రూ.3,700 కోట్లు ఖర్చు పెట్టి ఏం సాధించా? తప్పు చేసా: ఎలాన్ మస్క్!
అమెరికా ఎన్నికలంటేనే కోట్ల డాలర్ల ఖర్చు, హోరాహోరీ ప్రచారం గుర్తొస్తాయి. కానీ ఎంత డబ్బు ఖర్చు పెట్టినా గెలుపు మాత్రం గ్యారెంటీ కాదని ప్రపంచ కుబేరుడు ఎలాన్ మస్క్కు ఇప్పుడు బాగా అర్థమైనట్టుంది. 2026 మధ్యంతర ఎన్నికల్లో రిపబ్లికన్ పార్టీ అభ్యర్థుల కోసం ఏకంగా 442 మిలియన్ డాలర్లు (సుమారు రూ.3,700 కోట్లు) ఖర్చు పెట్టిన ఆయనకు చివరకు నిరాశే ఎదురైంది. ఎన్నికల ఫలితాల్లో డెమొక్రాట్లు పైచేయి సాధించడంతో ఇప్పుడు తన ఖర్చుపై తానే అసంతృప్తి వ్యక్తం చేస్తున్నారు. ఇంత డబ్బు ఖర్చు చేసి సాధించిందేమిటని వెనక్కి తిరిగి చూసుకుంటే, చాలా తెలివితక్కువ పని చేసినట్టుగా అనిపిస్తోందని ఓపెన్గానే చెప్పేశారు.
డబ్బంతా పెట్టినా ఫలితం దక్కలేదే!
న్యూయార్క్ టైమ్స్ కాలమిస్ట్ ఆండ్రూ రాస్ సోర్కిన్తో డీల్బుక్ సమ్మిట్లో వర్చువల్గా మాట్లాడిన మస్క్.. ఎన్నికల కోసం పెట్టిన ఖర్చు గురించి ఆసక్తికరమైన వ్యాఖ్యలు చేశారు. రిపబ్లికన్లు సెనేట్పై తమ పట్టును కొనసాగించాలన్న ఉద్దేశంతోనే తాను ఇంత భారీగా ఖర్చు చేసినట్లు వివరించారు. కానీ ఫలితాలు మాత్రం ఆయన ఆశించినట్టుగా రాలేదు. డెమొక్రాట్లు మెజారిటీ సాధించడంతో పాటు, అలాస్కా సెనేట్ ఎన్నికల్లో మేరీ పెల్టోలా గెలుపుతో తమ బలాన్ని 56 సీట్లకు పెంచుకున్నారు. రిపబ్లికన్లు 44 సీట్లకే పరిమితమయ్యారు.
దీంతో మస్క్ తన పెట్టుబడిపై అసంతృప్తి వ్యక్తం చేశారు. ఇంత డబ్బు ఖర్చు చేసినా ఆశించిన ప్రయోజనం కనిపించలేదని, మళ్లీ వెనక్కి వెళ్లి నిర్ణయం తీసుకునే అవకాశం వస్తే ఇంత మొత్తం ఖర్చు చేసేవాడిని కాదని అన్నారు. అయితే తాను ఖర్చు చేయకపోయి ఉంటే ఫలితాలు ఇంకా దారుణంగా ఉండేవేమోనని కూడా అభిప్రాయపడ్డారు. అమెరికా ఎన్నికల్లో డబ్బు ఒక్కటే గెలుపును నిర్ణయించదని, భారీ మొత్తంలో ఖర్చు పెట్టినా దాని ప్రభావం పరిమితంగానే ఉంటుందని ఈ ఎన్నికలు నిరూపించాయని చెప్పారు.
అసలు రిపబ్లికన్లకే ఎందుకు మద్దతిచ్చారు?
ఇంతకీ మస్క్ రిపబ్లికన్ల కోసం అంత డబ్బు ఎందుకు ఖర్చు చేశారు? ఆయన చెప్పిన కారణం ఆసక్తికరంగానే ఉంది. 2029 నాటికి అమెరికా ప్రతినిధుల సభ, సెనేట్ లేదా అధ్యక్ష పదవిలో రిపబ్లికన్లకు ప్రాతినిధ్యం ఉండాలని కోరుకున్నారట. అయితే డెమొక్రాట్లు కానీ, రిపబ్లికన్లు కానీ ఎవరూ పూర్తి ఆధిపత్యం చెలాయించకూడదన్నది తన అభిప్రాయమని చెప్పారు. అధికారంలో ఉన్నవారిని ప్రశ్నించేలా, ఒకరిపై మరొకరికి నియంత్రణ ఉండేలా వ్యవస్థ పనిచేయాలన్నదే తన ఉద్దేశమని వివరించారు.
అంతేకాదు, తాను రాజకీయంగా ఒకే పార్టీకి కట్టుబడిపోయే వ్యక్తిని కాదని కూడా చెప్పుకొచ్చారు. తన భావజాలం మధ్యేవాదానికి దగ్గరగా ఉంటుందని, ఏ పార్టీ అయినా సరే దాని విధానాలను గుడ్డిగా సమర్థించడం తనకు ఇష్టం ఉండదని స్పష్టం చేశారు. తాను ‘మాగా’ (MAGA) ఉద్యమానికి చెందిన వ్యక్తిని కాదని చెప్పడం కూడా ఈ ఇంటర్వ్యూలో ప్రత్యేకంగా నిలిచింది.
ట్రంప్తో అంత స్నేహం.. చివరకు ఏమైంది?
మస్క్, ట్రంప్ స్నేహం గురించి ప్రత్యేకంగా చెప్పాల్సిన పనిలేదు. 2024 అధ్యక్ష ఎన్నికలకు ముందు ఇద్దరూ ఎంత సన్నిహితంగా ఉన్నారో అందరికీ తెలిసిందే. ట్రంప్కు మద్దతుగా మస్క్ ప్రచారం చేయడమే కాకుండా, ఎన్నికల కోసం భారీగా నిధులు కూడా ఖర్చు చేశారు. ట్రంప్ అధ్యక్షుడైన తర్వాత ప్రభుత్వ ఖర్చులను తగ్గించడం, పాలనలో సామర్థ్యాన్ని పెంచడం లక్ష్యంగా ఏర్పాటు చేసిన డిపార్ట్మెంట్ ఆఫ్ గవర్నమెంట్ ఎఫిషియెన్సీ (DOGE) బాధ్యతలను కూడా మస్క్ చేపట్టారు.
వీరిద్దరి సాన్నిహిత్యం చూసి కొందరు విమర్శకులు అమెరికాలో ఇద్దరూ కలిసి ‘కో-ప్రెసిడెన్సీ’ నడుపుతున్నారంటూ వ్యాఖ్యానించారు. అయితే ఆ స్నేహం ఎక్కువకాలం కొనసాగలేదు. కొన్ని నెలలకే ఇద్దరి మధ్య విభేదాలు మొదలయ్యాయి. చివరకు మస్క్ ప్రభుత్వ బాధ్యతల నుంచి తప్పుకుని తన వ్యాపారాలైన టెస్లా, స్పేస్ఎక్స్పై దృష్టి పెట్టారు. మరోవైపు, DOGEకు సంబంధించిన కార్యనిర్వాహక ఉత్తర్వు గడువు ముగియడంతో 2026 జులైలో ఆ విభాగం కార్యకలాపాలు కూడా నిలిచిపోయాయి.
ఇవి కూడా చదవండి
ఒకప్పుడు డార్క్ గోతిక్ మాగా.. ఇప్పుడు మాత్రం నాట్ మాగా!
ఇప్పుడు తాను మాగా కాదని చెబుతున్న మస్క్, గతంలో మాత్రం ట్రంప్ మద్దతు విషయంలో చాలా దూకుడుగా కనిపించారు. 2024 అక్టోబర్లో న్యూయార్క్లోని మాడిసన్ స్క్వేర్ గార్డెన్లో జరిగిన ట్రంప్ ఎన్నికల ర్యాలీకి నల్లటి మాగా టోపీ ధరించి హాజరయ్యారు. ఆ సమయంలో తనను తాను ‘డార్క్ గోతిక్ మాగా’గా అభివర్ణించుకున్నారు. ఆ టోపీపై ఉపయోగించిన అక్షరాల ఫాంట్ నాజీ జర్మనీలో వాడిన ఫ్రాక్టర్ ఫాంట్ను పోలి ఉందంటూ అప్పట్లో చర్చ కూడా జరిగింది.
అమెరికా రాజకీయాలకే పరిమితం కాకుండా ఇతర దేశాల్లోని కొన్ని మితవాద పార్టీలకు కూడా మస్క్ మద్దతు పలికారు. 2025 జనవరిలో జర్మనీలోని ఆల్టర్నేటివ్ ఫర్ జర్మనీ (AfD) పార్టీ నిర్వహించిన ర్యాలీలో వర్చువల్గా పాల్గొన్నారు. ఇటీవల ఆ పార్టీ సాక్సోనీ-అన్హాల్ట్ రాష్ట్రంలో సాధించిన భారీ విజయంపై కూడా అంతర్జాతీయంగా చర్చ జరిగింది. నాజీ శకం తర్వాత తొలిసారిగా జర్మనీలోని ఓ రాష్ట్రంలో మితవాద ప్రభుత్వం ఏర్పడే అవకాశానికి ఈ విజయం దారితీయవచ్చని జార్జ్టౌన్ యూనివర్సిటీ పరిశోధకులు అభిప్రాయపడ్డారు.
చివరికి మస్క్కు అర్థమైన పాఠం ఇదేనా?
టెక్నాలజీ రంగంలో తన వ్యాపార నిర్ణయాలతో ప్రపంచవ్యాప్తంగా ప్రభావం చూపించే మస్క్.. రాజకీయాల్లోనూ అదే స్థాయిలో తన డబ్బు ప్రభావం చూపుతుందని భావించినట్టున్నారు. కానీ ఎన్నికల ఫలితాలు ఆయన అంచనాలకు భిన్నంగా వచ్చాయి. ఒకప్పుడు ట్రంప్కు బలమైన మద్దతుదారుగా నిలిచి, రిపబ్లికన్ల కోసం వందల మిలియన్ల డాలర్లు ఖర్చు చేసిన ఆయనే ఇప్పుడు ఆ నిర్ణయాన్ని వెనక్కి తిరిగి చూసుకుంటూ బాధపడుతున్నారు. మొత్తానికి ఎన్నికల్లో డబ్బు ఎంత ముఖ్యమైనదైనా, ఓటర్ల నిర్ణయాన్ని పూర్తిగా ప్రభావితం చేయలేదని ఈ అనుభవం మస్క్కు ఒక గట్టి పాఠం నేర్పినట్టుంది.
—సూర్య ప్రకాష్ జోశ్యుల







