Bitcoin Crash 2026: క్రిప్టో మార్కెట్‌లో ‘బ్లాక్ థర్స్ డే’.. 15 నెలల కనిష్టానికి పడిపోయిన బిట్‌కాయిన్! భారీ పతనం తప్పదా?

Bitcoin Plummets To 15 Month Low Amid Global Market Turmoil Is A Crash To 10000 Next

Published By: Vishal
February 5, 2026 / 03:36 PM IST

Bitcoin Crash 2026: అంతర్జాతీయ మార్కెట్లలో నెలకొన్న అనిశ్చితి వల్ల క్రిప్టో ప్రపంచం అతలాకుతలమవుతోంది. ప్రపంచంలోనే అతిపెద్ద డిజిటల్ కరెన్సీ అయిన బిట్‌కాయిన్ (Bitcoin) విలువ 15 నెలల కనిష్ట స్థాయి $71,000 (సుమారు ₹59 లక్షలు) కు పడిపోయింది. గతేడాది అక్టోబర్‌లో $1,26,000 వద్ద ఉన్న తన ఆల్‌టైమ్ హై రికార్డు నుండి బిట్‌కాయిన్ ఇప్పటి వరకు ఏకంగా 42% మేర విలువను కోల్పోయింది. కేవలం గత వారం రోజుల్లోనే ఇన్వెస్టర్లు సుమారు $460 బిలియన్ల సంపదను కోల్పోవడం గమనార్హం.

పతనానికి ప్రధాన కారణాలు:

నిపుణుల విశ్లేషణ ప్రకారం, ఈ పతనానికి క్రిప్టో నెట్‌వర్క్‌లో సమస్యలు కారణం కాదు. అంతర్జాతీయంగా టెక్నాలజీ స్టాక్స్‌లో కనిపిస్తున్న అమ్మకాల ఒత్తిడి, బిట్‌కాయిన్ ఈటీఎఫ్ (ETF) ల నుండి భారీగా నిధులు వెనక్కి వెళ్లడం మార్కెట్‌ను దెబ్బతీశాయి. ముఖ్యంగా అమెరికా ఫెడరల్ రిజర్వ్ బాధ్యతలను కఠిన నిర్ణయాలు తీసుకునే కెవిన్ వార్ష్‌కు అప్పగించాలనే డొనాల్డ్ ట్రంప్ నిర్ణయం ఇన్వెస్టర్లలో ఆందోళన నింపింది. దీనివల్ల వడ్డీ రేట్ల తగ్గింపు నెమ్మదించే అవకాశం ఉందన్న వార్తలు మార్కెట్లను వణికించాయి.

బ్లూమ్‌బెర్గ్ విశ్లేషకుల సంచలన హెచ్చరిక:

ప్రస్తుత పరిస్థితులపై బ్లూమ్‌బెర్గ్ ఇంటెలిజెన్స్ వ్యూహకర్త మైక్ మెక్‌గ్లోన్ మరింత ఆందోళనకరమైన అంచనాలను వెలువరించారు. ప్రస్తుత గందరగోళం 2008 నాటి ప్రపంచ ఆర్థిక సంక్షోభాన్ని తలపిస్తోందని ఆయన పేర్కొన్నారు. ఒకవేళ ఇదే ధోరణి కొనసాగితే, బిట్‌కాయిన్ ధర మరో 87% మేర పతనమై $10,000 స్థాయికి కూడా పడిపోయే ప్రమాదం ఉందని హెచ్చరించారు. మైక్రోసాఫ్ట్ వంటి దిగ్గజ కంపెనీల మార్కెట్ విలువ భారీగా తగ్గడం, ఇరాన్-అమెరికా మధ్య నెలకొన్న భౌగోళిక ఉద్రిక్తతలు ఈ పతనానికి ఆజ్యం పోస్తున్నాయి.

మున్ముందు ధర ఎలా ఉండబోతోంది?

ప్రస్తుతం బిట్‌కాయిన్‌కు $72,000 స్థాయి కీలకమైన సపోర్ట్‌గా ఉండేది, కానీ ధర అంతకంటే దిగువకు పడిపోవడంతో అది $68,000 లేదా $64,000 వరకు వెళ్లవచ్చని విశ్లేషకులు భావిస్తున్నారు. మార్కెట్ ప్రస్తుతం ‘బేరిష్’ (తగ్గుదల) ట్రెండ్‌లో ఉన్నందున, ఇన్వెస్టర్లు వేచి చూసే ధోరణిని అవలంబించడం మంచిదని నిపుణులు సూచిస్తున్నారు. రాబోయే వారంలో విడుదలయ్యే అమెరికా ఉపాధి గణాంకాలు, టెక్ దిగ్గజాల ఆదాయ నివేదికలు క్రిప్టో భవిష్యత్తును నిర్ణయించనున్నాయి.

వాట్సప్‌లో ఫాలో అవ్వండి