ఆ పాత మ్యాప్ వెనుక రూ. వందల కోట్ల బిజినెస్! ‘Treasure Island’ నిధి వేట మళ్లీ మొదలైంది!

ప్రపంచంలో డబ్బు సంపాదించడానికి ఎన్నో మార్గాలున్నాయి. ఉద్యోగం చేయవచ్చు. వ్యాపారం చేయవచ్చు. వారసత్వంగా పొందవచ్చు. లేదా ఒక పాత మ్యాప్‌ను పట్టుకుని సముద్రం దాటి, పైరేట్లతో (సముద్రపు దొంగలు) గొడవపడి, తెలియని దీవిలో దాచిన నిధి కోసం వెతకవచ్చు. చివరి పద్ధతినే జిమ్ హాకిన్స్ ఎంచుకున్నాడు. దాదాపు 150 ఏళ్ల తర్వాత కూడా మనం అతని నిర్ణయాన్ని విచిత్రంగా కాకుండా సాహసంగా పిలుస్తున్నాం.ఇంతకీ జిమ్ హాకిన్స్ ఎవరూ అంటారా…వాడే Treasure Island కథలో హీరో.

ఇప్పటికే ఎన్నో సార్లు తెరకెక్కిన Treasure Island కథ ఇప్పుడు మరోసారి కాదు కాదు..మరో రెండు సార్లు తెరకెక్కుతోంది. అవును మీరు చదివింది నిజమే. ఇద్దరు డైరెక్టర్స్ ఈ సినిమాని వేర్వేరుగా తెరకెక్కిస్తున్నారు. ఆ డైరెక్టర్స్ ఒకరు రెడ్లీ స్కాట్ వంటి స్టార్ దర్శకుడు కూడా ఉన్నారు. ఏమిటి ఈ కథ స్పెషాలిటీ..ఎందుకు ఇలా అదే కథను మళ్లీ మళ్లీ తీస్తున్నారు. తరం మారినప్పుడల్లా కొత్తగా తెరకెక్కిస్తున్నారు?

ఒక మ్యాప్.. ఒక నౌక.. ఒక నిధి

సాధారణంగా ఒక కథలో కొత్తదనం లేకపోతే దాన్ని మళ్లీ తీయడానికి ఉత్సాహం చూపించారు.అయితే Treasure Island మాత్రం ఈ రూల్ కు మినహాయింపులా కనిపిస్తోంది. రాబర్ట్ లూయిస్ స్టీవెన్సన్ రాసిన ఈ కథకు దాదాపు 150 ఏళ్లు అవుతున్నా, హాలీవుడ్ దానిని వదిలిపెట్టడం లేదు.

తాజాగా MGM+ ఆ కథను ఆరు భాగాల సిరీస్‌గా మార్చింది. అక్టోబర్ 11న తొలి ఎపిసోడ్ విడుదల కానుంది. ఇదే సమయంలో రిడ్లీ స్కాట్ కూడా Treasure Island ఆధారంగా ఒక సినిమా రూపొందిస్తున్నారు. అందులో హ్యూ జాక్‌మన్ నటిస్తున్నారు. ఇది కేవలం ఒక పాత కథకు మరో రీమేక్ కాదు. స్ట్రీమింగ్ యుగంలో పాత కథల విలువ ఎలా మారిందో చెప్పే చిన్న ఉదాహరణ.

MGM+ రూపొందించిన కొత్త Treasure Island సిరీస్‌ కి సంభందించి..తాజాగా విడుదలైన ట్రైలర్ చూస్తే, ఈసారి కథను పిల్లల కోసం రూపొందించిన సరదా పైరేట్ అడ్వెంచర్‌గా కాకుండా మరింత గంభీరమైన, ప్రమాదకరమైన ప్రయాణంగా చూపించబోతున్నట్లు తెలుస్తోంది.

పాత కథకు కొత్త వ్యాపారం

Treasure Island కథలో కొత్తగా ఏమీ కలపటం లేదు. జిమ్ హాకిన్స్‌కు నిధి మ్యాప్ దొరుకుతుంది. అతను తన తల్లి బెస్‌తో కలిసి Hispaniola నౌకలో బయలుదేరుతాడు. గమ్యం ఒక రహస్య దీవి. అక్కడ నిధి ఉంది. దారిలో పైరేట్లు ఉన్నారు. వారిలో అత్యంత గుర్తుండిపోయే వ్యక్తి లాంగ్ జాన్ సిల్వర్. అయితే ఈసారి కథను ఆరు ఎపిసోడ్లుగా విస్తరించారు. ఇది ముఖ్యమైన మార్పు.

రెండు గంటల సినిమాలో వేగంగా దాటిపోయే పాత్రలు, సంబంధాలు, కుట్రలకు టెలివిజన్‌లో ఎక్కువ సమయం దొరుకుతుంది. అంటే పాత కథను మార్చకుండా, దాని చుట్టూ ఉన్న కథన స్థలాన్ని పెంచడం ఈ వెర్షన్‌లో ప్రధాన వ్యూహంగా కనిపిస్తోంది.

Nostalgia ఒక ఆస్తిగా మారినప్పుడు

హాలీవుడ్‌లో పాత కథలు తీసేవారికి రెండు ప్రయోజనాలు లభిస్తాయి. మొదటిది—ప్రేక్షకుడికి ఆ సినిమా పేరు ముందే తెలుసు. రెండవది—ఆ పేరుతో ఒక జ్ఞాపకం కూడా ఉంటుంది. కొందరికి నవల గుర్తిండి ఉండవచ్చు. మరికొందరికి 2002లోని Disney యానిమేటెడ్ వెర్షన్ గుర్తుండొచ్చు. వేరే ఒకరికి Muppet Treasure Island. ఇంకొందరికి ఇంకాస్త పాత సినిమాలు. కాబట్టి తమ కొత్త సినిమాకు ప్రేక్షకుడిని మొదటి నుంచీ కథ పరిచయం చేయాల్సిన అవసరం ఉండదు.

స్ట్రీమింగ్ కంపెనీలకు ఇది విలువైన విషయం. కొత్త ప్రపంచాన్ని సృష్టించడం ఖరీదైన పని. ఇప్పటికే ప్రపంచవ్యాప్తంగా గుర్తింపు పొందిన కథను తీసుకుని, దానికి కొత్త టోన్, కొత్త నటులు, కొత్త విజువల్స్ ఇవ్వడం మరో మార్గం.

Treasure Island వంటి కథకు ఈ ప్రయోజనం మరింత ఎక్కువ. ఎందుకంటే దాని ప్రధాన అంశాలు అయిన నిధి, మ్యాప్, సముద్రం, పైరేట్లు, ద్రోహం భాషతో సంబంధం లేకుండా అర్థమయ్యే కథా పరికరాలు.

కానీ రిస్క్ కూడా ఉంది

పాత కథ ప్రేక్షకుడికి పరిచయం కావడం ప్రయోజనమే. అదే సమయంలో అది సమస్య కూడా. ప్రేక్షకుడికి ఇప్పటికే మనస్సులో “తనదైన Treasure Island” ఉంటుంది.దాంతో పోల్చి చూస్తాడు. కొత్త వెర్షన్ వీటిలో ఏదైనా మార్చితే అభిమానులు ప్రశ్నించవచ్చు. మార్చకపోతే “ఇది మళ్లీ ఎందుకు?” అనే ప్రశ్న వస్తుంది. అందుకే MGM+ వెర్షన్‌లో బెస్ హాకిన్స్‌కు ఎక్కువ ప్రాధాన్యం ఇవ్వడం ఒక ముఖ్యమైన కథన నిర్ణయం.

రిడ్లీ స్కాట్ పోటీ

ఇక్కడ మరో ఆసక్తికరమైన విషయం ఉంది. MGM+ సిరీస్ ప్రేక్షకుడి ముందుకు రావడానికి సిద్ధమవుతున్న సమయంలో, రిడ్లీ స్కాట్ వెర్షన్ కూడా నిర్మాణంలో ఉంది. ఇది ఒకే కథను రెండు విధాలుగా ప్యాకేజింగ్ చేయడమే కాదు. స్ట్రీమింగ్ సిరీస్, థియేట్రికల్ సినిమా అనే రెండు వేర్వేరు మార్కెట్లలో ఒకే intellectual propertyకి చోటు కల్పించడం.

సినిమా పరిశ్రమలో ఇది కొత్త విషయం కాదు. కానీ Treasure Island విషయంలో ఇది ప్రత్యేకంగా గమనించదగ్గది. ఎందుకంటే ఈ కథకు ఇప్పటికే అనేక ఇంగ్లీష్-భాషా అడాప్టేషన్లు ఉన్నాయి. అయినా కొత్త నిర్మాతలు దానిలో విలువను చూస్తున్నారు.

అసలు నిధి ఎక్కడుంది?

నిజానికి ఈ కథలోని అసలు నిధి దీవిలో లేదు. అది కథ హక్కుల్లో ఉంది. ఒక శతాబ్దానికి పైగా ప్రేక్షకులను ఆకర్షించిన కథను కొత్త తరం కోసం మళ్లీ ప్యాకేజింగ్ చేయవచ్చు. ఒకసారి పిల్లల కోసం, మరోసారి కుటుంబ ప్రేక్షకుల కోసం, ఇప్పుడు మరింత గంభీరమైన అడ్వెంచర్‌గా. కొత్త కథను వెతకడం కంటే, పాత కథలో కొత్త ప్రేక్షకుడిని వెతకడం కొన్నిసార్లు సులభం.

MGM+ సిరీస్ అక్టోబర్ 11న ప్రారంభం కానుంది. రిడ్లీ స్కాట్ వెర్షన్ ఎప్పుడు వస్తుందన్నది వేరే ప్రశ్న. అయితే రెండు ప్రాజెక్టులు ఒక విషయాన్ని మాత్రం స్పష్టం చేస్తున్నాయి. Treasure Islandలోని నిధి ఇంకా దొరకలేదు. హాలీవుడ్ మాత్రం దాని మ్యాప్‌ను మళ్లీ మళ్లీ చదువుతూనే ఉంది.

—సూర్య ప్రకాష్ జోశ్యుల