చిన్న నగరాల్లోనూ ‘ప్రీమియం’ కొనుగోళ్ల జోరు.. వెల్లడించిన అమెజాన్

దేశవ్యాప్తంగా వినియోగదారుల కొనుగోలు ధోరణిలో (Purchasing Trends) భారీ మార్పులు కనిపిస్తున్నాయి. మొన్నటివరకు కేవలం మెట్రో నగరాలకే పరిమితమైన ‘ప్రీమియం’ (Premium) ఉత్పత్తుల మోజు.. ఇప్పుడు చిన్న నగరాలకు సైతం వేగంగా విస్తరిస్తోంది. ప్రముఖ ఈ-కామర్స్ సంస్థ ‘అమెజాన్’ (Amazon) ఇటీవల నిర్వహించిన ‘ప్రైమ్ డే సేల్’ (Prime Day Sale)లో నమోదైన కొనుగోళ్ల గణాంకాలు ఈ విషయాన్ని స్పష్టం చేస్తున్నాయి. కస్టమర్లు బడ్జెట్ ఉత్పత్తుల కంటే హై-ఎండ్, ఖరీదైన వస్తువులను కొనుగోలు చేసేందుకే ఎక్కువగా ఆసక్తి చూపించినట్లు కంపెనీ వెల్లడించింది.

టైర్-2, టైర్-3 నగరాల కస్టమర్ల హవా..
ఈ ఏడాది అమెజాన్ (Amazon) ప్రైమ్ డే సేల్‌లో ఏయే కేటగిరీల్లో ఎంత స్థాయిలో వృద్ధి నమోదైందో కింది గణాంకాలు స్పష్టం చేస్తున్నాయి:

ప్రీమియం మోటార్‌సైకిళ్లు: హార్లీ-డేవిడ్‌సన్ (Harley-Davidson), కేటీఎం (KTM), ట్రయంఫ్ (Triumph), రాయల్ ఎన్‌ఫీల్డ్ (Royal Enfield) వంటి అగ్రశ్రేణి బ్రాండ్లకు చెందిన రూ. 1.5 లక్షలకు పైగా ధర ఉన్న ప్రీమియం బైక్‌ల అమ్మకాలు రికార్డు స్థాయిలో 2.3 రెట్లు పెరిగాయి. ఆశ్చర్యకరమైన విషయం ఏమిటంటే.. వీటిని కొనుగోలు చేసిన వారిలో 70 శాతం మంది టైర్-2, టైర్-3 (చిన్న) నగరాల వినియోగదారులే కావడం విశేషం.

స్మార్ట్ టీవీలు (Smart TVs): వినోదం కోసం కస్టమర్లు భారీగా ఖర్చు చేస్తున్నారు. రూ. 35 వేలకు పైగా విలువైన టీవీల విక్రయాలు గతేడాదితో పోలిస్తే ఈసారి రెట్టింపు అయ్యాయి. ముఖ్యంగా 65 అంగుళాలు, అంతకంటే పెద్ద స్క్రీన్ సైజు ఉన్న టీవీలకు మార్కెట్లో అత్యధిక డిమాండ్ కనిపించింది.

బ్యూటీ & గ్రూమింగ్: కస్టమర్లలో వ్యక్తిగత సంరక్షణ పట్ల అవగాహన పెరిగింది. ఈ సేల్‌లో ప్రీమియం బ్యూటీ ఉత్పత్తుల అమ్మకాలు ఏకంగా మూడు రెట్లు (3x) పెరిగాయి. అలాగే రూ. 2,500కు పైగా ధర పలికే గ్రూమింగ్ (Grooming) ఉత్పత్తుల విక్రయాలు సైతం రెట్టింపు నమోదయ్యాయి.

హై-ఎండ్ ఉత్పత్తులపైనే ఆసక్తి..
కేవలం వాహనాలు, బ్యూటీ ప్రొడక్ట్స్ మాత్రమే కాకుండా ఇతర అత్యాధునిక ఎలక్ట్రానిక్ గ్యాడ్జెట్స్, హోమ్ అప్లయెన్సెస్‌కు సైతం ఈ (Amazon) సేల్‌లో విపరీతమైన ఆదరణ లభించింది.

ఆర్టిఫిషియల్ ఇంటెలిజెన్స్ (AI) ఆధారిత పర్సనల్ ల్యాప్‌టాప్‌లు, రోబోటిక్ వాక్యూమ్ క్లీనర్లు, కాఫీ మెషీన్లు, స్మార్ట్ వాటర్ ప్యూరిఫైయర్లు, ఇంటర్నేషనల్ కిచెన్ బ్రాండ్లు మరియు ప్రీమియం ట్రావెల్ లగేజీ వంటి హై-ఎండ్ ప్రొడక్ట్స్‌ను కొనుగోలు చేసేందుకు భారతీయులు ఏమాత్రం వెనుకాడలేదని అమెజాన్ (Amazon) తన నివేదికలో స్పష్టం చేసింది. పెరుగుతున్న ఆదాయాలు, మారుతున్న జీవనశైలికి ఈ కొనుగోళ్ల జోరు నిదర్శనంగా నిలుస్తోందని మార్కెట్ నిపుణులు విశ్లేషిస్తున్నారు.