100 కోట్ల మందితో చాట్‌జీపీటీ చరిత్ర.. కానీ ఆ ఒక్క ఏఐతో ముప్పు?

ప్రపంచ టెక్నాలజీ చరిత్రలో సరికొత్త అధ్యాయం మొదలైంది. స్మార్ట్‌ఫోన్ చేతిలో ఉన్న ప్రతి ఒక్కరూ ఇప్పుడు ఆర్టిఫిషియల్ ఇంటెలిజెన్స్ (AI) మాయలో పడిపోయారు. ఈ క్రమంలో ప్రముఖ ఏఐ దిగ్గజం ఓపెన్ఏఐ (OpenAI) సృష్టించిన ‘చాట్‌జీపీటీ’ (ChatGPT) కనీవినీ ఎరుగని రీతిలో ఒక మహా అద్భుతాన్ని సాధించింది. సాంకేతిక ప్రపంచంలో నిన్నటిదాకా ఉన్న పాత రికార్డులన్నింటినీ తుడిచిపెట్టేస్తూ ఏఐ సింహాసనాన్ని అధిష్టించింది.

మూడేళ్లలోపే అసాధారణ రికార్డు
మార్కెట్ ఇంటెలిజెన్స్ సంస్థ ‘సెన్సార్ టవర్’ వెల్లడించిన తాజా డేటా ప్రకారం.. చాట్‌జీపీటీ (ChatGPT) ప్రపంచవ్యాప్తంగా ఏకంగా 100 కోట్ల (1 బిలియన్) మంది నెలవారీ యాక్టివ్ యూజర్ల (MAU) మైలురాయిని దాటేసింది. సాధారణంగా ఏ సాఫ్ట్‌వేర్ యాప్‌కైనా ఇంత భారీ స్థాయిలో యూజర్ బేస్ రావాలంటే దశాబ్దాల సమయం పడుతుంది. కానీ చాట్‌జీపీటీ కేవలం మూడేళ్లలోనే ఈ టార్గెట్‌ను అందుకోవడం టెక్ పండితులను సైతం విస్మయానికి గురిచేస్తోంది. మనం రోజువారీగా వాడే గూగుల్ మ్యాప్స్, ఇన్‌స్టాగ్రామ్, యూట్యూబ్, టిక్‌టాక్ లాంటి గ్లోబల్ దిగ్గజ యాప్‌లు నెలకొల్పిన రికార్డులను చాట్‌జీపీటీ (ChatGPT) అవలీలగా దాటేసి, ప్రపంచంలోనే ‘అత్యంత వేగంగా విస్తరించిన యాప్‌’గా చరిత్రకెక్కింది. విద్యార్థుల అసైన్‌మెంట్ల నుంచి మొదలుపెడితే, కార్పొరేట్ ఆఫీసుల్లో ఈమెయిల్స్, సాఫ్ట్‌వేర్ కోడింగ్ వరకు ప్రతీదానికీ జనాలు ఏఐ టూల్స్‌పై ఆధారపడటమే ఈ సునామీ లాంటి వృద్ధికి అసలు కారణం.

వెనుక నుంచి దూసుకొస్తున్న ‘క్లాడ్’
ఒకవైపు చాట్‌జీపీటీ (ChatGPT) విజయ దుందుభి మోగిస్తుంటే, మరోవైపు దానికి చెక్ పెట్టేందుకు ఓపెన్ఏఐ ప్రధాన ప్రత్యర్థి ‘ఆంథ్రోపిక్’ (Anthropic) సైలెంట్‌గా పావులు కదుపుతోంది. ఆ సంస్థ తీసుకొచ్చిన ‘క్లాడ్’ (Claude) యాప్ ఇప్పుడు ఏఐ మార్కెట్లో హాట్ టాపిక్. ప్రస్తుతం క్లాడ్ నెలకు 56 మిలియన్ల యూజర్లను మాత్రమే కలిగి ఉన్నప్పటికీ, దాని వృద్ధి రేటు చూస్తే ఎవరికైనా మైండ్ బ్లాంక్ అవ్వాల్సిందే. ఎందుకంటే చాట్‌జీపీటీ వార్షిక యూజర్ల వృద్ధి 62 శాతంగా ఉంటే.. క్లాడ్ ఏకంగా 640 శాతంతో రాకెట్ వేగంతో దూసుకుపోతోంది. సంఖ్యాపరంగా క్లాడ్ ప్రస్తుతం వెనుకబడి ఉన్నా, దాని దూకుడు మున్ముందు చాట్‌జీపీటీకి అతిపెద్ద ముప్పుగా మారే అవకాశం ఉందని ఇండస్ట్రీ వర్గాలు విశ్లేషిస్తున్నాయి.

ఇక అసలు వార్ వాల్‌స్ట్రీట్‌లోనే!
ఈ రెండు దిగ్గజ సంస్థల మధ్య ఆధిపత్య పోరు కేవలం యూజర్లకే పరిమితం కాలేదు. ఇప్పుడు ఏకంగా స్టాక్ మార్కెట్ పెట్టుబడిదారుల దృష్టిని ఆకర్షించే స్థాయికి చేరింది. ఆర్థిక వర్గాల సమాచారం ప్రకారం, ఆంథ్రోపిక్ సంస్థ ఇప్పటికే అమెరికాలో తన ఇనీషియల్ పబ్లిక్ ఆఫరింగ్ (IPO) కోసం అధికారికంగా దరఖాస్తు చేసింది. మరోవైపు ఓపెన్ఏఐ కూడా ఏమాత్రం వెనక్కి తగ్గకుండా, రాబోయే కొద్ది వారాల్లోనే (ChatGPT) ఐపీఓ దిశగా కీలక అడుగులు వేయబోతున్నట్లు వాల్‌స్ట్రీట్‌లో జోరుగా ప్రచారం సాగుతోంది. మొత్తానికి ఏఐ రంగంలో యూజర్ల మనసు గెలవడంతో పాటు, పెట్టుబడిదారుల జేబులు నింపే అసలైన కార్పొరేట్ వార్ ఇప్పుడు సరికొత్త మలుపు తిరుగుతోంది.