Andhra Pradesh: మదనపల్లె మైనర్ బాలిక కేసులో బిగ్ ట్విస్ట్!

Andhra Pradesh: మదనపల్లెలో మైనర్ బాలికపై జరిగిన కిరాతక ఘటన రాష్ట్రవ్యాప్తంగా కలకలం రేపిన సంగతి తెలిసిందే. ఈ అమానుష ఘటనకు పాల్పడిన నిందితుడు కులవర్ధన్, పోలీసుల కళ్లు గప్పి పరారై చివరకు శవమై తేలాడు.

అసలేం జరిగిందంటే?

నిన్న (బుధవారం) మదనపల్లె పరిధిలో ఒక మైనర్ బాలికపై కులవర్ధన్ అనే వ్యక్తి అత్యాచారానికి పాల్పడి, ఆపై అత్యంత కిరాతకంగా హత్య చేశాడు. ఈ ఘటన బయటకు రావడంతో స్థానికులు ఆగ్రహంతో ఊగిపోయారు. సమాచారం అందుకున్న పోలీసులు నిందితుడిని అదుపులోకి తీసుకున్నారు. అయితే, నిందితుడిని స్టేషన్‌కు తరలిస్తుండగా పోలీసుల వాహనం నుంచి అతడు చాకచక్యంగా తప్పించుకుని పరారయ్యాడు.

తప్పించుకున్న నిందితుడి కోసం గాలింపు:
నిందితుడు పారిపోవడంతో పోలీసు యంత్రాంగం అప్రమత్తమైంది. ఎస్పీ ధీరజ్ ఆదేశాల మేరకు ప్రత్యేక బృందాలు రంగంలోకి దిగి మదనపల్లె పరిసర ప్రాంతాల్లో గాలింపు చేపట్టాయి. నిందితుడి కోసం డ్రోన్లు, డాగ్ స్క్వాడ్‌లను కూడా రంగంలోకి దించినట్లు సమాచారం.

చెరువులో శవమై లభ్యం:
నిందితుడి ఆచూకీ కోసం గాలిస్తుండగా, ఈరోజు ఉదయం స్థానిక చెరువులో ఒక మృతదేహం తేలియాడుతూ కనిపించింది. అది కులవర్ధన్ మృతదేహమేనని పోలీసులు గుర్తించారు. ‘ఘటన తర్వాత తప్పించుకున్న కులవర్ధన్, పోలీసులకు దొరికిపోతాననే భయంతో చెరువులో దూకి ఆత్మహత్య చేసుకున్నాడు’ అని ఎస్పీ ధీరజ్ వివరించారు. నిందితుడి మృతదేహాన్ని పోస్టుమార్టం నిమిత్తం ఆసుపత్రికి తరలించారు.

బాలికపై అత్యాచారం చేసి హత్య చేసింది కులవర్ధనేనని ఆధారాల ద్వారా నిర్ధారణ అయిందని ఎస్పీ స్పష్టం చేశారు. నిందితుడు మరణించినప్పటికీ, ఈ కేసులో ఇతర కోణాలు ఏవైనా ఉన్నాయా అనే దిశగా దర్యాప్తు కొనసాగుతోంది.