Parliament: భారత్‌లో ట్రాన్స్‌జెండర్లకు కొత్త చట్టం..

Parliament: భారతదేశంలో ట్రాన్స్‌జెండర్ వ్యక్తిగా ఎవరు నమోదు చేసుకోవచ్చు అనే అంశాన్ని నియంత్రించే లక్ష్యంతో రూపొందించిన ఒక వివాదాస్పద బిల్లును భారత పార్లమెంటు గత వారం ఆమోదించింది. 2014 నాటి సుప్రీంకోర్టు తీర్పు, 2019 చట్టం ప్రకారం గతంలో అంతర్జాతీయ ప్రమాణాల మేరకు ‘స్వీయ-గుర్తింపు’ (Self-identification) అవకాశం ఉండేది. అయితే తాజా చట్టం ఈ విధానాన్ని మార్చివేసింది.

కొత్త నిబంధనలు – పరిమితులు:
కొత్త చట్టం ప్రకారం, ఎవరైనా ‘మూడవ లింగం’గా నమోదు కావాలంటే కొన్ని కఠిన నిబంధనలను పాటించాల్సి ఉంటుంది. వ్యక్తులు తప్పనిసరిగా ‘ఇంటర్‌సెక్స్’ అయి ఉండాలి లేదా భారతదేశంలోని సాంప్రదాయ ట్రాన్స్‌జెండర్ వర్గాలతో (సాధారణంగా హిజ్రాలుగా పిలచే వారు) సంబంధం కలిగి ఉండాలని చట్టం స్పష్టం చేస్తోంది.

గణాంకాల్లో భారీ వ్యత్యాసం:
దేశంలో సుమారు 20 లక్షల మంది ట్రాన్స్‌జెండర్లు ఉన్నారని నిపుణులు అంచనా వేస్తున్నారు (కొన్ని అంచనాలు 15 లక్షల నుండి 70 లక్షల వరకు కూడా ఉన్నాయి). కానీ, దేశ తాజా జనాభా లెక్కల ప్రకారం వారి సంఖ్య 5 లక్షల కంటే తక్కువగానే నమోదైంది. దీనిని బట్టి మెజారిటీ ట్రాన్స్‌జెండర్ వ్యక్తులు ఇంకా సర్వే పరిధిలోకి రాలేదని స్పష్టమవుతోంది. మరీ ముఖ్యంగా, సామాజిక న్యాయ, సాధికారత శాఖ నుండి ‘ట్రాన్స్‌జెండర్ సర్టిఫికేట్’ , ‘గుర్తింపు కార్డు’ పొందిన వారి సంఖ్య కేవలం 40,000 లోపే ఉండటం గమనార్హం.

ప్రభుత్వం,కార్యకర్తల మధ్య భిన్నాభిప్రాయాలు:
సరైన వ్యక్తులకు ప్రభుత్వ మద్దతు అందేలా చూడటానికే ఈ కొత్త నిబంధనలు తెచ్చామని ప్రభుత్వం వాదిస్తోంది. అయితే, ట్రాన్స్‌జెండర్ కార్యకర్తలు దీనిని తీవ్రంగా వ్యతిరేకిస్తున్నారు. ఈ సంకుచిత నిర్వచనం వల్ల అనేక రకాల ట్రాన్స్‌జెండర్, జెండర్-ఫ్లూయిడ్ వ్యక్తులు గుర్తింపు కోల్పోతారని వారు ఆందోళన చెందుతున్నారు. తమ హోదాను నిరూపించుకోవడానికి చేసే పరీక్షలు లేదా లింగ నిర్ధారణ శస్త్రచికిత్సల నిర్బంధం “వ్యక్తిగత గౌరవాన్ని, స్వయంప్రతిపత్తిని దెబ్బతీస్తుందని” వారు నిరసన వ్యక్తం చేస్తున్నారు.