Anaganaga Oka Raju Review: ‘అనగనగా ఒక రాజు’ ఎలా ఉన్నాడంటే?
- Published By: techteam
- January 15, 2026 / 04:27 PM IST
తెలుగు టైమ్స్.నెట్ రేటింగ్ : 3/5
నిర్మాణ సంస్థలు: సితార ఎంటర్టైన్మెంట్స్, ఫార్చ్యూన్ ఫోర్ సినిమాస్
తారాగణం: నవీన్ పొలిశెట్టి, మీనాక్షి చౌదరి, రావు రమేష్, తారక్ పొన్నప్ప, గోపరాజు రామణ, మహేష్ ఆచంట, చమ్మక్ చంద్ర, సత్యం, భద్రం తదితరులు నటించారు
సంగీతం: మిక్కీ జె. మేయర్, సినిమాటోగ్రఫీ : యువరాజ్
ఎడిటర్ : వంశీ అట్లూరి, సమర్పణ: శ్రీకర స్టూడియోస్
నిర్మాతలు: సూర్యదేవర నాగవంశీ, సాయి సౌజన్య
దర్శకత్వం: మారి
విడుదల తేది : 14.01.2026
నిడివి : 2 ఘంటల 30 నిముషాలు
యంగ్ హీరోస్ స్క్రీన్ మీద చాలా ఎనర్జిటిక్గా కనిపించే వాళ్లలో నవీన్ పొలిశెట్టి (Naveen Polisetty)ఒకరు. ముఖ్యంగా ఆయన కామెడీ టైమింగ్ అదిరిపోతుంది. ఏజెంట్ సాయి శ్రీనివాస ఆత్రేయ, జాతిరత్నాలు సినిమాల్లో నవీన్ చేసిన కామెడీ ఆడియన్స్కి విపరీతంగా నచ్చింది.’మిస్ శెట్టి మిస్టర్ పొలిశెట్టి’ విడుదలైన మూడేళ్ళ తరువాత ఇలా ‘అనగనగా ఒక రాజు'( Anaganaga Oka Raju) సినిమాతో సంక్రాంతి బరిలోకి దిగాడు నవీన్. ట్రైలర్, సాంగ్స్తోనే ఇది పక్కా పండగ ఎంటర్టైనర్ అనే క్లారిటీ మూవీ టీమ్ ఇచ్చింది. మరి ఆ అంచనాలన్ని థియేటర్లో నవీన్ అందుకున్నాడా? జాతిరత్నాలు లాంటి మరో హిట్ కొట్టాడా? అనేది రివ్యూలో చూద్దాం.
కథ :
గౌరవపురం జమీందారు గోపరాజు మనవడు రాజు (నవీన్ పొలిశెట్టి)కి ఊరిలో పెద్ద పేరు ఉంటుంది కానీ చెప్పుకోవడానికి ఆస్తులేం ఉండవు. ఎందుకంటే వాళ్ల తాత పేరుకే గోపరాజు కానీ పెద్ద రసికరాజు. దీంతో అప్పట్లోనే ఉన్న ఆస్తులన్నీ స్త్రీ జనోద్దరణ పేరుతో దొబ్బెడతాడు. ఇక మిగిలిన ఆస్తులను సెంటిమెంట్ డ్రామాలు ఆడి లాగేస్తుంటారు. ఇక తాత ఆస్తులు ఎలాగూ ఇవ్వలేదూ కనీసం జమీందారు అనే ట్యాగ్ అయినా ఉంది కాబట్టి పెళ్లి చేసుకొని అయినా కోటీశ్వరుడు అయిపోదామని రాజు అనుకుంటాడు. ఆ ప్రయత్నాల్లో పెద్దిపాలెం భూపతి రాజు (రావు రమేష్) ఒక్కగానొక్క కూతురు చారు (మీనాక్షి చౌదరి)(Meenakshi Choudary) ని చూసి రాజు ఇష్టపడతాడు. పైగా వాళ్లకి కోట్లకి కోట్లు ఆస్తులు ఉన్నాయని తెలిసి ఎలాగైనా ఆమెని ముగ్గులోకి దింపాలని ‘ఆపరేషన్ చారు’ అంటూ పెద్ద స్కెచ్ వేస్తాడు. అన్నీ అనుకున్నట్లే జరిగి భూపతి రాజు కూడా తన కూతురికి రాజుకి అటు ఏడు తరాలు ఇటు ఏడు తరాలు గుర్తుండిపోయేలా గ్రాండ్గా పెళ్లి చేస్తాడు. ఇక్కడివరకూ కథ బానే ఉంటుంది అయితే ఫస్ట్ నైట్ రోజు రాజు చేతికి వాళ్ల మావయ్య భూపతి రాసిన లెటర్ అందుతుంది. అది చూసి రాజుకి బుర్ర తిరిగిపోద్ది. మరి ఆ లెటర్లో ఏముంది? అసలు పెళ్లితో కోటీశ్వరుడు అయిపోదామనుకున్న రాజుకి తగిలిన పెద్ద షాకేంటి? పెద్దిపాలెం ప్రెసిడెంట్ ఎలక్షన్లో నిలబడిన ఎర్రిబాబు (తారక్ పొన్నప్ప)కి పోటీగా రాజు ఎందుకు నామినేషన్ వేశాడు? ప్రెసిడెంట్ ఎన్నికల్లో రాజు గెలిచాడా? అనేది మిగిలిన కథ.
నటీ నటుల హవబవాలు :
సినిమా ఆద్యంతం నవ్వులకి విరామం రాకుండా చాలా బాగా ఎంటర్టైన్ చేశాడు నవీన్. ముఖ్యంగా నవీన్ ఒన్ లైనర్లు, పంచులు బాగానే పేలాయి. స్క్రీన్ మీద ఎప్పటిలానే చాలా ఎనర్జిటిక్గా నవీన్ యాక్ట్ చేశాడు. ఒకవిధంగా నవీన్ మాత్రం ఒన్ మ్యాన్ షో కింద మొత్తం ఎంటర్టైన్మెంట్ బాధ్యతని తన భుజాలపై వేసుకున్నాడు. ఇక మీనాక్షి చౌదరి గత ఏడాదికి సంక్రాంతికి వస్తున్నాం అంటూ భారీ హిట్ కొట్టింది. ఇక ఈ ఏడాది కూడా పండగకి పలకరించింది. చారు పాత్రలో మీనాక్షి కూడా బాగానే నటించింది. ఇక కనిపించింది కాసేపే అయినా రావు రమేష్ కూడా తన పాత్రతో బాగానే ఎంటర్టైన్ చేశారు. విలన్ పాత్రలో కనిపించిన తారక్ పొన్నప్ప బానే యాక్ట్ చేశాడు. ఇక మహేష్ ఆచంట, చమ్మక్ చంద్ర, రాకెట్ రాఘవ, ముక్కు అవినాష్, ఝాన్సీ సహా మిగిలిన పాత్రలు అక్కడక్కడా నవ్వించాయి.
సాంకేతికవర్గం పనితీరు:
దర్శకుడు మారి తన టేకింగ్ తో మెప్పించినా.. తీసుకున్న స్టోరీ లైన్ కి పూర్తి స్థాయిలో ఆకట్టుకునే విధంగా దర్శకరచయితలు స్క్రీన్ ప్లేను రాసుకోలేకపోయారు. సంగీత దర్శకుడు మిక్కీ జె. మేయర్ అందించిన పాటలు పర్వాలేదు.తొలి సారిగా తీన్ మార్ పాటలకు ట్యూన్స్ కట్టాడు. సినిమాలో బ్యాక్ గ్రౌండ్ స్కోర్ బాగుంది. మిక్కీ జే మేయర్ ఇచ్చిన సాంగ్స్లో భీమవరం బాల్మా సాంగ్ బావుంది.సినిమాటోగ్రఫీ కూడా బాగుంది. సినిమాలోని చాలా సన్నివేశాలను చాలా బ్యూటిఫుల్ గా జె. యువరాజ్ చిత్రీకరించారు. ఇక ఎడిటింగ్ విషయానికి వస్తే.. అక్కడక్కడ ఉన్న కొన్ని సాగతీత సీన్స్ ను ఎడిటర్ తగ్గించాల్సింది. నిర్మాతలు నాగవంశీ,(Producer Naga Vamsi) సాయిసౌజన్య ఎక్కడా కాంప్రమైజ్ కాకుండా ఈ చిత్రాన్ని నిర్మించారు. వారి నిర్మాణ విలువలు చాలా బాగున్నాయి.
విశ్లేషణ :
విలేజ్ బ్యాక్డ్రాప్లో పక్కా నవ్వుల రైడ్గా సినిమా ఉంది. తాను రిచ్చే రిచ్చు అంటూ నవీన్ పోలిశెట్టి ఇచ్చే బిల్డప్లు, కవరింగ్లతో మొదలైన ఈ నవ్వులు.. హీరోయిన్ని పడేయడానికి మొదలైన ఆపరేషన్ చారుతో ఇంకా రెట్టింపు అయ్యాయి. ముఖ్యంగా పెద్దిపాలెం బీచ్ని గోవాగా మార్చిన సీన్.. హీరోయిన్తో కలిసి చేసి పారా గ్లైడింగ్ సీన్ థియేటర్లో నవ్వులు పూయించాయి. ఆ సీన్లలో నవీన్ కామెడీ అదిరిపోయింది. ఇక పెళ్లి అయిన తర్వాత హీరోకి ఒక నిజం తెలియడంతో నవీన్కి షాక్.. ఆడియన్స్కి బ్రేక్ అంటూ ఇంటర్వెల్కి మంచి బ్యాంగ్ ఇచ్చారు. సెకండాఫ్ మొత్తం ప్రెసిడెంట్ ఎన్నికల ప్రచారం.. ప్రజా సమస్యలు అంటూ నవీన్ చేసిన కామెడీ హంగామా కూడా ఎక్కడా బ్రేక్ లేకుండా ప్రేక్షకుల్ని నవ్విస్తుంది. ముఖ్యంగా సినిమా మొదలైనప్పటి నుంచి చివరి వరకూ ఎక్కడా కామెడీ డోస్ తగ్గకుండా జాగ్రత్తప్పడ్డారు. ఇక ప్రీ క్లైమాక్స్లో ఇచ్చిన ఎమోషనల్ టర్న్ కూడా సినిమాకి ప్లస్ అయింది. అప్పటివరకూ కామెడీగా సాగిన కథని చిన్న ఎమోషనల్ టర్న్తో సీరియస్గా మార్చారు. కానీ చివరిలో మళ్లీ నవ్వులతోనే శుభం కార్డు వేశారు. ఎప్పుడూ కథలో కొత్తదనం కోరుకునే నవీన్.. రొటీన్ సినిమా చేశాడేంటి అని కొంతమంది నిరాశ చెందొచ్చు. కానీ సంక్రాంతి పండగ సినిమా కావడం సినిమా సందడి సందడి గా ఉండాలనుకోవడం తో మంచి వినోదాత్మక చిత్రంగా అందరిని అలరిస్తుంది.
