ప్రొద్దుటూరు వేదికగా జగన్‌కు చంద్రబాబు ఓపెన్ ఛాలెంజ్..!
- Published By: Tech Team
- October 5, 2026 / 04:15 PM IST
వైఎస్సార్ కడప జిల్లా ప్రొద్దుటూరు వేదికగా జరిగిన బహిరంగ సభలో ఆంధ్రప్రదేశ్ ముఖ్యమంత్రి చంద్రబాబు నాయుడు మాజీ సీఎం, వైసీపీ అధినేత వైఎస్ జగన్ మోహన్ రెడ్డిపై నిప్పులు చెరిగారు. ఉపముఖ్యమంత్రి పవన్ కల్యాణ్‌తో(Pawan Kalyan) కలిసి జిల్లాలో రూ. 30,156 కోట్ల వ్యయంతో చేపట్టనున్న ప్రతిష్టాత్మక జల్ జీవన్ మిషన్ (Jal Jeevan Mission) తాగునీటి పథకాలకు ఆయన శంకుస్థాపన చేశారు. అనంతరం ఏర్పాటు చేసిన సభలో చంద్రబాబు మాట్లాడుతూ.. వివేకా హత్య కేసు, మద్యం కుంభకోణం, మరియు గ్రూప్-1 నియామకాల్లో జరిగిన అక్రమాలను ప్రస్తావిస్తూ తీవ్రస్థాయిలో విమర్శలు చేశారు.
కడప జిల్లాలో సంచలనం సృష్టించిన మాజీ మంత్రి వైఎస్ వివేకానంద రెడ్డి హత్య కేసుపై ముఖ్యమంత్రి చంద్రబాబు అత్యంత ఘాటు వ్యాఖ్యలు చేశారు. “ఈ కేసులో ఇప్పుడు వాస్తవాలన్నీ పూర్తిగా బయటకు వచ్చాయి. బాబాయ్‌ని చంపడం ద్వారా రాజకీయంగా, ఆర్థికంగా అంతిమ లబ్ధిదారుడు ఎవరో ఈరోజు రాష్ట్రంలోని చిన్న పిల్లవాడిని అడిగినా చెబుతాడు” అంటూ జగన్‌ను ఉద్దేశించి వ్యాఖ్యానించారు. నాడు గుండెపోటు అని ప్రచారం చేసి, రక్తం మరకలు కడిగేసి సాక్ష్యాలను ఎలా రూపుమాపారో అందరికీ స్పష్టంగా తెలిసిపోయిందని, దీనిపై జగన్ కచ్చితంగా సమాధానం చెప్పి తీరాలని చంద్రబాబు డిమాండ్ చేశారు.
ఇవి కూడా చదవండి
వైసీపీ ఐదేళ్ల హయాంలో జరిగిన వేల కోట్ల రూపాయల మద్యం కుంభకోణంలోనూ (Liquor Scam) అంతిమ లబ్ధిదారుడిగా అన్ని వేళ్లూ జగన్ వైపే చూపిస్తున్నాయని సీఎం చంద్రబాబు ఆరోపించారు. డిజిటల్ పేమెంట్స్ లేకుండా కేవలం నగదు రూపంలోనే వేల కోట్లు దోచుకున్నారని మండిపడ్డారు. అదేవిధంగా నిరుద్యోగుల జీవితాలతో ఆడుకుంటూ గ్రూప్-1 పరీక్షల నిర్వహణ మరియు మూల్యాంకనంలో తీవ్ర అక్రమాలకు ఒడిగట్టారని దుయ్యబట్టారు. గొడ్డలిపోటు రాజకీయాలు చేసేవారికి, రాష్ట్ర సంపదను దోచుకున్న వారికి ప్రజలే బుద్ధి చెప్పారని, ఈ మూడు కీలక అంశాలపై జగన్ ప్రజలకు సమాధానం చెప్పాలని సవాల్ విసిరారు.
