వైసీపీలో భారీ ప్రక్షాళన.. పనిచేయని నేతలకు జగన్ షాక్..
ఆంధ్రప్రదేశ్ రాజకీయాల్లో మరోసారి వైఎస్సార్ కాంగ్రెస్ పార్టీ (YSRCP) కీలక మార్పులకు సిద్ధమవుతున్నట్లు కనిపిస్తోంది. పార్టీని క్షేత్రస్థాయిలో బలోపేతం చేయడంతో పాటు, నాయకుల పనితీరుపై స్పష్టమైన నిర్ణయాలు తీసుకోవాలని అధినేత వైఎస్ జగన్ మోహన్ రెడ్డి (YS Jagan Mohan Reddy) భావిస్తున్నట్లు తెలుస్తోంది. 2029 సార్వత్రిక ఎన్నికలకు ఇంకా సమయం ఉన్నప్పటికీ ఇప్పటి నుంచే పార్టీ యంత్రాంగాన్ని సిద్ధం చేయాలని ఆయన ప్రణాళికలు రచిస్తున్నారు. ముఖ్యంగా పార్టీ కోసం చురుగ్గా పనిచేసే నాయకులకు ప్రాధాన్యం ఇవ్వాలని, బాధ్యతలు తీసుకుని కూడా నిర్లక్ష్యంగా వ్యవహరించే వారిని పక్కన పెట్టాలని నిర్ణయించినట్లు రాజకీయ వర్గాల్లో చర్చ జరుగుతోంది.
ఇటీవల జరిగిన స్థానిక సంస్థల ఎన్నికలను పార్టీ నాయకుల పనితీరుకు కొలమానంగా వైఎస్ జగన్ పరిగణిస్తున్నట్లు సమాచారం. ఈ ఎన్నికల్లో పార్టీ తరఫున నియమించిన నియోజకవర్గ ఇన్ఛార్జిలు ఎంతవరకు బాధ్యతలు నిర్వహించారనే అంశంపై ఇప్పటికే నివేదికలు సిద్ధమైనట్లు తెలుస్తోంది. గత నాలుగైదు నెలలుగా జగన్ వరుస సమావేశాలు నిర్వహిస్తూ నాయకులు, ఇన్ఛార్జిలకు దిశానిర్దేశం చేశారు. కేడర్ను సమన్వయం చేసుకోవాలని, ఎన్నికల్లో గెలుపే లక్ష్యంగా పనిచేయాలని సూచించారు. అయినప్పటికీ ఆశించిన స్థాయిలో మార్పు కనిపించలేదని పార్టీ అంతర్గత వర్గాలు భావిస్తున్నాయి.
ఈ నేపథ్యంలో మంగళవారం తాడేపల్లిలోని (Tadepalli) పార్టీ కేంద్ర కార్యాలయంలో జగన్ ముఖ్య నాయకులతో సమావేశం నిర్వహించడం ప్రాధాన్యత సంతరించుకుంది. రాష్ట్రంలోని 175 అసెంబ్లీ నియోజకవర్గాల్లో పార్టీ పరిస్థితి, ఇన్ఛార్జిల పనితీరు, క్షేత్రస్థాయిలో కార్యకర్తలతో ఉన్న సంబంధాలపై ఈ సమావేశంలో ప్రధానంగా చర్చించే అవకాశం ఉంది. దాదాపు 70 నుంచి 80 నియోజకవర్గాల్లో ఇన్ఛార్జిల పనితీరు సంతృప్తికరంగా లేదని పార్టీకి నివేదికలు అందినట్లు ప్రచారం జరుగుతోంది. దీంతో పెద్ద సంఖ్యలో నియోజకవర్గాల్లో కొత్త నాయకత్వానికి అవకాశం కల్పించవచ్చనే అభిప్రాయాలు వ్యక్తమవుతున్నాయి.
ముఖ్యంగా స్థానిక ఎన్నికల సమయంలో కొందరు నాయకులు కార్యకర్తలకు అందుబాటులో లేకపోవడం, అభ్యర్థులకు అవసరమైన సహకారం అందించకపోవడం పార్టీ అధిష్ఠానానికి అసంతృప్తి కలిగించినట్లు తెలుస్తోంది. నామినేషన్లు వేసిన అభ్యర్థులకు ఎదురైన సమస్యలను పట్టించుకోకపోవడం, ప్రచార కార్యక్రమాలకు దూరంగా ఉండటం వంటి అంశాలు కూడా సమీక్షలో చర్చకు వచ్చే అవకాశం ఉంది. ఎన్నికల్లో విజయం సాధించాలంటే ముందుగా కార్యకర్తలకు అండగా నిలవాల్సిన అవసరం ఉందని పార్టీ నాయకత్వం భావిస్తోంది.
ఇవి కూడా చదవండి
ఈసారి మార్పుల విషయంలో సీనియారిటీ, గతంలో నిర్వహించిన పదవుల కంటే ప్రస్తుత పనితీరుకే ప్రాధాన్యం ఇవ్వాలని జగన్ భావిస్తున్నట్లు సమాచారం. మాజీ మంత్రులు, మాజీ ఎమ్మెల్యేలు అయినప్పటికీ ప్రజల్లో చురుగ్గా ఉండకపోతే వారికి కూడా బాధ్యతల నుంచి విముక్తి కల్పించే అవకాశం ఉందని రాజకీయ విశ్లేషకులు అంచనా వేస్తున్నారు. మరోవైపు నియోజకవర్గాల్లో ప్రజా సమస్యలపై పోరాడుతూ, కార్యకర్తలకు అండగా నిలిచే కొత్త నాయకులను గుర్తించే ప్రక్రియకు శ్రీకారం చుట్టవచ్చని తెలుస్తోంది.
కూటమి ప్రభుత్వంపై ప్రజల్లో ఉన్న అసంతృప్తిని తమకు అనుకూలంగా మార్చుకోవడంలో వైసీపీ కొన్ని ప్రాంతాల్లో విఫలమైందనే అభిప్రాయం కూడా పార్టీ వర్గాల్లో ఉంది. ఈ పరిస్థితిని మార్చాలంటే నాయకత్వంలో చురుకుదనం, కేడర్లో ఐక్యత అవసరమని భావిస్తున్నారు. మొత్తానికి రాబోయే రోజుల్లో వైసీపీలో సంస్థాగత మార్పులు చోటుచేసుకునే అవకాశాలు కనిపిస్తున్నాయి. ఈ ప్రక్షాళన ఎంతవరకు అమలవుతుంది? ఎవరికి కొత్త బాధ్యతలు దక్కుతాయి? ఎవరిపై వేటు పడుతుంది? అన్నది ఇప్పుడు ఏపీ రాజకీయాల్లో ఆసక్తికరంగా మారింది.






