అభ్యర్థుల ప్రచారాలపై జనసేన సీరియస్..!

రాష్ట్రంలో స్థానిక సంస్థల ఎన్నికల వేడి పెరుగుతున్న వేళ, జనసేన పార్టీ కేంద్ర కార్యాలయం ఒక అత్యంత కీలకమైన అధికారిక ప్రకటనను విడుదల చేసింది. గత కొన్ని రోజులుగా సోషల్ మీడియా మరియు వివిధ పొలిటికల్ సర్కిల్స్‌లో.. జనసేన ఈ స్థానాల్లోనే పోటీ చేయబోతోంది, అభ్యర్థులు వీళ్లేనంటూ కొన్ని జాబితాలు విపరీతంగా చక్కర్లు కొడుతున్నాయి. ఈ ప్రచారంపై జనసేన అధిష్టానం తీవ్రంగా స్పందించింది. ఆ లిస్టులతో పార్టీకి ఎలాంటి సంబంధం లేదని, అభ్యర్థుల పేరుతో సాగుతున్న అడ్డగోలు ప్రచారాలను నాయకులు, కార్యకర్తలు, అభిమానులు ఎవరూ నమ్మవద్దని జనసేన స్పష్టం చేసింది.

ప్రస్తుతం జనసేన అధినేత, ఏపీ ఉపముఖ్యమంత్రి పవన్ కళ్యాణ్(pawan Kalyan) పర్యవేక్షణలో, ఆయన ఇచ్చిన దిశానిర్దేశం మరియు సూచనలకు అనుగుణంగానే స్థానిక ఎన్నికలపై అంతర్గత సమీక్షలు జరుగుతున్నాయని పార్టీ తెలిపింది. కూటమి భాగస్వామ్య పక్షాలైన తెలుగుదేశం (TDP), భారతీయ జనతా పార్టీ (BJP)లతో సీట్ల సర్దుబాటు, సమన్వయానికి సంబంధించిన చర్చలు ఇంకా ప్రాథమిక దశలోనే ఉన్నాయని జనసేన కార్యాలయం వెల్లడించింది. మూడు పార్టీల అగ్రనేతలు ఒకచోట కూర్చుని తుది నిర్ణయం తీసుకునే వరకు, ఎలాంటి లీకులను నమ్మాల్సిన అవసరం లేదని స్పష్టం చేసింది.

స్థానిక ఎన్నికల్లో గెలుపే లక్ష్యంగా జనసేన అడుగులు వేస్తోంది. క్షేత్రస్థాయి నుంచి అందుతున్న పూర్తి సమాచారాన్ని, నియోజకవర్గాల్లోని బలాబలాలను నిశితంగా పరిశీలించిన తర్వాతే అభ్యర్థుల ఎంపిక జరుగుతుందని ప్రకటనలో పేర్కొన్నారు. ప్రతి స్థానాన్ని క్షుణ్ణంగా సమీక్షించిన తర్వాత, అభ్యర్థులకు సంబంధించి పవన్ కళ్యాణ్ గారే స్వయంగా తుది నిర్ణయం తీసుకుని అధికారికంగా ప్రకటిస్తారని స్పష్టం చేశారు. అప్పటివరకు ప్రతి ఒక్కరూ పార్టీ విధివిధానాలను, క్రమశిక్షణను ఖచ్చితంగా పాటించాలని, సొంతంగా గ్రూపు రాజకీయాలకు లేదా ప్రచారాలకు దిగితే క్రమశిక్షణా చర్యలు తప్పవని జనసేన పార్టీ గట్టిగా హెచ్చరించింది.