Uttar Pradesh: వీడు మామూలోడు కాదు.. పరీక్ష పేపర్‌లో 100 నోటు పెట్టి .. ఏమి రాశాడంటే..

 Student: ఉత్తరప్రదేశ్‌లోని విద్యా వ్యవస్థపై చర్చకు దారితీసే ఒక ఆశ్చర్యపరిచే ఘటన వెలుగులోకి వచ్చింది. ఇంటర్మీడియట్ రెండో సంవత్సరం చదువుతున్న ఓ సోషియాలజీ విద్యార్థి, పరీక్షలో జవాబులు రాయడానికి బదులుగా తన మతపరమైన భావాలను, రాజకీయ నినాదాలను పేపర్‌పై ఎక్కించాడు. ప్రస్తుతం దీనికి సంబంధించిన వీడియో సోషల్ మీడియాలో విపరీతంగా వైరల్ అవుతోంది.

అసలేం జరిగింది?

పరీక్షా పత్రంలో అడిగిన ప్రశ్నలకు సమాధానాలు తెలియకపోయినా, కనీసం ప్రయత్నం చేయకుండా ఆ విద్యార్థి వింతగా ప్రవర్తించాడు. పేపర్ నిండా “బాబర్ తండ్రి శివాజీ మహారాజ్.. జై శ్రీరామ్” అంటూ నినాదాలు రాశాడు. అంతేకాకుండా, ఎలాగైనా తనను పాస్ చేయాలని కోరుతూ జవాబు పత్రానికి 100 రూపాయల నోటును పిన్నుతో అంటించాడు. ఈ తతంగమంతా ఎవరో మొబైల్‌లో చిత్రీకరించడంతో ఈ వ్యవహారం బయటకు వచ్చింది.

నెటిజన్ల ఆవేదన:
ఈ వీడియో చూసిన నెటిజన్లు యూపీ విద్యా వ్యవస్థ తీరుపై తీవ్ర విమర్శలు గుప్పిస్తున్నారు. విద్యార్థుల్లో కనీస అకాడమిక్ జ్ఞానం లేకపోవడం, చదువుకోవాల్సిన వయసులో మతపరమైన విభజనలకు లోనుకావడం ఆందోళనకరమని పలువురు అభిప్రాయపడుతున్నారు. యువతను ఇలాంటి వివాదాల్లోకి లాగడం వల్ల వారి భవిష్యత్తు దెబ్బతింటుందని, విద్యా రంగంలో తక్షణ మార్పులు అవసరమని విశ్లేషకులు సూచిస్తున్నారు.

ఈ ఘటన ఉత్తరప్రదేశ్‌లో యువత ఆలోచనా ధోరణి, విద్యా ప్రమాణాల పతనాన్ని అద్దం పడుతోందని ప్రజలు సామాజిక మాధ్యమాల్లో చర్చించుకుంటున్నారు.