Freight Terminal: తెలంగాణకు గుడ్‌న్యూస్.. వరంగల్‌లో తొలి ‘మెగా ఫ్రెైట్ టెర్మినల్’

తెలంగాణ రాష్ట్రంలో సరుకు రవాణా రంగం సరికొత్త పుంతలు తొక్కనుంది. దక్షిణ మధ్య రైల్వే (SCR) ప్రతిష్టాత్మకంగా చేపట్టిన చర్యలతో రాష్ట్రంలోని మొట్టమొదటి ‘గతి శక్తి మల్టీ-మోడల్ కార్గో టెర్మినల్’ (Gati Shakti Multi-Modal Cargo Terminal) వరంగల్ జిల్లాలో ఏర్పాటు కానుంది. చారిత్రక నగరమైన వరంగల్ సమీపంలోని తిమ్మాపూర్ రైల్వే స్టేషన్ పరిధిలో ఈ మెగా ఫ్రైట్ టెర్మినల్ (Freight Terminal) సేవలు ప్రారంభం కానున్నాయి. ఇప్పటివరకు సరుకు రవాణా కోసం, కంటైనర్ల ఎగుమతి కోసం ఎక్కువగా హైదరాబాద్‌లోని సనత్‌నగర్ వంటి ప్రాంతాలపైనే ఆధారపడాల్సి వచ్చేది. కానీ ఈ కొత్త టెర్మినల్ రాకతో ఉత్తర తెలంగాణ జిల్లాల ముఖచిత్రం మారబోతోంది.

వరంగల్, హన్మకొండ చుట్టుపక్కల జిల్లాల్లో గ్రానైట్ పరిశ్రమ, వ్యవసాయ ఉత్పత్తులు (ముఖ్యంగా వరి, పత్తి, మిర్చి), టెక్స్‌టైల్స్ వ్యాపారం విస్తృతంగా ఉంది. ఈ ఉత్పత్తులను ఇతర రాష్ట్రాలకు లేదా ఓడరేవులకు తరలించడానికి రోడ్డు మార్గంపై ఆధారపడటం వల్ల రవాణా భారం అధికమయ్యేది. ఇప్పుడు రైల్వే శాఖ ఆధ్వర్యంలో ఏర్పాటు చేస్తున్న ఈ అత్యాధునిక టెర్మినల్ (Freight Terminal) ద్వారా తక్కువ ఖర్చుతో, సురక్షితంగా సరుకులను రవాణా చేసే వెసులుబాటు కలుగుతుంది. ఈ టెర్మినల్‌లో భారీ కంటైనర్లను హ్యాండిల్ చేయడానికి, నిల్వ చేయడానికి, ట్రక్కుల నుండి రైల్వే వ్యాగన్లకు సరుకు మార్చడానికి అధునాతన యంత్రాలను ఏర్పాటు చేశారు.

ఇది (Freight Terminal) కేవలం రవాణా కేంద్రంగానే కాకుండా, స్థానిక ఆర్థిక వ్యవస్థకు కూడా ఊతమిస్తుందని నిపుణులు విశ్లేషిస్తున్నారు. ఈ టెర్మినల్ చుట్టూ లాజిస్టిక్స్ పార్కులు, గోదాములు వెలిసే అవకాశం ఉండటంతో స్థానిక యువతకు ఉపాధి అవకాశాలు లభిస్తాయి. దేశవ్యాప్తంగా మౌలిక సదుపాయాలను మెరుగుపరిచేందుకు కేంద్రం ప్రవేశపెట్టిన ‘గతి శక్తి’ విధానంలో భాగంగా దీనిని అభివృద్ధి చేశారు. ఈ టెర్మినల్ (Freight Terminal) పూర్తి స్థాయిలో అందుబాటులోకి వస్తే, వరంగల్ నగరం తెలంగాణలో హైదరాబాద్ తర్వాత అతిపెద్ద వాణిజ్య, రవాణా కేంద్రంగా (Logistics Hub) తన స్థానాన్ని మరింత సుస్థిరం చేసుకుంటుందని అధికారులు ఆశాభావం వ్యక్తం చేస్తున్నారు.