagaraj) హీరోగా పరిచయమైన డీసీ(DC) కూడా ఊహించని స్థాయిలో ప్రేక్షకాదరణ పొందగా, తెలుగు మార్కెట్‌లో ప్రత్యేకంగా మంచి క‌లెక్ష‌న్లు సాధించింది. ఇండిపెండెంట్ డే వీకెండ్ లో వచ్చిన సూర్య(Suriya) సినిమా విశ్వనాథ్ అండ్ సన్స్(Vishwanath & Sons) స‌క్సెస్‌ఫుల్ గా దూసుకెళ్తోంది. అయితే ఈ నెలలో అసలైన సెన్సేష‌న్ రవితేజ(Raviteja) నటించిన ఇరుముడి(Irumudi). భారీ ఓపెనింగ్స్‌తో మొద‌లైన ఈ సినిమా ఏడాది అతిపెద్ద స‌క్సెస్‌ల్లో ఒకటిగా నిలిచి ట్రేడ్ వర్గాలను ఆశ్చర్యపరిచింది.

అయితే ఆగస్టు మొత్తం స‌క్సెస్‌లే కాదు. భారీ అంచనాలతో వచ్చిన యష్‌(Yash) టాక్సిక్(Toxic) ఆడియ‌న్స్ ను ఆకట్టుకోవడంలో విఫలమవడంతో నిర్మాతలకు భారీ నష్టం మిగిలే పరిస్థితి కనిపిస్తోంది. అగాధ(Agadha), కేజేక్యూ(KJQ), పల్లబురుసు(Pallaburusu), మకుటం(Makutam) వంటి సినిమాలు కూడా ఆశించిన ఫలితాన్ని అందుకోలేకపోయాయి. అయినప్పటికీ స‌క్సెస్‌ఫుల్ సినిమాలు థియేటర్లకు ప్రేక్షకులను మళ్లీ తీసుకురావడం టాలీవుడ్‌కు అత్యంత సానుకూల పరిణామంగా మారింది. మొత్తంగా చూస్తే ఆగస్టు నెల తెలుగు సినిమా పరిశ్రమకు కొత్త ఉత్సాహాన్ని, మిగిలిన నెలలపై భారీ ఆశలను అందించింది.