PM Modi: ఏఐపై మానవ నియంత్రణ అవసరం.. ఏఐ సమ్మిట్‌లో ప్రధాని మోడీ!

కృత్రిమ మేధ (Artificial Intelligence) ప్రపంచాన్ని ఏలుతున్న తరుణంలో, ఈ అద్భుత సాంకేతికతపై భారతదేశం తనదైన ముద్ర వేసేందుకు సిద్ధమైంది. ఢిల్లీ వేదికగా ప్రతిష్టాత్మకంగా నిర్వహిస్తున్న ‘ఇండియా ఏఐ ఇంపాక్ట్ సదస్సు-2026’లో పాల్గొన్న అంతర్జాతీయ నేతలను ఉద్దేశించి ప్రధానమంత్రి నరేంద్ర మోడీ (PM Modi) గురువారం నాడు ప్రసంగించారు. ఈ సందర్భంగా భారత్ అనుసరిస్తున్న ‘మానవ్’ (MANAV) విజన్‌ను ఆయన ప్రపంచానికి పరిచయం చేశారు. హిందీలో ‘మానవ్’ అంటే మనిషి అని అర్థమని, ఏఐ అభివృద్ధిలో మనిషే కేంద్ర బిందువుగా ఉండాలనేది ఈ విజన్ సారాంశమని ఆయన వివరించారు.

‘మానవ్’ విజన్ అంటే ఏమిటి?
ఏఐ వ్యవస్థకు ఉండాల్సిన ఐదు అత్యంత కీలకమైన లక్షణాలను ప్రధాని (PM Modi) ఈ సందర్భంగా వివరించారు. అవే ‘మానవ్’ విజన్‌కు పునాదులు:

Moral & Ethical (మోరల్, ఎథికల్): నైతిక విలువలతో కూడిన వ్యవస్థ.
Accountable Governance (అకౌంటబుల్ గవర్నెన్స్): జవాబుదారీతనంతో కూడిన పాలన.
National Sovereignty (నేషనల్ సావరినిటీ): దేశ సార్వభౌమత్వం, ముఖ్యంగా డేటా భద్రత విషయంలో రాజీ లేని విధానం.
Accessible & Inclusive (యాక్సెసిబుల్ అండ్ ఇంక్లూజివ్): సమాజంలోని చివరి వ్యక్తికి కూడా ఈ సాంకేతికత అందుబాటులో ఉండాలి.
Valid & Legitimate (వ్యాలిడ్ అండ్ లెజిటిమేట్): చట్టబద్ధమైన, ప్రామాణికమైన వ్యవస్థలు.

ఈ ఐదు ఆంగ్ల పదాల తొలి అక్షరాలను కలిపి ‘MANAV’గా మోడీ (PM Modi) నామకరణం చేశారు.

వైర్‌లెస్ కమ్యూనికేషన్ అంత గొప్ప సృష్టి:
ఏఐ యొక్క ప్రాముఖ్యతను వివరించిన ప్రధాని (PM Modi).. ఒకప్పుడు ‘వైర్‌లెస్ కమ్యూనికేషన్’ ఆవిష్కరణ మానవ చరిత్రలో ఎంతటి మార్పులు తెచ్చిందో, ఏఐ కూడా అంతటి గొప్ప సృష్టి అని కొనియాడారు. ఏఐ కేవలం యంత్రాలకు తెలివితేటలు ఇవ్వడం మాత్రమే కాదు, మనుషుల సహజ సామర్థ్యాలను రెట్టింపు చేయడంలో కీలక పాత్ర పోషిస్తుందని ఆయన ఆశాభావం వ్యక్తం చేశారు. మనుషులు, కృత్రిమ మేధ కలిసి పనిచేయడం ద్వారా కొత్త ఆవిష్కరణలు జరిగే ఒక అద్భుతమైన దశలోకి మనం ప్రవేశించామని ఆయన పేర్కొన్నారు. ఏఐ వల్ల ప్రపంచం నాశనమవుతుందేమో అని కొందరు ఆందోళన చెందుతున్నప్పటికీ, భారత్ మాత్రం ఏఐ సాయంతో తన బంగారు భవిష్యత్తుకు బలమైన పునాదులు వేయాలని నిర్ణయించుకుందని ప్రధాని (PM Modi) పేర్కొన్నారు.

ఏఐ ప్రజాస్వామికీకరణ అవసరం:
ఏఐ వ్యవస్థలకు మనుషులు కేవలం ‘డేటా పాయింట్లు’గా లేదా ముడిపదార్థాలుగా మారిపోకూడదని మోడీ (PM Modi) హెచ్చరించారు. అటువంటి పరిస్థితి రాకూడదంటే ఏఐని కూడా ‘డెమొక్రటైజ్’ (ప్రజాస్వామికీకరణ) చేయాలని ఆయన ప్రపంచ దేశాలకు సూచించారు. ఏఐకి అంతులేని అవకాశాలు ఇచ్చినప్పటికీ, దానిపై తుది నియంత్రణ మాత్రం ఎప్పుడూ మనుషుల చేతుల్లోనే ఉండాలని ఆయన నొక్కి చెప్పారు. మనం తీసుకునే నిర్ణయాలే మన భవిష్యత్తును నిర్దేశిస్తాయని, అందుకే ఏఐని బాధ్యతాయుతంగా ముందుకు తీసుకెళ్లాలని పిలుపునిచ్చారు. టెక్నాలజీ అనేది కేవలం కొందరికే పరిమితం కాకుండా, మానవాళి అందరి సంక్షేమం కోసం పనిచేయాలన్నదే భారత్ లక్ష్యమని మోడీ (PM Modi) తన ప్రసంగం ద్వారా ప్రపంచానికి చాటిచెప్పారు.