విశాఖలో కూటమి ఎమ్మెల్యేకి తప్పని తిప్పలు..!
- Published By: Tech Team
- August 26, 2026 / 02:03 PM IST
విశాఖపట్నం జిల్లా పెందుర్తి నియోజకవర్గ పరిధిలోని నరవలో కూటమి రాజకీయాల అంతర్గత విభేదాలు ఒక్కసారిగా బహిర్గతమయ్యాయి. స్థానికంగా సుమారు కోటి రూపాయల వ్యయంతో చేపట్టనున్న పలు కీలక అభివృద్ధి పనులకు పెందుర్తి కూటమి ఎమ్మెల్యే పంచకర్ల రమేష్బాబు శంకుస్థాపనలు, ప్రారంభోత్సవాలు చేశారు. అయితే, ఈ అధికారిక అభివృద్ధి కార్యక్రమ వేదిక కాస్తా స్థానిక రాజకీయ సమీక్షా వేదికగా మారిపోయింది. గత కొంతకాలంగా నియోజకవర్గంలోని చిన్న నేతల మధ్య కొనసాగుతున్న అంతర్గత విభేదాలు, గ్రూపు రాజకీయాలపై ఎమ్మెల్యే రమేష్బాబు బహిరంగంగానే తీవ్ర అసంతృప్తి వ్యక్తం చేశారు.
ఈ సందర్భంగా ఎమ్మెల్యే పంచకర్ల రమేష్బాబు స్థానిక తెలుగుదేశం పార్టీ నేతలను, ముఖ్యంగా మాజీ కార్పొరేటర్ మొల్లి ముత్యాలనాయుడిని ఉద్దేశించి సంచలన వ్యాఖ్యలు చేశారు. వ్యక్తిగత, రాజకీయ విభేదాలను వీధిలోకి తెచ్చి కూటమి పరువు తీయొద్దంటూ వేదికపైనే స్ట్రాంగ్ వార్నింగ్ ఇచ్చారు. త్వరలోనే జీవీఎంసీ (GVMC) కార్పొరేషన్ ఎన్నికలు రాబోతున్న తరుణంలో.. స్థానికంగా టికెట్ ఆశించి పోటీ చేయాలనుకుంటున్న నేతల మధ్య ఆధిపత్య పోరు పెరగడంపై ఆయన మండిపడ్డారు. సొంత పార్టీల నేతలే ఒకరిపై ఒకరు ఫిర్యాదులు చేసుకుంటూ కాలయాపన చేయడం వల్ల కూటమి ప్రతిష్ట దెబ్బతింటుందని, ఇలాంటి పద్ధతులు ఇకపై సహించేది లేదని హెచ్చరించారు.
అభివృద్ధి కార్యక్రమాలను ప్రజల్లోకి తీసుకెళ్లాల్సిన సమయంలో.. నేతల మధ్య ఉన్న ఈ ఇగోల వల్ల ప్రభుత్వ మైలేజ్ తగ్గుతోందని రాజకీయ విశ్లేషకులు భావిస్తున్నారు. అందుకే ఎమ్మెల్యే పంచకర్ల రమేష్బాబు ముందస్తుగానే అప్రమత్తమై, కార్పొరేషన్ ఎన్నికల లోపు కేడర్ను లైన్లో పెట్టడానికే ఈ స్థాయిలో క్లాస్ తీసుకున్నట్లు తెలుస్తోంది. ప్రభుత్వ వేదికపైనే ఎమ్మెల్యే సొంత కూటమి నేతలకు ఇంత ఘాటుగా హెచ్చరికలు జారీ చేయడం ఇప్పుడు విశాఖ రాజకీయ వర్గాల్లో అత్యంత హాట్ టాపిక్గా మారింది.
