Alphabet Q4 2025 Results: టెక్ ప్రపంచంలో సరికొత్త చరిత్ర సృష్టించిన గూగుల్ మాతృ సంస్థ.. తొలిసారిగా ఆ మైలురాయిని దాటిన ఆల్ఫాబెట్!

Alphabet Makes History With Over 400 Billion In Annual Revenue Driven By Ai And Cloud

Published By: Vishal
February 5, 2026 / 04:25 PM IST

Alphabet Q4 2025 Results: ప్రపంచ టెక్ దిగ్గజం ఆల్ఫాబెట్ (Alphabet Inc.) ఆర్థిక ఫలితాల్లో అద్భుతమైన వృద్ధిని కనబరిచింది. 2025 ఆర్థిక సంవత్సరం నాలుగో త్రైమాసికంలో (Q4) మార్కెట్ అంచనాలను తలకిందులు చేస్తూ ఏకీకృత ఆదాయంలో 18% వృద్ధిని నమోదు చేసింది. ఈ క్రమంలో కంపెనీ మొత్తం ఆదాయం $113.8 బిలియన్లకు చేరగా, నికర లాభం 30% పెరిగి $34.5 బిలియన్లుగా నమోదైంది.

చారిత్రాత్మక మైలురాయి:

ఆల్ఫాబెట్ చరిత్రలోనే మొదటిసారిగా వార్షిక ఆదాయం $400 బిలియన్ల (సుమారు ₹33 లక్షల కోట్లు) మార్కును దాటింది. కృత్రిమ మేధస్సు (AI) రంగంలో గూగుల్ చేస్తున్న భారీ పెట్టుబడులు ఇప్పుడు ఆదాయ వనరులుగా మారుతున్నాయని ఈ ఫలితాలు నిరూపిస్తున్నాయి. ముఖ్యంగా జెమిని 3 (Gemini 3) విడుదల తర్వాత వినియోగదారుల సంఖ్య, సంస్థల ఆసక్తి అనూహ్యంగా పెరిగిందని సీఈఓ సుందర్ పిచాయ్ పేర్కొన్నారు.

వృద్దికి దోహదపడిన కీలక విభాగాలు:

గూగుల్ క్లౌడ్: ఈ విభాగం అత్యంత వేగంగా వృద్ధి చెందుతూ 48% ఆదాయ పెరుగుదలతో $17.7 బిలియన్లను ఆర్జించింది. ఏఐ మౌలిక సదుపాయాల కోసం కంపెనీలు గూగుల్ క్లౌడ్‌ను ఆశ్రయించడమే దీనికి ప్రధాన కారణం.

యూట్యూబ్ , సెర్చ్: గూగుల్ సెర్చ్ విభాగం ఆదాయం 17% పెరగ్గా, యూట్యూబ్ ప్రకటనల ఆదాయం కూడా 9% వృద్ధిని సాధించింది. యూట్యూబ్ వార్షిక ఆదాయం ఏకంగా $60 బిలియన్లను దాటి రికార్డు సృష్టించింది.

చెల్లింపు సేవలు: గూగుల్ వన్, యూట్యూబ్ ప్రీమియం వంటి సేవలకు ప్రస్తుతం ప్రపంచవ్యాప్తంగా 325 మిలియన్ల మంది పెయిడ్ సభ్యులు ఉన్నారు.

ముందడుగు, సవాళ్లు:

డిసెంబర్‌లో ప్రారంభమైన జెమిని యాప్ ప్రస్తుతం నెలకు 750 మిలియన్ల యాక్టివ్ యూజర్లను కలిగి ఉంది. అయితే, రాబోయే 2026 సంవత్సరంలో ఏఐ అవసరాల కోసం మరిన్ని డేటా సెంటర్లను నిర్మించేందుకు ఆల్ఫాబెట్ దాదాపు $175 – $185 బిలియన్ల పెట్టుబడి (CapEx) పెట్టాలని నిర్ణయించింది. సెల్ఫ్ డ్రైవింగ్ విభాగం ‘వేమో’ (Waymo) కోసం కొంత మేర అదనపు ఖర్చులు అయినప్పటికీ, మొత్తం మీద నిర్వహణ మార్జిన్ 31.6% వద్ద స్థిరంగా ఉండటం సానుకూల అంశం.

మొత్తానికి, గూగుల్ తన ఇంటర్నెట్ సామ్రాజ్యాన్ని ఏఐ మంత్రాన్ని జోడించి మరింత పటిష్టం చేసుకుంటోంది. ఎలాన్ మస్క్ వంటి ప్రముఖులు కూడా సుందర్ పిచాయ్ నేతృత్వంలోని గూగుల్ సాధించిన ఈ ఘనతను అభినందించడం విశేషం.

వాట్సప్‌లో ఫాలో అవ్వండి