ఏకపక్షంగా తీసుకున్నారని నిరూపిస్తే తదుపరి చర్యలు : జ్ఞానేష్ కుమార్ విషయంలో సుప్రీం

సీఈసీ జ్ఞానేష్ కుమార్ ఏకపక్ష నిర్ణయాలు తీసుకున్నారన్న ఆరోపణలతో దాఖలైన పిటిషన్‌పై సుప్రీం కోర్టు ఈసీకి నోటీసులు జారీ చేసింది. జ్ఞానేష్ కుమార్ కి వ్యతిరేకంగా దాఖలైన పిటిషన్ పై సుప్రీం కీలక వ్యాఖ్యలు చేసింది. ఓ పత్రిక కథనం ఆధారంగా ప్రధాన ఎన్నికల కమిషనర్ పై ఉత్తర్వులు జారీ చేయలేమని తేల్చి చెప్పింది. మిగిలిన అధికారులకు రాజ్యాంగబద్ధంగా కేటాయించిన అధికారాలను జ్ఞానేష్ కుమార్ ఏకపక్షంగా వినియోగించుకోవచ్చా? లేదా? అన్న విషయాన్ని మాత్రం పరిశీలిస్తామని తెలిపింది.

అంత కంటే ముందు ఈ వార్తలపై ఎన్నికల సంఘం స్పందనను కూడా పరిగణనలోకి తీసుకుంటామని తేల్చి చెప్పింది. ఇందులో భాగంగా ఎన్నికల కమిషన్ కి నోటీసులిచ్చింది. ఓట్ల తొలగింపు నిర్ణయాలను సీఈసీ ఏకపక్షంగా తీసుకున్నారని నిరూపిస్తే.. తదుపరి చర్యలకు ఆదేశిస్తామని సుప్రీం ప్రకటించింది.

అయితే.. ఈ అంశంపై దాఖలైన ఇతర పిటిషన్లను సీజేఐ సూర్యకాంత్ నేతృత్వంలోని త్రిసభ్య ధర్మాసనం విచారణకు స్వీకరించింది. ఎన్నికల కమిషన్ నిర్ణయాలు ఏకగ్రీవంగా లేదా మెజారిటీతో మాత్రమే జరగాలని ఈ సందర్భంగా సీనియర్ అడ్వకేట్ వికాస్ సింగ్ కోర్టు దృష్టికి తీసుకెళ్లారు. ఇద్దరు కమిషనర్ల ఆమోదం లేకుండా నిర్ణయాలు తీసుకోవడం నిబంధనలకు విరుద్ధమని వాదించారు. సీఈసీ జ్ఞానేశ్ కుమార్ ఏకపక్ష నిర్ణయాల రద్దు చేయాలని కోరారు. ‘CEC & ECs Act’ ప్రకారం నిర్ణయాలు ఏకగ్రీవంగా లేదా మెజారిటీతో జరగాలి అని అన్నారు. సీఈసీ ఒంటరిగా నిర్ణయించలేరని స్పష్టం చేశారు. ఇద్దరు ఎన్నికల కమిషనర్ల అభ్యంతరాలను పక్కన పెట్టి నిర్ణయాలు అమలు చేశారని ఆరోపించారు.